Ambasadarka ZŠA: ZŠA vielmi niepakojać i pahrozy Łukašenki, i jahonyja dziejańni ŭ styli złačyncaŭ

— Spadarynia ambasadar, ja rady znoŭ vas vitać u našaj studyi. 21 červienia ZŠA ŭviali novyja ekanamičnyja sankcyi suprać biełaruskaha režymu. Padčas našaj apošniaj razmovy vy skazali, što Zachad musiŭ razmaŭlać z Łukašenkam na toj movie, jakuju jon razumieje. Ci pravilna ja dumaju: sankcyi, jakija ŭviali ŭ paniadziełak, byli prykładam takoj razmovy?

— Vialiki dziakuj, mnie taksama pryjemna znoŭ być u studyi «Biełsatu». Nakont našych dziejańniaŭ u paniadziełak — tak, ich možna ličyć prajavaj takoj movy, heta častka taho, što my sprabujem danieści da mienskich uładaŭ. Adkaz na vašaje pytańnie — tak, niesumnienna. I ja spadziajusia, što ŭ Miensku nas pačuli. Heta byŭ vielmi dakładny mesidž ad Jeŭrapiejskaha Źviazu, jaho dziaržavaŭ-čalcoŭ, ad Złučanych Štataŭ Amieryki, ad Kanady, Abjadnanaha Karaleŭstva — my rašuča asudžajem prymusovuju pasadku rejsu «RajanEjr» («Ryanair»), metaj jakoj byŭ aryšt Ramana Pratasieviča i Sofji Sapiehi.

— A što kali Łukašenka vyzvalić amal usich abo ŭsich palitviaźniaŭ? Jon vykarystoŭvaŭ hetuju hulniovuju kartu šmat razoŭ. Jakoj była b reakcyja Złučanych Štataŭ u takim vypadku?

— Ja dumaju, Złučanyja Štaty vielmi jasna zaznačyli, čaho my čakajem ad režymu. My čakajem vyzvaleńnia ŭsich palitviaźniaŭ. Ich kolkaść, na žal, niaźmienna raście kožny dzień, i heta žachliva. Mała taho, što niama ruchu ŭ patrebnym kirunku, dyk my jašče nazirajem, jak režym idzie ŭ niapravilnym kirunku ŭ pytańni palitviaźniaŭ. My vyrazna zaklikali režym pačać nacyjanalny dyjałoh z udziełam usich bakoŭ, vynikam jakoha byli b novyja vybary, jakija možna było b pravieści ź mižnarodnym padtrymańniem. Voś nieabchodnyja kroki. I my vielmi dakładna akreślili našyja čakańni dy našuju pazicyju.

— Ale kali jany vypuściać častku palitviaźniaŭ, ci źniziać ZŠA palityčny cisk na Łukašenku?

— Ja chaču padkreślić toje, što mnie padajecca važnym. Kožny palitviazień, kožny z tych piacisot — heta sam čałaviek, jahonaja siamja, addanaść niejkaj dziejnaści, naprykład, niezaležnaj žurnalistycy ci inšaj prafiesii. Ja nie chaču niedaaceńvać značeńnia vyzvaleńnia dla asoby ci jahonaj siamji. Ja nie dumaju, što Złučanyja Štaty źmienšać cisk, i ja dakładna nie čakaju, što buduć takija dziejańni da momantu vyzvaleńnia ŭsich palityčnych viaźniaŭ, da ŭdziełu ŭ sapraŭdnym usiebakovym dyjałohu i ruchu da novych vybaraŭ.

— My bačym, što režym u Miensku pahražaje zachodnim krainam narkatrafikam i nielehalnaj mihracyjaj. Viadoma, što apošnim časam na polskich i litoŭskich miežach kolkaść nielehalnych mihrantaŭ, pieravažna hramadzianaŭ Iraku, vyrasła ŭ niekalki razoŭ. Mahčyma, heta prosta supadzieńnie, ale kolkaść rejsaŭ z Bahdadu ŭ Miensk taksama padvoiłasia. Heta chvaluje ZŠA? Ci heta prablema tolki dla JEZ?

