Ministr zdaroŭja raskazaŭ, ci buduć u nas jeŭrapiejskija vakcyny i jaki prahnoz nadalej
Pra heta Dźmitryj Pinievič raskazaŭ u intervju sb.by.
Žurnalistka spytała Dźmitryja Pinieviča, ci viaducca pieramovy z vytvorcami Moderna, Pfizer.
Ministr adkazaŭ, što pa efiektyŭnaści hetyja vakcyny supastaŭnyja sa «Sputnikam V» ci navat nižej, a pa canie — niepamierna vyšejšyja.
«My nikoli pra heta nie havorym, a varta było b: kab pryščapić miljon čałaviek, treba patracić 20 miljonaŭ dalaraŭ. Bo dva kampanienty vakcyny «Sputnik V» (kuplajem my jaje ci raźlivajem u siabie) kaštujuć 20 dalaraŭ. A ŭjavicie, kolki srodkaŭ sydzie na kuplu preparataŭ za 30, 60 dalaraŭ. Ciapier my sprabujem sabrać infarmacyju ab tym, kolki čałaviek choča zrabić pryščepku za svoj košt, ale ŭ krainie vielmi nievialikaja kolkaść ludziej, hatovych na heta. Asabliva kali jość efiektyŭnaja i jakasnaja biaspłatnaja vakcyna. A što tyčycca AstraZeneca — cana ŭ jaje takaja ž, jak i ŭ rasijskaha preparata, ale nas naściarožvajuć ŭskładnieńni pry ŭžyvańni hetaj vakcyny, jakija ciapier publikujuć», — miarkuje Pinievič.
Jon taksama dadaŭ, što ŭ kancy maja ŭ Biełaruś pastaviać 300 000 doz dla 150 000 čałaviek kitajskaj Vero Cell.
Taksama Dźmitryj Pinievič raskazaŭ, što ŭ situacyi z karanavirusam dalej pavinna być tolki lahčej.
«Virus ŭsio-tki padparadkoŭvajecca zakonam siezonnaści sa źnižeńniem aktyŭnaści ŭ letni pieryjad. U tym liku my bolš raźjazdžajemsia, znachodzimsia na pavietry, dziakujučy śviežaj harodninie i sadavinie padymajecca imunitet. Plus na heta nakładziecca vakcynacyja, jakuju my nie płanujem spyniać,
tamu takoha ŭzdymu, jak vosieńniu, bolš nie budzie», — adznačyŭ jon.
«Asnoŭnaja zadača — prajści viesnavuju chvalu, astatniaje vytrymajem», — dadaŭ jon.
Havoračy ab treciaj chvali, jakaja ciapier u samym razhary, Dźmitryj Pinievič zaŭvažyŭ, što siońnia prykładna 1,5 tys. łožkaŭ u krainie znachodziacca ŭ svabodnym režymie. Adnak ciažkich pacyjentaŭ šmat — heta słužyć markieram składanaj situacyi. Kali ŭ ličbach, to, naprykład, kolkaść špitalizavanych u 2,5 raza mienšaja, čym na piku vosieńskaj chvali, a voś kolkaść ciažkich pacyjentaŭ mienšaja tolki ŭ 1,5 raza.
Kamientary