Alena Leŭčanka viarnułasia ŭ baskietboł pad №20 — u honar 2020 hoda
Viadomaja biełaruskaja baskietbalistka Alena Leŭčanka paśpiachova praviała svoj pieršy matč za dva hady, piša Tut.by.
U kancy studzienia Leŭčanka padpisała kantrakt z adnym z najlepšych kłubaŭ Hrecyi — afinskim «Panacinaikasam».
Adnaŭleńnie pierarvanaha jašče ŭ minułym hodzie čempijanatu zaciahvałasia z-za karanavirusa, ale siońnia «Panacinaikas» znoŭ vyjšaŭ na placoŭku. I kamanda atrymała ŭpeŭnienuju pieramohu nad «Eśpierydes Kaliateas» - 64:46.
Važki ŭkład u pieramohu ŭniesła i Leŭčanka. Biełaruskaja centravaja vyjšła ŭ startavaj piaciorcy i praviała na placoŭcy bolš za 27 chvilin. Za hety čas jana nabrała 13 ačkoŭ i zrabiła 8 padboraŭ.
Paśla čatyroch turaŭ u «Panacinaikasa» try pieramohi, što dazvalaje kamandzie raźmiaščacca ŭ vierchniaj častcy turnirnaj tablicy.
Adznačym, što Alena Leŭčanka vyjšła na placoŭku pad numaram 20. Svoj vybar baskietbalistka patłumačyła nastupnym čynam.
«U 2020 hodzie my stali nacyjaj i abjadnalisia, u 2020 hodzie narod Biełarusi staŭ na abaronu praŭdy i svaich pravoŭ! U znak salidarnaści z maim biełaruskim narodam i z usimi źniavolenymi, jakija ciapier znachodziacca ŭ turmach, z tymi, chto praciahvaje zmahacca za svabodu — ja z vami, a vy sa mnoj», — napisała Leŭčanka na svajoj staroncy ŭ Instagram.
Alena Leŭčanka — adna z najlepšych baskietbalistak u historyi Biełarusi. Jana vystupała za zbornuju z 2001 hoda, dvojčy hulajučy ŭ składzie nacyjanalnaj kamandy na Alimpijskich hulniach. U 2010 hodzie zhulała ŭ finale žanočaj NBA i była pryznana najlepšaj centravoj čempijanatu śvietu.
Zaraz Leŭčanka padtrymlivaje ruch spartsmienaŭ suprać hvałtu i falsifikacyj na vybarach. U kastryčniku jana adsiedzieła 15 sutak na Akreścina.
Kamientary