NASA adpravić dźvie misii na «piakielnuju płanietu» Vienieru
NASA abviaściła, što adpraŭlaje dźvie novyja misii na Vienieru, kab vyvučyć atmaśfieru płaniety i jaje hieałahičnyja asablivaści, piša VVS.
Misii, kožnaja ź jakich atrymaje finansavańnie ŭ pamiery 500 miljonaŭ dalaraŭ, pavinny pačacca ŭ 2028—30 hadach.
Administratar NASA Bił Nelsan zajaviŭ, što misii daduć «šaniec daśledavać płanietu, na jakoj my nie byli bolš za 30 hadoŭ».
Apošnim zondam ZŠA, jaki naviedaŭ płanietu, byŭ kaśmičny aparat «Mahiełan» u 1990 hodzie.
«Hetyja dźvie misii-siostry imknucca zrazumieć, jak Vieniera pieratvaryłasia ŭ piakielnuju płanietu, na pavierchni jakoj moža płavicca śviniec», — skazaŭ Nelsan.
Vieniera — druhaja płanieta ad Sonca i samaja haračaja płanieta Soniečnaj sistemy z tempieraturaj pavierchni 500 pa Celsii.
Misija Davinci+ (hłybokaje atmaśfiernaje daśledavańnie vysakarodnych hazaŭ, chimii i vizualizacyi Vieniery) budzie daśledavać atmaśfieru płaniety, kab atrymać ujaŭleńnie ab tym, jak jana farmavałasia i evalucyjanavała. Jana taksama pavinna vyznačyć, ci byŭ na Vieniery kaliści akijan.
Čakajecca, što Davinci+ adpravić pieršyja vysakajakasnyja malunki hieałahičnych asablivaściaŭ płaniety. Navukoŭcy ličać, što hetyja asablivaści mohuć być supastaŭnyja z macierykami na ziamli i miarkujuć, što Vieniera maje tektoniku plit.
Druhaja misija Veritas (vypramieńvańni Vieniery, radyjonavuka, InSAR, tapahrafija i śpiektraskapija), składzie kartu pavierchni płaniety, kab zrazumieć jaje hieałahičnuju historyju i daśledavać, čamu jana raźvivałasia nastolki inačaj, čym Ziamla.
Misija budzie vykarystoŭvać radyjołakatar dla vymiareńnia vyšyni pavierchni i vyznačeńnia taho, ci adbyvajucca vyviaržeńni vułkanaŭ i ziemlatrusy da hetaha času.
«Dziŭna, jak mała my viedajem pra Vienieru, ale sukupnyja vyniki hetych misij raskažuć nam pra jaje — ad abłokaŭ na niebie da vułkanaŭ na jaje pavierchni i až da samaha jadra», — skazaŭ Tom Vahnier z padraździaleńnia płanietnaj navuki NASA.
«Heta budzie padobna da taho, byccam my znoŭku adkryli płanietu», — dadaŭ jon.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary