Premjer Polščy: «Zachop pasažyrskaha samalota — akt dziaržaŭnaha teraryzmu, jaki nielha pakinuć biespakaranym»
Premjer-ministr Polščy Matevuš Maraviecki nazvaŭ padziei z rejsam Ryanair «zachopam pasažyrskaha samalota» i zajaviŭ: «Zachop pasažyrskaha samalota — akt dziaržaŭnaha teraryzmu, jaki nielha pakinuć biespakaranym».
Rejsam Ryanair Afiny—Vilnia lacieŭ biełaruski žurnalist-emihrant Raman Pratasievič. Samalot pasadzili ŭ Minsku, Pratasieviča zatrymali.
«Zachop pasažyrskaha hramadzianskaha samalota — heta biesprecedentny akt dziaržaŭnaha teraryzmu. Pa-inšamu heta nie nazavieš. Naprošvajecca paraŭnańnie z padobnaj atakaj savieckich źniščalnikaŭ na karejski łajnier u 1983 hodzie, — skazaŭ premjer Polščy dla polskaha ahienctva PAP. — Režym Łukašenki zachodzić usio dalej. Na minułym tydni dajšło da žorstkaj raspravy z žurnalistami partała Tut.by, uvieś čas takim ža čynam pieraśledujuć «Biełsat». Niepakoj tym bolšy, što na minułym tydni ŭ biełaruskaj turmie pry niavyśvietlenym abstavinach pamior inšy praciŭnik režymu Vitold Ašurak», — dadaŭ Maraviecki.
Maraviecki zapatrabavaŭ nieadkładnaha vyzvaleńnia Ramana Pratasieviča, a taksama Anžaliki Borys, Andreja Pačobuta dy inšych palitviaźniaŭ.
Matevuš Maraviecki zajaviŭ, što źviarnuŭsia da kiraŭnika Rady Jeŭropy z prośbaj dadać u paradak dnia zaŭtrašniaj sustrečy kiraŭnikoŭ krain Jeŭrasajuza punkt, jaki datyčyć zachopu samalota Ryanair nad Biełaruśsiu. Maraviecki choča, kab prosta zaŭtra na pasiadžeńni Rady Jeŭropy było pryniataje rašeńnie ab sankcyjach suprać Biełarusi ŭ suviazi z padziejami vakoł rejsu Ryanair.
«Sankcyi pavinny datyčyć u pieršuju čarhu pytańnia pavietranaha ruchu nad terytoryjaj Biełarusi i zabarony palotaŭ biełaruskich avijalinij», — zajaviŭ Maraviecki.
Prezident Litvy Hitanas Naŭsieda zaklikaŭ sajuźnikaŭ pa NATO i ES «nieadkładna adreahavać na pahrozu, jakuju biełaruski režym stvaraje mižnarodnaj hramadzianskaj avijacyi» i skazaŭ, što budzie havaryć pra incydent zaŭtra na sustrečy kiraŭnikoŭ krain Jeŭrasajuza ŭ Bruseli.
MZS Francyi zaklikaŭ jeŭrapiejskija krainy dać supolny adkaz na pasadku samalota Ryanair u Minsku.
MZS Hrecyi nazvała siońniašni incydent z łajnieram Ryanair «vykradańniem ludziej».
«Hrecyja rašuča asudžaje vykradańnie ludziej, jakoje adbyłosia siońnia i pryviało da prymusovaj pasadki rejsu Ryanair FR 4978, što kiravaŭsia z Afinaŭ u Vilniu. Hety ŭčynak, jaki pastaviŭ pad pahrozu žyćcio ŭsich pasažyraŭ, nieprymalny. My zaklikajem nieadkładna vyzvalić samalot i ŭsich pasažyraŭ, kab jany zmahli dabracca da kančatkovaha punktu pryznačeńnia».
Łukašenka pamiłavaŭ eks-kiraŭnika svajoj achovy Uciuryna6
Kamientary