Budzie ciažka. Jaki los čakaje PVT i jaho kiraŭnika Jančeŭskaha?

Adzin raz, paśla letnich padziej, PVT užo ŭdałosia adstajać dziakujučy enierhii daśviedčanaha caradvorca Usievałada Jančeŭskaha. Jon adbiŭsia z padtrymkaj častki aparata i arhumientami, što «Łukašenka nie moža sam ža i zahubić svajo najlepšaje dziecišča» i što «pohlady prahramistaŭ — heta nie zdrada, a ŭsiaho tolki realnaści daty kalendara».

Tady vyraśli tolki padatki, ale pahroza nie syšła, i baraćba abvastrajecca. Jana nosić kułuarny charaktar, ułaścivy hetaj sistemie — analityčnyja zapiski, danosy, zabiehi pa kabinietach. 

Ciapier kiraŭniki IT-biznesaŭ u pryvatnych razmovach dzielacca, što apošnim časam časta stali čuć ad ludziej, jakim nielha daviarać, pytańni ŭ duchu: «A jak dumaješ, što b było, kali b PVT zakryli?». Dla čaho źbirajecca hetaja infarmacyja, vidavočna. 

Praciŭniki PVT nabirajuć siłu — heta ludzi ŭ adnolkavych tuflach, jakija vierać u rasijskuju rentu, jakoj z hakam chopić i na «ludziej ź dziaržaŭnym myśleńniem», i trošku na daktaroŭ z nastaŭnikami.

Ajcišniki dla ich — heta łatentnyja zdradniki, jakija zaŭsiody buduć hladzieć na Zachad, a Jančeŭski — ničym nie lepšy za sotni inšych zvolnienych mieniedžaraŭ dziaržsiektara, jakija «pravalili» rabotu i dapuścili roskvit «antydziaržaŭnych» nastrojaŭ na davieranym učastku.

Cikava nazirać, jak recha hetaj kabinietnaj baraćby vylivajecca ŭ pablik. 

Napiaredadni narady ŭ Łukašenki jahony pamočnik Bielski vystupaje z zajavaj, što kryptavaluty — heta śpiekulacyja.

Pradstaŭnik Minadukacyi Kaśpiarovič taksama zajaŭlaje, što ajcišnikaŭ ekanomicy Biełarusi bolš nie treba i nabory buduć urezanyja — jon «tak bačyć».

Naturalna, pracadaŭcy Biełarusi bačać inšaje: IT vysmoktvaje bolš-mienš tałkovych śpiecyjalistaŭ z absalutna ŭsich śfier, patrabujučy jašče i jašče — na rabota.tut.by siońnia bolš za 2600 vakansij tolki raspracoŭščykaŭ.

Što pavinna zdarycca praz 4 hady, kab trend źmianiŭsia?

Padkazka ŭ vystupleńni deputata-kamsamolca Kliševiča na staronkach hałoŭnaj aficyjnaj haziety, pad padzahałoŭkam «Ekanamičnyja pieradumovy pieravarotu»: «My nie možam mieć unutry krainy ceły ankłaŭ z naŭciamnym ideałahičnym napaŭnieńniem. […] Treba zmahacca z pryčynami pieravarotu». 

U jakaści liryčnaha adstupleńnia možna padkreślić asablivy cynizm u vybary asoby dla ahučvańnia płanaŭ zarezać PVT u «SB» — funkcyjanier BRSM Kliševič. Ci nie kožny beeresemaviec hladzicca ŭ Jančeŭskaha jak u pavialičanaje lusterka — toj byŭ pieršym kiraŭnikom arhanizacyi, skoknuŭ da nieba. I vyniki jaho raboty prapanuje źniščyć novy kamsamolec.

Cikava, nazirajučy ciapier, jak pamienšanaja kopija prapanuje viarnucca da sachi i łapciaŭ, ci razumieje Jančeŭski, jak sam vyhladaŭ 20 hod tamu?

Ciapier za PVT publična nichto nie ŭstupajecca, trybuny ŭ dziaržaŭnych ŚMI dla hetaha amal niama. Jančeŭski adnaasobna i pa rodu dziejnaści pavinien supakojvać: «Katastrofy niama, ekspart raście».

Imavierna, u spravie adstojvańnia PVT jon budzie abapiracca, siarod inšaha, i na dobryja adnosiny sa Snapkovym i novym prezidentam Nacyjanalnaha alimpijskaha kamiteta.

Ideja simpatantaŭ PVT u tym, kab zachavać choć niejkija instytuty, abapirajučysia na jakija kraina mahła b viarnucca da narmalnaha žyćcia ŭ postkryzisny čas, paśla 12-hadovaj stahnacyi. 

Ale cichija ŭcioki kampanij i ludziej adbyvajecca prosta zaraz, i marna spadziavacca na cud, kali ahulnaja atmaśfiera ŭ krainie nie źmienicca. PVT moža stać stračanym vobrazam taho, jak mahli b vyhladać i inšyja śfiery ekanomiki, kali b dziaržava nie sunuła tudy svajo sacyjalna-aryjentavanaje abličča.

• 0
• 0
• 0
• 0
• 0
• 0
• 0
• 0