Zatrymanyja našaniŭcy. Volha Rakovič: asvoiła dajvinh, maryła skoknuć z parašutam

— Maci pracavała ŭ restaracyi, ale paśla pajšła na buchhałtarskija kursy, pieravučyłasia i niedzie z 25 hod akazvaje buchhałtarskija pasłuhi, — raskazvaje starejšaja dačka Kaciaryna. 

U Volhi, karennaj minčanki, troje rodnych dziaciej. Małodšamu synu — 16. Kali damoŭ pryjšli ź pieratrusam, syn byŭ u kvatery, ale jaho razam z baćkam paprasili syści. Im daviałosia čatyry hadziny prasiadzieć u čakańni ŭ dušnaj słužbovaj mašynie.

— Na vulicy stajała śpioka +33 hradusy, a my z 10 da 14 hadzin byli zapakavanyja ŭ aŭto. Kali nas vypuścili i my zajšli ŭ chatu, dyk ubačyli tam čakany verchał i niečakanuju adsutnaść maich, nakoplenych za 42 hady pracoŭnaha inžyniernaha stažu, asabistych źbieražeńniaŭ: 1,5 tysiačy dalaraŭ i 12 tysiač jeŭra, — raskazvaje muž Volhi Viktar Savicki.

Asvoiła dajvinh, maryła skoknuć z parašutam

Viktar paznajomiŭsia z Volhaj 27 hod tamu, dla jaje šlub ź im staŭ druhim. Mužčyna zhadvaje, što heta było kachańnie ź pieršaha pohladu.

— Viedajecie, jość prosta vašy ludzi. Voś jana maja žančyna. Razam nam zaŭsiody ciopła i ŭtulna.

Kali ŭ 2005 hodzie Viktar patrapiŭ u surjoznuju aŭtaavaryju, Volha stała asnoŭnaj zdabytčacaj u siamji i rabiła ŭsio, kab pastavić muža na nohi.

— Na jaje los vypała ciažkaje vyprabavańnie: joj daviałosia ŭtrymlivać nas usich i dbać pry hetym pra siabie. Jana šmat hod rabiła ŭsio dziela taho, kab ajčym papraviŭsia i viarnuŭsia da narmalnaha žyćcia, — raskazvaje Kaciaryna.

U pierapynkach pamiž pracoŭnymi spravami Volha lubić čytać fantastyku. A kali adpraŭlajecca ŭ adpačynak, to abaviazkova z pryhodami: u Jehipcie, naprykład, jana asvoiła dajvinh. 

— A jašče mama maryła skoknuć z parašutam, — kaža Kacia.

Pavialičyć

U červieni pieraniesła apieracyju 

Litaralna ŭ siaredzinie červienia Volha pieraniesła niaprostuju apieracyju. Ciapier siamja pieražyvaje, što zatrymańnie moža kiepska adbicca na jaje zdaroŭi.

— Mama — vielmi mocny čałaviek i moža nikomu nie skazać, što voś u jaje była apieracyja, što ŭ jaje reabilitacyja pavinna być i leki. Ale heta treba ahučyć! — zaklikajuć svajaki.

Zatrymańnie — palityčna matyvavanaje

Z Taćcianaj Hacura-Javorskaj Volha paznajomiłasia praź dziaciej — jany susiedzi, žyvuć u Sucharavie.

— Maja dačka i jaje syn adnaho ŭzrostu, i kali byli małyja, to siabravali. Pamiataju, kali ŭ siamji Voli zdaryłasia biada — muž trapiŭ u ciažkuju aŭtakatastrofu, — ja pračytała pra heta ŭ «Našaj Nivie» i pieradała nievialikija hrošy, jakija źbirali ludzi ŭ dapamohu. Pieršaje ŭražańnie ad znajomstva: Vola — vielmi metanakiravany čałaviek z žaleznaj volaj i pry hetym vielmi miakki ŭ stasunkach ź ludźmi. Ja viedaju mnohich ludziej, jakija čaściakom źviartalisia pa jaje parady jak da prafiesijanała, i jana zaŭsiody ŭsim adkazvała i padkazvała absalutna biaspłatna. Svajo pradpryjemstva buchhałtarskich pasłuh jana adkryła jakraz u ciažki čas dla siamji, kali muž reabilitavaŭsia paśla avaryi, i heta stała jaje spravaj. Akazałasia, što jana — efiektyŭny mieniedžar. Jaje zatrymańnie, ja ŭpeŭnienaja, palityčna matyvavanaje, bo Vola šmat hadoŭ pracuje buchhałtaram u «Našaj Nivie» i prajšła dziasiatki pravierak u roznych pradpryjemstvach, jakija absłuhoŭvaje. Jana zaŭsiody pracavała ŭ miežach zakona, jaki dobra viedała.

• 0
• 0
• 0
• 0
• 0
• 0
• 0
• 0