Avaryja z vadoj u Žodzinie: jana viarnułasia, ale ŭžyvać jaje možna pakul tolki paśla kipiačeńnia
U Žodzinie 18 sakavika z-za avaryi častka horada zastałasia biez elektryčnaści, a potym i ŭvieś horad — biez vady. Nieŭzabavie jana źjaviłasia, ale joju navat strašna myć ruki, nie toje što pić, kažuć miascovyja žychary. A voś što kažuć miascovyja słužby, piša Tut.by.
Ranicaj 18 sakavika častka Žodzina zastałasia biez elektryčnaści. U MNS paviedamili, što heta adbyłosia z-za paškodžańnia kabiela 10 kV. Pavodle aficyjnych danych, biez elektrazabieśpiačeńnia zastavalisia 58 šmatkvaternych žyłych damoŭ, 22 transfarmatarnyja padstancyi i balnica. U 13.50 elektrazabieśpiačeńnie było adnoŭlena.
Ale adklučeńnie elektraenierhii pryviało da adklučeńnia raźmierkavalnaha punkta na padstancyi BIEŁAZa, što siłkuje bolšuju častku horada, u tym liku i vodazabor «Paŭnočny».
Paśla taho, jak źjaviłasia elektryčnaść, źjaviłasia i vada. Ale, jak kažuć miascovyja žychary, joju navat strašna było myć ruki.
Dniom u čaćvier hałoŭny sanitarny doktar Žodzina Siarhiej Kanavałaŭ, paviedamiŭ, što paśla adnaŭleńnia vodazabieśpiačeńnia ŭziatyja proby vady: heta źjaŭlajecca standartnaj praceduraj pry adklučeńni vodazabieśpiačeńnia bolš čym na dźvie hadziny. Jon udakładniŭ, što da vynikaŭ ekśpiertyzy vadu, jak i paśla pramyŭki vodapravodnych kamunikacyj, užyvać u ježu nie rekamiendujecca. Asabliva heta tyčycca sacyjalnych abjektaŭ: dziciačych sadoŭ, škoł, balnicy i handlu.
Siońnia było paviedamlena, što sanitarna-chimičnyja pakazčyki vady ŭ normie. A voś vyniki bakteryjałahičnaha analizu buduć viadomyja paźniej.
— Varta ŭdakładnić, što paśla kipiačeńnia vadu možna ŭžyvać u ježu, — napisali «Žodzinskija naviny».
Nie ŭsie hetyja miascovyja žychary z hetym zhodnyja. Adna z žycharak paviedamiła, što z vadoj prablem užo niama. Jašče dvoje dasłali fatahrafii vady, jakaja praciahvaje ciačy z-pad krana ranicaj 19 sakavika.
Miascovyja kamunalnyja słužby rekamiendujuć dobra źlić vadu: «mahčyma, zastajałasia ŭ trubach, dajcie vadzie ściačy».
Žycharoŭ Žodzina taksama aburaje reakcyja miascovych uładaŭ na avaryju: «Nie było nijakaha infarmavańnia, pitnuju vadu ŭ kramach umomant razabrali, a cysterny nie padahnali».
Kamientary