Prezydent ZŠA Džo Bajden praciahnuŭ na hod dziejańnie persanalnych sankcyj u dačynieńni da kiraŭnictva Biełarusi, uviedzienych jašče ŭ 2006 hodzie, piša «Radyjo Svaboda» sa spasyłkaj na Bieły dom.
U pastanovie havorycca, što «dziejańni i palityka vyznačanych pradstaŭnikoŭ biełaruskaha kiraŭnictva i inšych asob praciahvajuć ujaŭlać niezvyčajnuju i nadzvyčajnuju pahrozu nacyjanalnaj biaśpiecy i zamiežnaj palitycy ZŠA». Pavodle Bajdena, jany taksama «padryvajuć demakratyčnyja pracesy i instytuty ŭ Biełarusi».
Prezydent ZŠA zajaviŭ pra «parušeńni pravoŭ čałavieka, źviazanyja z palityčnymi represijami, u tym liku z zatrymańniami i źniknieńniami [ludziej], a taksama z karupcyjaj i niepravamiernym vykarystańniem dziaržaŭnaj majomaści i złoŭžyvańnia paŭnamoctvami».
Ukazam blakujecca ŭłasnaść i prava na ŭłasnaść u ZŠA, rachunki i mahčymaść finansavych aperacyj 10 asobaŭ: prezydenta krainy, sakratara Rady biaśpieki, ministra justycyi i ŭnutranych spraŭ, staršyni KDB, kiraŭnika Centralnaj vybarčaj kamisii, kiraŭnika dziaržaŭnaha telebačańnia i radyjo dy inšych.
Upieršyniu hety ŭkaz źjaviŭsia ŭ červieni 2006 hoda — jak adkaz na sfalsyfikavanyja vybary prezydenta Biełarusi i zadušeńnie mirnych pratestaŭ.
3 červienia ŭstupili ŭ siłu sankcyi ZŠA suprać dzieviaci biełaruskich pradpryjemstvaŭ.
Kamientary