Pryncypovaha hrodzienskaha jepiskapa Arciemija adpravili ŭ adstaŭku
8 červienia adbyŭsia sinod Biełaruskaj pravasłaŭnaj carkvy.
U suchim aficyjnym paviedamleńni havorycca: «Sinod razhladzieŭ ciakučyja pytańni žyćcia BPC i pryniaŭ šerah rašeńniaŭ».
Adzin z telehram-kanałaŭ, jaki śpiecyjalizujecca na źlivach śpiecsłužbaŭ, paviedamlaje, što ŭ čas pracy sinoda było pryniataje rašeńnie adpravić u adstaŭku archijepiskapa Hrodzienskaha i Vaŭkavyskaha Arciemija (u śvieckim žyćci Alaksandr Kiščanka).
My spytali ŭ pres-sakratara BPC ijeramanacha Afanasija (Sakałova), ci praŭda heta. «Ja vam skažu adkryta i biez chitrykaŭ: ja nie viedaju. Na siońniašni momant nichto vam nie zmoža hetuju infarmacyju ni paćvierdzić, ni abvierhnuć. Biełaruski sinod prymaje rašeńni, ale ahałošanyja jany mohuć tolki paśla taho, jak ich razhledzić patryjarch.
Byvali vypadki ŭ historyi, kali naš sinod prymaŭ peŭnyja rašeńni, ale jany nie byli zaćvierdžanyja», — kaža ijeramanach Afanasij.
Jon dadaje, što navat kali takoje rašeńnie raptam było pryniataje, to archijepiskap Arciemij usio adno pakul vykonvaje svaje funkcyi pa kiravańni jeparchijaj, da pryniaćcia rašeńnia ŭ Maskvie ničoha mianiacca nie budzie.
Pres-sakratar Hrodzienskaj jeparchii dyjakan Dźmitryj Paŭlukievič skazaŭ «NN» prykładna toje samaje. Pavodle jahonaj infarmacyi, RPC razhledzić žurnały pasiadžeńnia biełaruskaha sinoda kala 17 červienia.
Archijepiskapu Arciemiju 69 hadoŭ. Jon rodam ź Minska. Vučyŭsia ŭ Leninhradskaj duchoŭnaj sieminaryi. Słužyŭ śviatarom u Karelii. U 1982 hodzie viarnuŭsia ŭ Biełaruś. U 1996 hodzie pastryžany ŭ manastva. U toj ža hod staŭ jepiskapam Hrodzienskim i Vaŭkavyskim.
Archijepiskap Arciemii adznačyŭsia pryncypovaj pazicyjaj padčas prezidenckich vybaraŭ 2020 hoda. Na słužbie 16 žniŭnia jon kazaŭ:
«Vam na kaleniach treba stajać, za ŭsie falsifikacyi, za tuju chłuśniu». Užo sioleta jon havaryŭ, što «carkva nie pavinna być abyjakavaj, maŭčańniem pradajecca Boh». Pazicyja archijepiskapa Arciemija nie padabałasia mnohim pradstaŭnikam ułady.
***
U Maskvie 9 červienia terminova sabraŭsia sinod RPC, kab razhledzieć pytańnie ŭładyki Arciemija. U vyniku ijerarch byŭ «adpraŭleny na pakoj pa stanie zdaroŭja». Ciapier jon budzie žyć u Minsku.
Novym jepiskapam u Hrodnie staŭ 41-hadovy Antonij (śvieckaje imia Dzianis Daronin), jaki da hetaha byŭ jepiskapam Słuckim i Salihorskim.
Kamientary