Bolš za 74 tysiačy rubloŭ: u asudžanych palitviaźniaŭ pačali patrabavać kampiensacyju za «pierakryćcio daroh» na pratestach

Sudy ź Lavonam Chałatranam i Arciomam Saŭčukom

21 červienia ŭ sudzie Frunzienskaha rajona razhladali hramadzianskija pazovy pieršaha namieśnika prakurora Minska ŭ intaresach «Minsktransa» da palitźniavolenych Lavona Chałatrana i Arcioma Saŭčuka ab «kampiensacyi majomasnaj škody naniesienaj złačynstvam». Lavon 13 červienia pačaŭ adbyvać pakarańnie pa č.1 art. 342 KK — 2 hady «chimii» ŭ vioscy Suški ŭ Bresckaj vobłaści. Arciom adbyvaje pakarańnie pa č.2 art. 293 KK (udzieł u masavych biesparadkach) — 4 hady ŭzmocnienaha režymu ŭ škłoŭskaj kałonii №17.

Spravy palitviaźniaŭ siońnia razhladaŭ sudździa Mikałaj Bahamiakaŭ. Pazoŭ da Arcioma składaje 21 839 rubloŭ, da Lavona — 6 126 rubloŭ. Sam Lavon na pracesie prysutničać nie moh, bo adbyvaje pakarańnie. Ale potym prakamientavaŭ hety sud:

«Heta hramadzianski pazoŭ, jon vyviedzieny z kryminalnaj spravy. U majoj kryminalnaj spravie niama nivodnaha dokazu majoj viny, u tym liku znachodžańnia mianie na prajeznaj častcy, błakavańnia vulicy. Razam z tym jość dokaz taho, što ŭ 01:44 ja ździajśniaŭ zvanok zusim ź inšaha miesca. A z budynka na vulicu ja vyjšaŭ nie raniej za 01:30, heta značyć značna paźniej taho, jak transpart Minsktransa skončyŭ svaju pracu.

Tym nie mienš u prysudzie pa kryminalnaj spravie «ustanoŭlena», što ja byŭ na skryžavańni z 23:06 da 02:00. Mabyć, dla taho, kab pazoŭ ad Minsktransa byŭ zadavoleny».

U vyniku, sud pa spravie Chałatrana nie adbyŭsia siońnia. Sudździa Bahamiakaŭ abjadnaŭ jaho spravu ź inšym palitviaźniem Siarhiejem Brylom, asudžanym pa č.1 art. 342 KK na 3 hady «chimii». Razhlad pazova pieranakiravany ŭ sud Zavodskaha rajona — čas pakul nieviadomy.

Spravu Arcioma Saŭčuka pačali razhladać taksama 21 červienia, ale potym abviaścili pierapynak na miesiac — da 20 lipienia.

Sud z Arciomam Chvaščeŭskim

Taksama viadoma, što 7 i 16 červienia razhladali anałahičny pazoŭ da palitźniavolenaha Arcioma Chvaščeŭskaha, ale jahonamu advakatu pra heta nie paviedamili. Paviedamleńnie adpravili ŭ kałoniju samomu Chvaščeŭskamu, ale jahony list, dzie jon raspaviadaje heta rodnym, pryjšoŭ dadomu tolki praz try tydni, kali sud užo adbyŭsia.

U vyniku, razhlad spravy pieranieśli ŭ sud Savieckaha rajona. Arciom adbyvaje pakarańnie pa č.1 art. 342 KK — 1 hod u navapołackaj kałonii №1. Suma pazova da jaho składaje kampiensacyju ŭ pamiery 21 832 rubloŭ.

Sud ź Iharam Pražeńnikavym

Praz dva dni, 23 čevrienia, u sudzie Frunzienskaha rajona Minska razhladali čarhovuju hramadzianskuju spravu ŭ intaresach «Minsktransa» da palitźniavolenaha Ihara Pražeńnikava ab «kampiensacyi majomasnaj škody naniesienaj złačynstvam». 17 lutaha sud Frunzienskaha rajona Minska asudziŭ 21-hadovaha Ihara Pražeńnikava da 1,5 hadoŭ kałonii ahulnaha režymu.

Spravu palitviaźnia razhladaŭ sudździa Mikałaj Bahamiakaŭ. Pazoŭ da Ihara składaje 18 624,45 rubloŭ. U abvinavačvańni skazana, što 4 kastryčnika minułaha hoda ŭ Minsku «škoda była naniesienaja z-za prastoju transpartu ŭ vyniku supraćpraŭnych dziejańniaŭ Pražeńnikava». Ale advakat nastojvaje na tym, što abvinavačany nie znachodziŭsia ŭsie 3,5 hadziny na prajeznaj častcy. Pradstaŭnica «Minsktransu» na sudzie była aznajomlenaja z materyjałami kryminalnaj spravy, tamu hublałasia pry adkazach na pytańni sudździ.

Sudździa Bahamiakoŭ zapatrabavaŭ ad pazoŭnika da nastupnaha suda kartu ŭsich maršrutaŭ, kab udakładnić, jak abvinavačany moh być datyčny da ich prastoju. Sudździa zadavoliŭ chadajnictva advakata ab tym, kab pryciahnuć suadkaźnikaŭ, bo dziejańni byli ździejśnienyja ŭ hrupie asob. Pa papiaredniaj infarmacyi, suadkaźnikami pa hetaj spravie taksama źjaŭlajucca palitviaźni Jaŭhien Dźmitryjeŭ, Mikita Ihnaciuk, Kirył Paŭłaviec, Dzianis Dziomuch.

U spravie Ihara Pražeńnikava abvieščany pierapynak da 16 lipienia.

Sud ź Ivanam Krasoŭskim 

25 červienia ŭ sudzie Savieckaha rajona razhladali hramadzianski pazoŭ namieśnika prakurora Minska ŭ intaresach «Minskatransa» da aktyvista anarchisckaha ruchu Ivana Krasoŭskaha. Hetuju spravu razhladała Maryja Laškievič.

19 lutaha sud Savieckaha rajona vynies prysud Ivanu Krasoŭskamu: try hady abmiežavańnia voli z nakirovańniem u papraŭčuju ŭstanovu adkrytaha typu — «chimii». Chłopca vyzvalili ŭ zali suda i pakul jaho nie nakiravali dla adbyćcia pakarańnia.

Pa abvinavačvańni, ŭ noč z 10 na 11 žniŭnia 2020 hoda kala HC «Ryha» Krasoŭski «padčas niezakonnaha masavaha mierapryjemstva publična vykrykvaŭ łozunhi, błakavaŭ ruch transpartu šlacham pierakryćcia prajeznaj častki. Heta paciahnuła doŭhaje parušeńnie hramadskaha spakoju, stvaryła pieraškody dla narmalnaj pracy transpartu na praciahu 5 hadzin na vulicy Surhanava, čym było abmiežavana prava inšych hramadzian na spakojnuju pracu, adpačynak i svabodnaje pieramiaščeńnie. U vyniku dziejańniaŭ abvinavačanaha majomaści KTUP «Minsktrans» naniesienaja škoda na sumu bolš za 5,6 tys. rubloŭ.

• 0
• 0
• 0
• 0
• 0
• 0
• 0
• 0