Apazicyjny palityk i były deputat Dziarždumy RF Dźmitryj Hudkoŭ paviedamiŭ, što vyjechaŭ z Rasii va Ukrainu i nakiroŭvajecca ŭ Kijeŭ, piša VVS.
Hudkoŭ prachodzić padazravanym pa spravie ab niavypłacie pa damovie arendy. Sam jon nazyvaje pieraśled z boku rasijskich uładaŭ palityčnym.
«Padjazdžaju da Kijeva, dzie ŭ mianie daŭno zapłanavanyja sustrečy i efiry (siońnia — u Jaŭhiena Kisialova)», — napisaŭ Dźmitryj Hudkoŭ u svaim telehram-kanale.
«Niekalki blizkich krynic z atačeńnia Administracyi prezidenta paviedamili, što kali ja nie pakinu krainu, fejkavaja kryminalnaja sprava budzie praciahnutaja až da majho aryštu. Kali zastanusia, dadzienaja sankcyja vyrašyć pytańnie Hudkova «lubym sposabam», — paviedamiŭ palityk.
Jon płanuje dabracca da bałharskaj Varny, dzie znachodziacca jaho baćki, a pra dalejšyja płany raskaža paźniej.
Hudkova i jaho ciotku zatrymali 1 červienia, im inkryminujuć pryčynieńnie majomasnaha ŭronu ŭ vyhladzie niavypłaty doŭhu pa damovie arendy niežyłoha pamiaškańnia.
Sprava tyčycca firmy baćkoŭ Hudkova, svajo dačynieńnie da jaje palityk admaŭlaje. Jaho pratrymali ŭ adździaleńni 48 hadzin, paśla čaho adpuścili, nie staŭšy abirać mieru strymańnia.
Jon i jaho ciotka znachodziacca ŭ statusie padazravanych.
Suma škody pa spravie ab niavypłacie arendy pieravyšaje miljon rasijskich rubloŭ (34 tysiačy biełaruskich). Takaja škoda pryznajecca asabliva bujnym pamieram.
Paśla sychodu ź Dziarždumy Dźmitryj Hudkoŭ staŭ adnym z najbolš prykmietnych apazicyjnych palitykaŭ u Maskvie. U pačatku krasavika jon paviedamiŭ, što znoŭ źbirajecca ŭziać udzieł u vybarach u nižniuju pałatu parłamienta i viadzie pieramovy ab vyłučeńni ad partyi «Jabłoko».
«Liču, što vysmaktanaja z palca «sprava ab padvale» była raspačataja vyklučna, kab nie dapuścić mianie na vybary i vycisnuć z krainy jak minimum da dnia hałasavańnia. Spadziajusia, što z maim adjezdam zaŭziataść žandaraŭ źnizicca», — prakamientavaŭ Hudkoŭ svoj adjezd z krainy.
Kamientary