«Čałaviek byŭ hatovy na ŭsio, kab heta spyniłasia». Advakat — pra «vykryvalnyja» videa

Michaił Kiryluk, advakat, pazbaŭleny ŭ Biełarusi licenzii, kaža, što ŭ svajoj praktycy čuŭ ad źniavolenych śviedčańni ab katavańniach.

— Ja asabista viedaju čałavieka, jakomu ŭ vypadku admovy ad supracoŭnictva ŭ SIZA ŭ Biełarusi pahražali hrupavym zhvałtavańniem jaho blizkaha čałavieka. Inšaha jaho blizkaha pahražali «vypadkova źbić aŭtamabilem». I pakolki da momantu pahroz majho padabaronnaha źbivali, jon całkam abhruntavana ličyŭ hetuju pahrozu realistyčnaj, — kaža advakat.

Inšy jaho padabaronny, zastajučysia z advakatam sam-nasam, šeptam paviedamlaŭ, što «jaho bili sutki zapar u śpiecyjalnym hukaizalavanym pakoi», ale prasiŭ abaroncu nie vydavać hetuju infarmacyju, bajučysia, što jaje apubličvańnie naškodzić.

— Miarkujučy pa jaho tvary, čałaviek byŭ hatovy na ŭsio, tolki b toje, što ź im adbyvałasia, spyniłasia.

Pa słovach Michaiła Kiryluka, śledčy zajaŭlaŭ, što kali čałaviek nie budzie pryznavać vinu, atrymaje zamiest svajho biahučaha abvinavačvańnia bolš ciažkaje.

— Pačuŭšy takoje i razumiejučy, što pahroza zakrytaha suda i turemnaha terminu pa falšyvym abvinavačvańni moža być realizavanaja, ludzi mohuć pahadzicca na mnohaje, kab ablehčyć svaju dolu. Miarkujučy pa ŭsich źniešnich prykmietach, jakija ja baču ŭ pramovie, mimicy, reakcyjach Ramana [Pratasieviča], da jaho mahli ŭžyvać tyja ž samyja mietady, — dadaje Michaił Kiryluk. — Treba razumieć, što katavańniem, zhodna z art.128 KK źjaŭlajecca nie tolki fizičnaje ŭździejańnie, ale i sama pahroza jaho prymianieńnia da blizkich, kali čałaviek ličyć hetuju pahrozu realistyčnaj.

Źjaŭleńnie ŭ publičnaj prastory častak dopytu źniavolenych i intervju, razychodzicca z tym, što advakaty dajuć padpisku ab nierazhałošvańni i časam nie mohuć navat paviedamić, dzie znachodzicca ich padabaronny. Michaił Kiryluk adznačaje, što «tajamnica śledstva» nieabchodnaja dla taho, kab, naprykład, abvinavačany nie pieradaŭ patencyjnym saŭdzielnikam niejkuju infarmacyju. Taksama jaje ŭžyvajuć dla taho, kab vykanać pravy paciarpiełych, kali havorka idzie pra čyjości asabistaje žyćcio, ab pałavych złačynstvach, złačynstvach suprać niepaŭnaletnich.

— Adnak chiba ŭ spravie Pratasieviča i inšych spravach my bačym adpaviednaść vykarystańnia hetaj normy dziela hetaj mety? Dla mianie vidavočna, što norma vykarystoŭvajecca z zusim inšaj metaj, jakaja supiarečyć pryncypu spraviadlivaha razboru — z metaj abciažaryć advakatu akazańnie jurydyčnaj dapamohi zatrymanamu, z metaj abciažaryć znosiny rodnych z zatrymanym — i takim čynam, akazać na jaho cisk, — ličyć juryst.

• 0
• 0
• 0
• 0
• 0