Suzasnavalnik Tut.by Kirył Vałošyn raskazaŭ pra dalejšyja płany paśla razhromu sajta
Ab hetym suzasnavalnik Tut.by zajaviŭ siońnia na bryfinhu, kamientujučy situacyju vakoł kampanii i błakavańnia sajta
Vałošyn nazvaŭ try zadačy:
1) Ramantavać mabilnyja dadatki — bo jany nie publikujuć abnoŭleny kantent;
2) Sprabavać adnaŭlać Tut.by na inšym damienie;
3) Źviartacca ŭ Mininfarm pa aficyjnuju pastanovu ź pieralikam navin, jakija ŭłady ličać parušeńniem zakanadaŭstva, kab vydalić ich.
«Na hety momant nam nie ŭdajecca adnavić partał u vyhladzie lusterka. Skažu, što źniknieńnie dostupu da našych siervieraŭ padobna da rejderskaha zachopu. Navat kali Mininfarm vynies pastanovu ab błakavańni Tut.by na terytoryi Biełarusi, zamiežnyja karystalniki pavinny mieć mahčymaść zachodzić na sajt, jak i supracoŭniki kampanii», — miarkuje Kirył Vałošyn.
Jon dadaŭ, što biez naviedvalnaści, jakaja była ŭ partała, biez rekłamadaŭcaŭ trymać kamandu ŭ tym abjomie, jakaja była, nie ŭdasca. Tamu niekatoryja supracoŭniki z raździeła «Afiša» adpraŭlajucca ŭ adpačynak. Kali budzie razbłakavany rachunak, vypłaciać zarobki.
«Asnoŭny ŭpor ciapier na abaronu ludziej, pracu z advakatami, vyzvaleńnie kalehaŭ, nakolki my možam na heta ŭpłyvać», — dadaŭ Vałošyn.
Na paradku dnia taksama staić mahčymaść pierajezdu častki rabotnikaŭ za miažu. Ale nie ŭsie hatovyja da hetaha.
Taksama Vałošyn raspavioŭ, chto z uładalnikaŭ partała na voli.
Ciapier na voli zastajucca nastupnyja akcyjaniery TAA «TUT BAJ miedyja»: Ksienija Ivanova, Kirył Vałošyn, Jaŭhienija Čarniaŭskaja. Usie jany nie ŭ Biełarusi.
Mažarytarny akcyjanier — Jaŭhienija Čarniaŭskaja, dačka Juryja Zisiera i Julii Čarniaŭskaj.
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary