Abaronca Kaciaryny Barysievič i dydžejaŭ Pieramien, advakat Michaił Badnarčuk źjechaŭ va Ukrainu
Advakat šerahu palitźniavolenych Michaił Badnarčuk u kancy krasavika napisaŭ zajavu z prośbaj vyklučyć jaho sa składu Minskaj haradskoj kalehii advakataŭ i źjechaŭ u Kijeŭ.
Voś što kaža pra heta sam Badnarčuk.
«Ja vyrašyŭ pastavić na paŭzu advakackuju dziejnaść, bo joj užo niemahčyma zajmacca tak, jak ja rabiŭ heta raniej. Pa-pieršaje, majho advakackaha biuro, dzie ja pracavaŭ, užo faktyčna niama: adzin partnior pazbaŭleny licenzii, u druhoha peŭnyja asabistyja prablemy.
Pa-druhoje, na momant majho sychodu ŭžo było zrazumieła, što buduć pryniaty źmieny ŭ Zakon ab advakatury i advakackaj dziejnaści, zhodna ź jakim možna budzie pracavać tolki ŭ ramkach jurydyčnych kansultacyj i pad jašče bolšym kantrolem (a faktyčna — kiravańniem) Miniusta, što mianie nie zadavalniaje», — kaža advakat.
«Kali viarnusia? Adnaznačnaha adkazu niama. Adjezd u lubym razie časovy, ale dakładnych terminaŭ ja sabie nie akreślivaŭ, hetak ža jak i niama dakładnych płanaŭ pa dalejšaj dziejnaści. Budziem ličyć heta biesterminovym tvorčym adpačynkam», — dadaŭ jon.
Badnarčuk viadomy pryncypovaj pazicyjaj u adstojvańni pryncypaŭ zakonnaści.
Taksama Biełaruś niadaŭna pakinuŭ viadomy advakat Siarhiej Zikracki — jon dałučyŭsia da kamandy Śviatłany Cichanoŭskaj.
Kamientary