«Nazvali moj kantent ekstremisckim». Biełaruskamoŭny błohier paśla sutak źjechaŭ z krainy
Jašče napiaredadni Dnia Voli da błohiera Jahora Tubieleviča pryjšli piać milicyjantaŭ. U jaho doma, dzie jon žyŭ z žonkaj i maleńkim synam Hiedyminam, praviali vobšuk. Paśla hetaha chłopca zabrali ŭ RUUS i paźniej asudzili pa artykule 23.4 (niepadparadkavańnie) na 15 sutak aryštu. Paśla svajho adjezdu ŭ Kijeŭ błohier raspavioŭ pra toje, što ź im adbyvałasia.
«Ja vymušany byŭ źjechać, bo nie adčuvaŭ siabie ŭ biaśpiecy ŭ Biełarusi ŭ suviazi ź dźviuma patencyjnymi kryminalnymi spravami: mianie sprabavali abvinavacić u spynieńni ruchu ciahnikoŭ u Lidskim rajonie (mienavita pa hetaj spravie da nas pryjšli z vobšukam) i zrabić śviedkam pa ŭzłomie niejkaha sajta ŭ Žłobinie tolki tamu, što ja publikavaŭ skryn adtul», — raspavioŭ Jahor.
Kala vaśmi hadzin Jahora pratrymali na Akreścina, a paśla pieraviali ŭ Žodzina. Ën padrabiazna apisaŭ, z čym jamu i sukamiernikam pryjšłosia sutyknucca za 15 sutak: zalivańnie chłorki na padłohu na Akreścina, adsutnaść haračaj vady, uklučanaje śviatło navat nočču, adsutnaść knih i inšaj litaratury, asadak i ałoŭkaŭ, kanfiskacyja ŭ pieradačach sała i miasa, abaviazak źjeści ŭsio za dva dni, načnyja pravierki (časam try razy za noč), zabarona siadzieć na łožkach z šaści ranicy da 22.00, admova pryvieści miedyka pa nieabchodnaści, udary pa nahach biercami i pa śpinie dubinkaj, son na kafli i mietaličnych narach, 16 čałaviek na 10 miescaŭ u kamiery, zabarona na pieradaču vilhotnych survetak. Taksama asudžanym amal nie dachodzili listy.
U pracesie pieratrusu była kanfiskavanaja technika Jahora — asabisty telefon i noŭtbuk pracadaŭcy. Pry hetym instahram-akaŭnt bolš z čym 22 tysiačami padpisantaŭ byŭ skradzieny, śćviardžaje Tubialevič.
«Ja dahetul nie mahu viarnuć dostup da jaho. Mnie vynieśli papiaredžańnie, skazali, što moj kantent u błohu ekstremiscki i mnie treba skančvać heta pisać», — kaža Tubialevič.
U starym akaŭncie Jahor pisaŭ pra biełaruskuju movu, padarožžy pa rodnaj krainie, historyju (małady čałaviek navučaŭsia na histfaku, ale ciapier zabraŭ adtul dakumienty). Novy profil jon raźvivaje ŭ tym ža kirunku.
«Ja płanuju raźvivać novuju staronku, kab dalej rabić biełarusaŭ bolš śviadomymi. Budu dapamahać biełarusam i padtrymlivać ich, ale ciapier za miažoj».
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary