Maryna Šybko: U kamiery Fiaduty narod padsieŭ na «Karala Lira» i «Makbeta»
Maryna Šybko ŭ svaim fejsbuku paviedamiła, što pryjšoŭ list ź SIZA KDB ad jaje muža Alaksandra Fiaduty, jakoha zatrymali 12 krasavika ŭ Maskvie i jaki prachodzić pa «spravie dziaržaŭnaha pieravarotu».
«… Napisaŭ, što pieračytaŭ «Hannu Kareninu» (nu, viadoma, na voli nie było mahčymaści), pracuje nad «Kałasami pad siarpom tvaim», budzie pisać knihu-kamientar pra jaje. Zamoviŭ encykłapiedyju «Karatkievič». Z sukamiernikami abmiarkoŭvajuć trahiedyi Šekśpira, narod padsieŭ na «Karala Lira» i «Makbeta». Pa rekamiendacyi AIFa kupili «Chrystos pryziamliŭsia ŭ Harodni». Nu čym nie knihanoša? A jašče kupiŭ saviecki raman pra cudy U. Arłova «Altyst Daniłaŭ», jaki nie dachodzili ruki pračytać. Tak, vidać, u cudy vieryć chočacca…» — cytuje Maryna Šybko list muža.
Jana dadaje, što razam buduć čytać viečarami Zabałockaha i potym Ćviatajevu [na adlehłaści]. «Siabry, čytajcie z nami! Voś takija naviny ad knižnaha zmoŭščyka. Usim dziakuje, chto napisaŭ, ale listy nie dachodziać, a čyje atrymaŭ, na ich adkazaŭ», — napisała jana.
***
Alaksandr Fiaduta byŭ zatrymany 12 krasavika ŭ Maskvie razam ź Jurasiom Ziankovičam, u Biełarusi byli taksama zatrymanyja Ryhor Kastusioŭ, Volha Hałubovič, Dzianis Kraŭčuk. KDB padazraje ich (jašče piać čałaviek znachodziacca pa-za miežami Biełarusi) u «zmovie abo inšych dziejańniach, ździejśnienych z metaj zachopu dziaržaŭnaj ułady» (art. 357, č. 1).
Kamientary