«Baćki ŭžo addali hrošy za biełyja stužki, a dyrektarka skazała ŭ takich na śviata nie źjaŭlacca. I čyrvonuju stužku kab nie zakazvali taksama. Chtości sprabavaŭ spračacca: maŭlaŭ, u čym sprava — stužka biełaja, ale litary na joj čornyja. Tym bolš u nas raniej zaŭsiody vypuskniki addavali pieravahu takim koleram — biełamu ci čyrvonamu, i prablem nie było. Ciapier usie ŭ razhublenaści, nie mohuć vyznačycca z takim prostym pytańniem», — ananimna raspaviali «Našaj Nivie» niekalki svajakoŭ staršakłaśnikaŭ.
Ilustracyjnaje fota Nadziei Bužan.
Dyrektarka hancavickaj himnazii Ina Baranoŭskaja paćvierdziła, što koleravy kanflikt sapraŭdy byŭ, ale, na jaje dumku, tamu što «mienšaść vyrašała za bolšaść».
Paźniej dyrektarka steliłasia z redakcyjaj i padrabiaźniej raskazała svaju viersiju padziej:
«Mienšaść aformiła zakaz stužak, nie ŭličvajučy mierkavańnie bolšaści», — prakamientavała Ina Baranoŭskaja. «U mianie ŭ samoj u vypusknym kłasie dźvie dački, tamu vybar stužak u intaresach našaj siamji. Pieršapačatkova ŭsie abirali pamiž dvuma kolerami — čyrvonym (!) i šampań. U internecie navat zapuścili hałasavanku. Bolšaść była za čyrvony, ale ŭ vyniku mienšaść schiliła na svoj bok bolšaść i vyrašyła zakazać inšyja stužki. Praŭda, zamiest koleru šampań čamuści byli kuplenyja biełyja stužki z čornym nadpisam i hołubam — usie byli ŭ šoku. Ja takija na svaich dziaŭčatach navat nie ŭjaŭlaju».
Stužki, jakija byli ŭžo kuplenyja dla 11-kłaśnikaŭ.
Pryjści da adnaho rašeńnia vypuskniki i ich baćki nie zmahli, i da prostaha abmierkavańnia estetyčnaha vyhladu stužak u vyniku, na dumku administracyi, pryplali palityčny kantekst.
Abmierkavańnie znakaŭ adroźnieńnia vypusknikoŭ praciahvajecca: kali rašeńnie, jakoje zadavolić usich, pryniataje nie budzie, razhladajecca opcyja nabyćcia zvanočkaŭ na adzieńnie.
U adździele adukacyi Hancavickaha rajvykankama nas taksama zapeŭnili, što kožny kłas ŭ pravie vybirać sabie koler stužak svabodna i pa dušy.