— ZŠA vielmi niepakojać i pahrozy Łukašenki, i jahonyja dziejańni ŭ styli złačyncaŭ, z dapamohaj jakich jon sprabuje psavać žyćcio susiedziam. Heta niepryjemna ździŭlaje, bo hety čałaviek u minułym nieadnarazova śćviardžaŭ, byccam škaduje, što adnosiny z susiedziami nie vielmi dobryja, što jon maje mahčymaść źviarnucca [pa dapamohu] tolki ŭ adnu stalicu [da adnaho z susiedziaŭ]. Vielmi niepryjemna toje, što jahonyja pahrozy susiedziam robiacca bolš pramymi. Nas vielmi chvaluje toje, što adbyvajecca na miežach našych sajuźnikaŭ u rehijonie i našaha partniora, Ukrainy. Adnosna taho, što adbyvajecca na miažy, my vielmi ciesna supracoŭničajem ź Vilniaju dy Varšavaj. I my budziem praciahvać heta rabić. My budziem šukać sposaby ŭzmacnić našuju supracu, praces kaardynacyi i abmienu infarmacyjaj, kab dapamahčy źnivielavać hetyja pahrozy. Niesumnienna, biaśpieka miežaŭ JEZ — heta pytańnie, jakoje ŭ pieršuju čarhu zastajecca prablemaj JEZ i jaje dziaržavaŭ-čalcoŭ, ale kali jany šukajuć padtrymki ZŠA ŭ hetych pytańniach, to viadoma, my vielmi surjozna stavimsia da taho, što tam adbyvajecca.

— Spadarynia ambasadar, ciapier my bačym, jak Łukašenka šantažuje Zachad mihrantami, narkotykami dy navat jadravymi kampanientami! Ja pracytuju: «Až z-za Atłantyki čutny sihnał: dapamažycie, jak heta było raniej, zatrymajcie jadravyja materyjały, kab jany nie trapili ŭ Jeŭropu. <…> Vy nas infarmacyjna dušycie, sprabujecie źniščyć našuju ekanomiku i čakajecie, što my budziem tracić sotni miljonaŭ dołaraŭ, jak i raniej, na abaronu vašych hieapalityčnych intaresaŭ?» Ci chtości z ZŠA pasyłaŭ Łukašenku taki «sihnał»?

— Ščyra skazać, ja nie viedaju, što jon mieŭ na ŭvazie. Jahonyja ŭčorašnija kamientary, jahonyja abvinavačvańni ŭ bok Zachadu byli šmat u čym biessensoŭnymi. U jaho vykazvańniach stolki niesupadzieńniaŭ i niedakładnaściaŭ, što vielmi ciažka ŭsio adsočvać. Ale kali jon chacieŭ by viedać, na kim adkaznaść, chto vinavaty ŭ paharšeńni ekanamičnych pierśpiektyvaŭ Biełarusi, to nie treba nikoha šukać, treba prosta pahladziecca va ŭłasnaje lusterka. Mienavita jahonyja dziejańni i jahony režym pryncypova źmianili budučyniu ekanomiki Biełarusi. Heta lohka — pakazvać na kahości za miažoju dy vinavacić inšych, ale značna składaniej — pahladzieć u svaim aharodzie i zrazumieć vyniki svaich dziejańniaŭ.

— Chaču spytać pra Rasieju. Ci možna niejkim čynam dać hetaj krainie vykarystać słabaść Biełarusi, jakaja apynułasia pad sankcyjami? Ci ZŠA pryznali b mižnarodnaje pahadnieńnie, padpisanaje Łukašenkam, i jakija-niebudź ekanamičnyja ŭhody, naprykład, prodaž «Biełaruśkaliju» rasiejskim aliharcham?

— Heta važnaje pytańnie ŭzajemaadnosinaŭ i razumieńnia dačynieńniaŭ pamiž Mienskam i Maskvoju. Viadoma, my zaŭvažyli, što kolkaść vizitaŭ Łukašenki ŭ Maskvu pavialičyłasia, ale ciažka vyjści za ramki dy zrazumieć, što mienavita tam prapanoŭvajecca, što dakładna abmiarkoŭvajecca. Kali havorka idzie pra Rasieju i jaje dziejańni, to, miarkuju, samaje asnoŭnaje — heta toje, jak na ich buduć reahavać žychary Biełarusi. Heta chiba vyznačalna. Samaje pryncypovaje — ci buduć hramadzianie Biełarusi ličyć zakonnymi lubyja pahadnieńni ab prodažy majomaści, pradpryjemstvaŭ Biełarusi, niejkija jurydyčnyja pahadnieńni, ci buduć jany pryznavać ich zakonnymi, bo mienavita heta musić chvalavać Maskvu: jak jana budzie vyhladać u vačach biełarusaŭ? Heta, na moj pohlad, najvažniejšaje.

