Lasny pažar źniščyŭ viosku ŭ Kanadzie, dzie była zafiksavanaja amal 50-hradusnaja śpiakota
Lasnyja pažary praktyčna całkam źniščyli nievialiki nasieleny punkt Łutan u pravincyi Brytanskaja Kałumbija, dzie na hetym tydni byŭ zafiksavany absalutny tempieraturny rekord u historyi Kanady — 49,6 hradusaŭ Celsija. Pra heta ŭ čaćvier paviedamiŭ telekanał CBC.
Pavodle źviestak supraćpažarnaj słužby rehijona, ahoń źniščyŭ 90% usich budynkaŭ vioski, u tym liku miedycynski punkt i palicejski ŭčastak. Nasieleny punkt u śpiešcy pakinuli kala tysiačy žycharoŭ, u jakich z-za imklivaha pašyreńnia ahniu na zbory było nie bolš za 15 chvilin. Palicyja paviedamlaje, što častka žycharoŭ dahetul nie vyjšła na suviaź.
U Brytanskaj Kałumbii bušujuć 26 lasnych pažaraŭ. Zahady na evakuacyju atrymali sotni chatnich haspadarak. Ab achviarach i paciarpiełych infarmacyi nie pastupała.
Z kanca minułaha tydnia ŭ pravincyjach Albierta, Brytanskaja Kałumbija, niekatorych rajonach pravincyi Saskačevan, a taksama ŭ paŭdniovych častkach arktyčnych terytoryj krainy — Jukona i Paŭnočna-Zachodnich terytoryj — ustalavałasia anamalnaja śpiakota. Słupki termomietraŭ tut dniom dasiahajuć adznaki 40-45 hradusaŭ. U niekatorych rajonach śpiakota pačała spadać u aŭtorak, ale ŭ šerahu miescaŭ pratrymajecca da kanca tydnia.
U sieradu paviedamlałasia, što ŭ Brytanskaj Kałumbii prynamsi 486 čałaviek mahli stać achviarami anamalnaj śpiakoty.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary