Kažuć, hetaja žančyna staić za pośpiecham najlepšaha futbalista Polščy
Žonka hoda.
U Robierta Levandoŭskaha — biezumoŭna, najlepšaha polskaha hulca apošnich časoŭ — nie ŭsio atrymlivajecca ŭ hulniach za zbornuju. Tym bolš značnym staŭ dla hulca «Bavaryi» miač, jaki jon, Levandoŭski, zabiŭ za kamandu ŭ subotniaj hulni ź Ispanijaj. Hoł Robierta na 54 chvilinie hulni vyratavaŭ dla palakaŭ ničyju i zachavaŭ dla kamandy šansy na vychad u płej-of turnira.
Ale siońnia havorka pojdzie nie pra Robierta, a pra jaho vybitnuju žonku — Annu Levandoŭskuju. Pa źviestkach, mienavita jana staić za pośpiecham zornaha futbalista, uładalnika šmatlikich uznaharod i adnaho z najlepšych napadajučych śvietu.
Anna — prafiesijnaja karatystka, uładalnica šmatlikich miedaloŭ na čempijanatach svajoj krainy, pieršynstvach Jeŭropy i śvietu. Jana skončyła varšaŭskuju Akademiju fizičnaj adukacyi, dzie i paznajomiłasia ŭ 2007 hodzie z Robiertam. Levandoŭski ŭ toj čas hulaŭ za nievialiki polski kłub «Źnič», jaki ŭsio nijak nie moh zamacavacca ŭ druhoj lizie polskaha futboła.
Anna i Robiert ažanilisia ŭ 2013 hodzie, u ich dźvie dački: čatyrochhadovaja Kłara i adnahadovaja Łaŭra. Ich siamju ŭ Polščy ličać uzornaj, bo ciažka znajści źviestki pra niejkija skandały z udziełam Levandoŭskich.
Bolš za toje, Anna i Robiert aktyŭna achviarujuć hrošy na dabračynnaść. Naprykład, u žniŭni 2018 hoda Levandoŭskija sabrali dla Dziciačaha miemaryjalnaha instytuta zdaroŭja ŭ Varšavie bolš za 150 tysiač złotych, a ŭ sakaviku minułaha hoda jany pieraličyli miljon jeŭra na baraćbu z kavidam.
Sama Anna taksama časam karystajecca mahčymaściami sacsietak, kab pryciahnuć uvahu dla dabračynnych inicyjatyŭ. Da jaje prysłuchoŭvajucca, bo Levandoŭskaja — nie prosta žonka viadomaha futbalista, ale i viadomaja trenierka i dyjetołah. Jašče ŭ 2012 hodzie Anna abaraniła dysiertacyju pa temie charčavańnia. Atrymaŭšy dypłom dyjetołaha, dziaŭčyna zapuściła ŭłasny błoh Healthy Plan by Ann z paradami pa charčavańni i treniroŭkach.
Zaraz u Levandoŭskaj užo niekalki biznesaŭ: bijadadatki, naturalnyja charčovyja pradukty, linija kaśmietyki, hatovaje dyjetyčnaje charčavańnie. Napeŭna, jaje hałoŭny prajekt — mabilny dadatak Diet and Training by Ann z płanami trenirovak i pravilnaha charčavańnia, u jakoha ŭžo bolš za dva miljony karystalnikaŭ. A taksama bolš za try miljony padpisčykaŭ u sietcy Instahram, dzie isnujuć navat fan-kłuby hałoŭnaj spartovaj siamji Polščy.
Viadoma, što Robiert Levandoŭski — ledźvie nie hałoŭny klijent svajoj zornaj žonki-trenierki. Naprykład, dziakujučy sumiesnym zaniatkam karate Robiert zdoleŭ cudoŭna adpracavać hulniu vierchniaj častkaj cieła, što dapamahaje jamu vyjhravać baraćbu za vierchavyja miačy.
Anna prydumała dla muža naturalny izataničny napoj — jak śćviardžajuć, jon nadaje siły. Recept adnosna prosty: čatyry stałovyja łyžki miodu, 300 mililitraŭ kakosavaj vady, 600 mililitraŭ prostaj vady, sok adnaho łajma i čajnaja łyžka marskoj soli. Spadarynia Levandoŭskaja taksama dapamahła raspracavać dla muža vielmi strohuju dyjetu. Robiert nie ŭžyvaje karovinaje i sojevaje małako, ałkahol i pradukty, u składzie jakich jość muka, jon značna skaraciŭ užyvańnie cukru i vysokakałaryjnaj ježy.
U sacsietkach Anny chapaje fota z sumiesnych trenirovak u trenažornaj zali razam z Robiertam. Časam futbalist navat udzielničaje ŭ adkrytych treniroŭkach, jakija Anna ładzić praź Internet. Trenierka sočyć za tym, kab jaje muž dobra vysypaŭsia, bo heta dapamahaje spartoŭcu adnaŭlacca paśla nahruzak, i tamu, jak pišuć, u ich spalni zaŭsiody idealnaja ciemra.
Voś taki prykład padtrymki ad zornaj polskaj siamji.
Kamientary