Były kamandujučy baśnijskich sierbaŭ Ratka Mładzič prajhraŭ apielacyju pa prysudzie 2017 hoda za hienacyd, vajennyja złačynstvy i złačynstvy suprać čałaviectva, piša VVS.
Sud AAN padtrymaŭ pažyćciovaje źniavoleńnie za jaho rolu ŭ zabojstvie kala 8000 baśnijskich musulman — mužčyn i chłopčykaŭ u Srebranicy ŭ 1995 hodzie.
Raźnia ŭ ankłavie, jaki pavinien byŭ znachodzicca pad abaronaj AAN, stała samaj žorstkaj u Jeŭropie z časoŭ Druhoj suśvietnaj vajny.
Apielacyjnaja kalehija ź piaci čałaviek pryjšła da vysnovy, što Mładzič nie padaŭ dokazaŭ, jakija b admianili papiarednija abvinavačvańni suprać jaho, choć jon vykazvaŭ niazhodu pa kožnym punkcie.
Mładzič, viadomy jak «baśnijski miaśnik», byŭ adnym z apošnich padazravanych, jakija paŭstali pierad sudom u Mižnarodnym kryminalnym trybunale AAN pa byłoj Juhasłavii. Jaho aryštavali ŭ 2011 hodzie paśla 16 hadoŭ pošukaŭ.
U 2017 hodzie jaho pryznali vinavatym u hienacydzie ŭ Srebranicy, ale apraŭdali pa hienacydzie padčas kampanii jaho vojska 1992 hoda, kali baśnijcaŭ i baśnijskich charvataŭ vysialali z damoŭ ci trymali ŭ žudasnych umovach.
Ratka Mładzič byŭ vykanaŭcam palityčnaj zmovy, raspracavanaj naviersie, metaj jakoj było źniščyć častku musulmanskaha nasielnictva Bośnii.
Etničnyja čystki pačalisia ź pieraśledaŭ — prapahanda nastrojvała susiedziaŭ adno suprać adnaho — i dla tysiač ludziej zaviaršylisia, kali ludzi Ratka Mładziča zachapili bazu AAN u Patakary, jakaja pavinna być biaśpiečnaj zonaj.
Prakurory spadziajucca, što hety praces stanie sihnałam, jaki čakajuć u rehijonie i za jaho miežami, — što zatrymka pravasudździa nie aznačaje adsutnaści pravasudździa.
Na praciahu ŭsiaho pracesu Mładzič byŭ dziorzkim i napadaŭ jak na sud, tak i na prakurora.
Pa Srebranicy jon skazaŭ, što padpisaŭ pahadnieńnie z vojskam baśnijskich musulman ab abaronie ludziej tam i na inšych terytoryjach, i zajaviŭ, što jon nie vinavaty ŭ parušeńniach u hetych biaśpiečnych zonach.
Vajna ŭ Bośnii była samym kryvavym kanfliktam na terytoryi byłoj Juhasłavii, pakolki ŭ etničnym i relihijnym płanie kraina była najbolš padzielenaj.
Padraździaleńni armii Juhasłavii, vyviedzienyja z Charvatyi i pierajmienavanyja ŭ vojska baśnijskich sierbaŭ, zachapili bolšuju častku terytoryi Bośnii, dzie pieravažajuć sierby.
Bolš za miljon baśnijcaŭ i charvataŭ byli vyhnanyja z damoŭ padčas čystak, ad jakich paciarpieli i sierby. Na momant zakančeńnia vajny ŭ 1995 hodzie było zabita pa mienšaj miery 100 000 čałaviek.
Z 1995 hoda Mładzič chavaŭsia. Urešcie jaho vysačyli i aryštavali ŭ domie kuziena na poŭnačy Sierbii.
Kamientary