Aficyjny pradstaŭnik Jeŭrasajuza patłumačyŭ, čamu nie pryniali čaćviorty pakiet sankcyj

Napiaredadni stała viadoma, što pryniaćcie čaćviortaha pakieta sankcyj suprać Biełarusi adkładajecca da červienia, choć raniej havorka išła pra 10 maja. Pryčyna, jak pisali ŚMI, u tym, što pakiet dakumientaŭ prosta nie paśpieli padrychtavać.

Pieter Stana tłumačyć, čamu nie paśpieli — pamiž krainami-čalcami ES iduć dyskusii nakont taho, chto ź piersanalij pavinien być u sankcyjnym śpisie i nakolki sankcyi pavinny być maštabnymi. Praca jašče praciahvajecca, i, pa słovach Stana, niama peŭnaha terminu, da jakoha sankcyi pavinny być pryniaty i abvieščanyja.

— Dazvolcie mnie, pierš za ŭsio, padkreślić, što ES ćviorda staić na baku naroda Biełarusi. Mienavita tamu my nie mirymsia z praciahłymi represijami i parušeńniami asnoŭnych svabod i pravoŭ čałavieka hramadzian krainy. Sankcyi buduć padrychtavany i kančatkova zaćvierdžany paśla taho, jak zavieršacca dyskusii pamiž krainami-členami ES, i ŭsie krainy-členy pahodziacca ź ich maštabam i ŭsimi, chto pavinien być padvierhnuty sankcyjam, a taksama paśla zaviaršeńnia ŭsich nieabchodnych pracedur. Heta praces, jaki nie maje zahadzia vyznačanaj daty i zaŭsiody zajmaje niekatory čas, pakolki ŭsie śpisy (roŭna rašeńni ab sankcyjach u dačynieńni da kankretnych ludziej abo arhanizacyj) pavinny mieć nadziejnaje jurydyčnaje abhruntavańnie, padmacavanaje adpaviednymi dokazami, i adnahałosnuju zhodu pa ich usich 27 dziaržaŭ-členaŭ ES. My spadziajomsia, što hety praces budzie zavieršany ŭ najbližejšy čas, — skazaŭ Pieter Stana.

U toj ža čas Jeŭrasajuz, jak padkreśliŭ jaho pradstaŭnik, zaklikaje ŭłady Biełarusi spynić represii, jakija jašče praciahvajucca, i ŭklučycca ŭ inkluziŭny ahulnanacyjanalny dyjałoh dla pošuku vychadu ź biahučaha kryzisu, kab pravy naroda byli vykananyja, a jaho hołas i vybar adnosna kiraŭnictva krainaj byli pačutyja.

Z kastryčnika 2020 hoda ES uvioŭ užo try pakiety sankcyj.

U pieršym, jaki byŭ pryniaty 2 kastryčnika, značylisia 40 biełaruskich aficyjnych asob — siłavikoŭ (pradstaŭnikoŭ MUS i KDB) i siabraŭ CVK, u dačynieńni da jakich byli ŭviedzienyja piersanalnyja abmiežavańni.

Druhi pakiet sankcyj byŭ pryniaty 6 listapada: Jeŭrasajuz uvioŭ abmiežavańni ŭ dačynieńni da Alaksandra Łukašenki i 14 vysakapastaŭlenych čynoŭnikaŭ, u tym liku pamočnika prezidenta Viktara Łukašenki, kiraŭnika Administracyi prezidenta Ihara Siarhiejenki, kiraŭnika KDB Ivana Cierciela, načalnika Śledčaha kamiteta Ivana Naskieviča, kiraŭnika AAC Andreja Paŭlučenki, pres-sakratara Łukašenki Natalli Ejsmant i inšych.

17 śniežnia Jeŭrasajuz pryniaŭ treci pakiet sankcyj. U śpis uvajšli 29 fizičnych i siem jurydyčnych asob, u tym liku AAT «140-y ramontny zavod», AAT «Ahat — elektramiechaničny zavod», AAT MZKC, ZAT «Biełtechekspart», Dziaržaŭnaja ŭstanova «Hałoŭnaje haspadarčaje ŭpraŭleńnie», Kiraŭnictva spravami prezidenta, Dana Holdings i TAA «Siniezis».

• 0
• 0
• 0
• 0
• 0
• 0
• 0
• 0