— Miarkuju, vy viedajecie pra abmien mierkavańniami na sustrečy Pucina i Bajdena. U čym roźnica ŭ pazicyjach Vašynhtonu i Maskvy? My čuli dźvie viersii hetaj razmovy, adnu ad prezidenta Bajdena i adnu — zusim inšuju — ad spadara Pucina, a dakładniej, ad jahonaha pres-sakratara Dźmitryja Piaskova…

— Ja dumaju, važna źviarnuć uvahu na toje, što my čuli niepasredna ad prezidenta Bajdena adnosna dyskusii, pryśviečanaj Biełarusi. Liču, što isnuje zaŭvažnaja roźnica pamiž situacyjaj, kali lidar sam vyrašyŭ vykazacca ab hetym pytańni, i situacyjaj, kali heta robiać pres-sakratary. Prezident Bajden davoli kankretna vykazaŭsia adnosna niekatorych kankretnych pytańniaŭ. Toje, što ja sapraŭdy chaču padkreślić dla vašych hledačoŭ — heta słovy prezidenta Bajdena pra addanaść ZŠA spravie pravoŭ čałavieka i asnoŭnych svabodaŭ. Prezident Bajden skazaŭ, što amierykanski prezident nie moža nie padymać pytańnia ab pravach čałavieka i asnoŭnych svabodach. Heta nieadjemnaja častka nas, sutnaści nas jak amierykancaŭ, i heta abaviazak amierykanskaha prezidenta. Heta sapraŭdy śviedčyć pra toje, što my sprabujem zrabić u dačynieńni Biełarusi. Ja dumaju, što važna razhladać hetuju sustreču dvuch lidaraŭ u kantekście, važna pryznać, što ŭ ich było vielmi šmat pytańniaŭ na paradku dnia. Heta nie była sustreča, skiravanaja na pryniaćcie niejkaha rašeńnia ab hetych pytańniach. Heta była sustreča, jakuju ładzili dla taho, kab dva lidary abmianialisia mierkavańniami. I, u pryncypie, toje, da čaho my imkniemsia, kab hołas narodu Biełarusi byŭ pačuty. Ja liču, što pytańnie, jak pavodzicca, — nievierahodna važnaje, i taja rola, jakuju jany abiaruć dla siabie, — heta toje, što budzie vyznačać, jak ich usprymuć žychary Biełarusi.

— Za apošnija hady padtrymańnie ad ZŠA biełaruskaj hramadzianskaj supolnaści nie pieravysiła dziesiaci miljonaŭ dołaraŭ u paraŭnańni z bolš čym dvumastami miljonami dla Ukrainy. Navat maleńkaja Hruzija maje bolš dapamohi z boku Vašynhtonu. Ci vy razhladajecie mahčymaść pavialičyć padtrymańnie biełaruskaj hramadzianskaj supolnaści dy niezaležnych miedyjaŭ? Naprykład, ofis Śviatłany Cichanoŭskaj prapanoŭvaje pavialičyć padtrymańnie da tryccaci miljonaŭ. Ci heta mahčyma?

— Pa-pieršaje, z žniŭnia minułaha hoda my prapanavali dadatkovyja 20 miljonaŭ dołaraŭ dla hramadzianskaj supolnaści dy niezaležnych miedyjaŭ, sprabujučy znajści roznyja sposaby dapamahčy hramadzianskaj supolnaści paśla minułaha leta i źviazanaha ź im gvałtu suprać tych, chto byŭ vymušany biehčy ź Biełarusi. My robim heta, kaardynujučysia z našymi partniorami ŭ Litvie, Polščy, JEZ i hetak dalej. I jość pytańnie pra toje, jak heta paraŭnoŭvać z dapamohaj, jakaja nadajecca inšym krainam. Ja chacieła b paprasić vašych hledačoŭ uličyć, što my dapamahajem pieraadolvać roznyja prablemy, kankretnyja i śpiecyfičnyja dla Ukrainy, a taksama dla Hruzii. Ja b nie skazała, što «navat maleńkaja Hruzija» — heta najlepšy sposab apisać hetuju krainu. Jana važny partnior ZŠA z času atrymańnia niezaležnaści, i my kaardynujemsia i supracoŭničajem u cełym šerahu pytańniaŭ. Ja dumaju, što jašče šmat čaho možna zrabić, kab padtrymać Biełaruś i jaje pamknieńni. My zastajemsia ŭ ciesnym kantakcie sa spadaryniaj Cichanoŭskaju dy jejnaju kamandaju, kab zrazumieć, što my možam jašče zrabić na šlachu da bolš demakratyčnaj Biełarusi, kab raźvivać i raspracoŭvać hetyja idei. Ich pohlady i mierkavańni ab hetych pytańniach nadzvyčaj važnyja. My taksama pracujem z našymi partniorami ŭ Kanhresie, kab atrymać srodki, jakija b dapamahli ŭ hetaj spravie.

• 0
• 0
• 0
• 0
• 0
• 0
• 0
• 0