Kiraŭnik Jeŭrapiejskaj rady: Vyzvalicie ŭsich palityčnych źniavolenych, spynicie represii, pačnicie dyjałoh
Kiraŭnik Jeŭrapiejskaj rady Šarl Mišel źviarnuŭsia da biełaruskich uładaŭ z karotkim pasłańniem.
«Siońnia ES pasyłaje jašče adzin mocny sihnał padtrymki narodu Biełarusi, uvodziačy dalejšyja abmiežavalnyja miery», — napisaŭ jon.
«Naša pasłańnie režymu Łukašenki nielha zrazumieć inakš, — adznačyŭ Šarl Mišel. — Vyzvalicie ŭsich palityčnych źniavolenych. Spynicie dalejšyja represii. Pačnicie inkluziŭny nacyjanalny dyjałoh», — zaklikaŭ jon.
Pad «inkluziŭnym» razumiejecca dyjałoh z udziełam apazicyi, a nie jaho imitacyja z Vaskrasienskim, Hajdukievičam i t. p.
Jeŭrapiejskija infarmacyjnyja ahienctvy paviedamlajuć, što krainy Jeŭrasajuza ŭzhadnili sankcyi suprać Biełarusi ŭ naftahazavaj śfiery, bankaŭskaj halinie i vytvorčaści kalijnych uhnajeńniaŭ. Uzhodnienaja zabarona na vydaču Biełarusi kredytaŭ, handal kaštoŭnymi papierami i inviestycyjnyja pasłuhi.
Upieršyniu suprać Biełarusi buduć uviedzienyja siektaralnyja sankcyi. Raniej abmiežavalnyja miery ES nasili pieravažna simvaličny charaktar vizavych sankcyj.
Adnosiny Biełarusi i krain Jeŭrasajuza rezka pahoršali paśla vybaraŭ 2020 hoda, jakija supravadžalisia aryštami spačatku palityčnych apanientaŭ Alaksandra Łukašenki, a paśla i demanstrantaŭ, jakija patrabavali rasśledavańnia vybarčych falsifikacyj.
U Biełarusi narastała antyzachodniaja prapahanda, a niekatorych palityčnych praciŭnikaŭ uładaŭ, jakija znajšli prytułak u krainach ES, Minsk abviaściŭ terarystami.
Adnosiny Biełarusi z krainami ES dasiahnuli najnižejšaha punktu paśla zabarony partała Tut.by 18 maja i pasadki samalota kampanii «Rajanejr» u Minsku 23 maja. U Jeŭropie hety incydent nazvali «aktam dziaržaŭnaha teraryzmu» i paabiacali chutki i strohi adkaz.
Minsk pahražaŭ adkazać ekanamičnymi mierami suprać jeŭrapiejskaha biznesu. Ministr zamiežnych spraŭ Biełarusi Uładzimir Makiej taksama namiakaŭ, što pad udaram akažacca hramadzianskaja supolnaść Biełarusi i zaklikaŭ Zachad «adumacca».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary