Ale ŭžo 29 krasavika stała zrazumieła, što kanał zachopleny. U kanale pačali źjaŭlacca kpiny z apazicyi ŭ duchu «Žoŭtych źlivaŭ». Ludzi pačali masava adpisvacca — za dva dni aŭdytoryja abrynułasia z 30 tysiač padpisantaŭ da 13 tysiač i praciahvaje źmianšacca.
Pry hetym asoba admina tak i zastavałasia tajamnicaj. Raniej jon davaŭ intervju, ale vyklučna inkohnita. Pra siabie kazaŭ tolki, što pracuje rabočym, kličuć Siarhiejem, trochi za 30 hadoŭ.
Ale ŭ zachoplenym kanale novyja adminy nie ŭstrymalisia ad kpinaŭ ź jaho — užo byłoha — aŭtara. Tam źjaviŭsia dopis z nastupnym tekstam:
«Znajomimsia z byłym žartaŭnikom i ŭładalnikam našaha kanała. Dla pačatku, voś vam infarmacyja ab jašče dvuch resursach, jakija jon viadzie. Pakul hety patryjot nacyk vielmi zaniaty, tamu intervju ź im budzie paźniej. Užo možna pačynać žartavać…»
Da dopisu dałučyli dva skrynšoty — adzin ź niejkaha kanała na 18 čałaviek, druhi — z telehram-kanała «Bies Poniatija». U abodvuch byli raniej raźmieščanyja karcinki nacysckaha kštałtu.
Vyhladaje, što siłaviki zatrymlivali mužčynu za zusim inšyja kanały — a vypadkova natrapili jašče i na samaha papularnaha biełaruskaha humarysta.
«Naša Niva» vyśvietliła, što 28 krasavika ŭ Minsku byŭ zatrymany niechta Siarhiej Bujevič. Mužčynu 36 hadoŭ. Pracuje kładaŭščykom u łahistyčnym centry. Jaho jakraz i abvinavacili ŭ raźmiaščeńni nacysckaj simvoliki ŭ vyšejnazvanych kanałach.
U rasparadžeńni «Našaj Nivy» jość aŭdyjazapis z pasiadžeńnia pa spravie Bujeviča. Jano prachodziła ŭ sudzie Frunzienskaha rajona.
Padčas razhladu spravy paviedamlali, što jon «u niavyznačany pieryjad času, znachodziačysia ŭ nieŭstanoŭlenym miescy, raźmiaściŭ u telehram-kanale «Bies Poniatija» fota z vyjavaj, što demanstruje nacysckuju simvoliku, kampazicyju ŭ vyhladzie vyjavy hierba SS …Treciaha rejcha, čerap z kostkami na fonie čornaha koleru… Tym samym ažyćciaviŭ publičnuju demanstracyju nacysckaj simvoliki i atrybutyki». Hety fakt byŭ vyjaŭleny 20.04.2021 u 16:00 padčas vyvučańnia telehram-kanała «Bies Poniatija» siłavikami.
Dniom 28 krasavika Bujeviča zatrymali na vulicy Kalvaryjskaj. «Jon akazaŭ niepadparadkavańnie zakonnym patrabavańniam supracoŭnikam unutranych spraŭ, upiraŭsia, siadaŭ na ziamlu».
Bujevič patłumačyŭ: vyjavy byli raźmieščanyja im jašče ŭ 2019 hodzie «ŭ jakaści žarta».
«Na toj momant było kala 60 padpisčykaŭ, ja nie razhladaŭ heta jak demanstracyju. Vinu pryznaju», — paviedamiŭ Bujevič. Pryznaŭ jon vinu i ŭ epizodzie ź niepadparadkavańniem milicyi, patłumačyŭšy, što «byŭ u stanie stresu i tamu nieadekvatna adreahavaŭ».
Sudździa Jarochina pryznała Bujeviča vinavatym pa abodvuch artykułach: i ŭ demanstracyi nacysckaj simvoliki, i ŭ niepadparadkavańni. Siarhiej atrymaŭ 25 sutak aryštu.
Ci buduć niejkija nastupstvy za satyryčnyja dopisy, pakul nieviadoma.
«Ja nie šukaju słavy. Ja dobra viedaju, dzie žyvu, vydatna razumieju, što žarty ŭ Biełarusi možna kvalifikavać jak sprobu dziaržaŭnaha pieravarotu. Heta nie žart, choć i vyhladaje jak žart, — kazaŭ tady jašče tajamničy admin «Sovietskoj Biełoruśsii» ŭ intervju «Našaj Nivie». — Moža, vy dačakajeciesia majho proźvišča ŭ adnoj sa zvodak MUS ad pres-sakratarki Volhi Čamadanavaj».
Pakul što ŭ zvodkach proźvišča Bujeviča nie hučała. Ale ž u siońniašniaj Biełarusi takija rečy robiacca zvyšchutka. Ci byŭ hatovy da zatrymańnia sam humaryst? U inšym intervju jon pa-fiłasofsku kazaŭ: «Ja biełarus, a značyć, pa zmaŭčańni vinavaty».
