Pažar u kaściole ŭ Budsłavie zdaryŭsia roŭna miesiac tamu, 11 maja. Dach Nacyjanalnaha sanktuaryja Maci Božaj Budsłaŭskaj byŭ całkam źniščany pažaram — ad jaho zastałosia tolki vuholle.
Płošča dachu — 1816 kv.m. Pakryć jaje drevam tak, jak heta było da pažaru, chutka niemahčyma, tamu zaraz viaducca pracy pa ŭstalavańni časovaha dachu ź mietału, paviedamili ŭ parafii.
Probašč Dźmitryj Dubovik raspavioŭ, što samym ciažkim byŭ pieršy tydzień paśla zdareńnia.
— Išli mocnyja daždžy i vielmi surjozna zalivali sklapieńni kaścioła. Ciapier usio padsychaje, a my robim časovy dach. Sumiesna ź inžynierami taksama prydumali sistemu, jakaja dapamahaje advieści na vulicu vadu, jakaja zaliłasia u kaścioł.
Paśla pažaru adno z samych prablemnych miescaŭ u kaściole — kupał z cehły: jość ryzyka, što jon moža asypacca.
— Inžyniery raźličvajuć, jak zrabić strachoŭku dla hetaha kupała, jakaja dapamoža jaho umacavać. Mienavita z-za kupała uvachod u kaścioł zaraz zabaronieny dla ŭsich žadajučych. Znachodzicca ŭ chramie možna tolki tym, chto prymaje ŭdzieł u supraćavaryjnych pracach, — tłumačyć ksiondz. — U nas jość stary nievialiki kaścioł z asobnym uvachodam, ale i tudy uvachod zakryty. My nie majem prava zapuścić ludziej, pakul nie budzie poŭnaj upeŭnienaści ŭ biaśpiecy.
U pieršy dzień paśla pažaru byŭ adkryty zbor srodkaŭ na adnaŭleńnie kaścioła. Na 10 červienia sabrana 734 896 rub. Zbor praciahvajecca. Dapamahać kaściołu taksama pryjazdžajuć vałanciory sa ŭsioj Biełarusi, byli navat pamočniki z Bresta i Homiela.
— Žadajučych dapamahčy nasamreč šmat. I vałanciory, i parafijanie zrabili davoli vialiki kavałak pracy na pačatku. Alpinisty skidali zharełyja kanstrukcyi, što zastavalisia źvierchu, sabrałasia kala 10 pryčepaŭ vuholla, razam my praciahvajem rabić ich sarciroŭku. Adnak samaje składanaje pačynajecca zaraz, kali nieadkładnyja pracy zakančvajucca i pačynajucca zvyčajnyja, źviazanyja z dakumientami, z tym, što treba šukać roznych padradčykaŭ.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary