U Sankt-Pieciarburhu zahinuła viadomaja ŭ minskaj tusoŭcy Julija Sakałova: vierahodna, suicyd
39-hadovaja Julija Sakałova zahinuła ŭ rasijskim horadzie na minułych vychodnych. Cieła znajšli kala doma, mierkavana, žančyna vykinułasia z akna.
Julija žyła ŭ Pieciarburhu kala troch hadoŭ. Źjechała tudy da svajho maładoha čałavieka. Jana zajmałasia prodažam damienaŭ, a taksama niejkaj pracaj ź internet-kramami, kažuć znajomyja Julii. Tamu finansavych prablem u Sakałovaj nie było.
«Jana była vielmi viadomaja ŭ minskaj tusoŭcy. Taksama aktyŭna viała fejsbuk, šmat chto viedaŭ jaje mienavita praz dopisy. Ale ž ciapier ź jaje asnoŭnaj staronkaj zdaryłasia štości niezrazumiełaje — vyhladaje, što sama Julija jaje vydaliła. Dastupny tolki druhi akaŭnt, jaki jana stvaryła na momanty, kali asnoŭny baniać», — kažuć siabry Sakałovaj.
Ramualda Juchnievič niadaŭna była ŭ Pieciarburhu i bačyłasia ź Julijaj. Jana raskazvaje:
«Viedaju, što ŭ Juli byli prablemy z chłopcam, jana chvalavałasia na hetuju temu, ale «takich» nastrojaŭ u jaje ja nie zaŭvažyła. Jana była viasiołaja, usio było dobra, nie vykazvała niejkich suicydalnych dumak».
«Julija lubiła prykoły, niejki trolinh. Kali žyła ŭ Minsku, to pastajanna źbirała ŭ siabie ludziej, byli niejkija tusoŭki, viečaryny. U jaje pa žyćci byŭ taki nastroj, što, niahledziačy na składanaści, zdavałasia, jana zaŭsiody prarviecca. Umieła znachodzić vychady ź lubych žyćciovych situacyj.
Julija — taki čałaviek, jaki moh, chutčej, vykinuć niešta epatažnaje. Chutčej ja by pavieryła, kali b jana voś tak z usich prykałołasia. Jana była niezvyčajnym čałaviekam, z aryhinalnymi dumkami. Tamu toje, što zdaryłasia, u mianie nie ŭkładvajecca ŭ hałavie»,— kaža Jaŭhienija Ciulenieva, blizkaja znajomaja Sakałovaj.
Jašče adzin blizki siabar Julii kaža: heta dakładna byŭ suicyd.
«Ciapier čakajem vynikaŭ ekśpiertyzaŭ, ale ja ŭpeŭnieny, što heta samahubstva. Raniej u Julii zdaralisia prablemy psichałahičnaha charaktaru. I ciapier u jaje ŭźnikli prablemy ŭ pryvatnym žyćci. Pryčyn moža być niekalki, kaniečnie, ale pakul vyhladaje, što asnoŭnaja — stasunki z maładym čałaviekam, — raskazvaje siabar Julii. —
Apošni čałaviek, ź im havaryła Julija, heta była jaje mama. Ranicaj u 7:32 jany pahavaryli z mamaj, i paśla ŭsio»
«Jana była vielmi i vielmi zapatrabavany čałaviek, u žniŭni jana zrabiła dla Biełarusi vielmi šmat, jana prosta hieroj hramadzianskaha supracivu. Na žal, padrabiaźniej pakul nie mahu kazać», — zhadvaje Sakałovu siabar.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary