Kałonija, kudy adpravili Babaryku, maje dźvie admietnaści. Jakija? 

Pa jakim pryncypie Babaryka, siarod šaści biełaruskich kałonij uzmocnienaha režymu, adpraviŭsia mienavita tudy, skazać ciažka. Vyhladaje, rašeńnie prymałasia ŭ indyvidualnym paradku. 

U lubym razie kałonii majuć profili. Navapołackaja viadomaja tym, što prymaje tolki «pieršachodaŭ» — ludziej, jakija adbyvajuć pakarańnie ŭpieršyniu. 

Kałonija №1 «novaja». Raniej pad Navapołackam užo była papraŭčaja kałonija №10, ale jaje zakryli, i na miescy byłoha ŁPP, užo ŭ samim horadzie, u 2017-m adkryli kałoniju №1, jakaja raźličana prykładna na paŭtary tysiačy čałaviek. 

Pavialičyć

I ŭ vybary miesca pieršaja admietnaść kałonii. Jana znachodzicca ŭ horadzie prosta pamiž dvuma chimičnymi zavodami: «Naftanam» i «Palimiram». Ekałohija miesca kiepskaja. Byłyja viaźni kažuć, što na terytoryju kałonii časta «zachodziać dymy», ad čaho asabliva mocna pakutujuć ludzi z chvorymi lohkimi. 

Ahułam viaźni tam žyvuć u kazarmiennych umovach, śpiać na dvuchpaviarchovych łožkach — «palmach». 

Druhaja admietnaść kałonii, jakuju padkreślivajuć ludzi, jakija pabačyli takija ŭstanovy i roźnicu miž imi, u tym, što ŭ adnosinach miž źniavolenymi i administracyjaj usio ŭ kraj zarehłamientavana normami, i nijakich pasłableńniaŭ, vyklikanych čałaviečymi pačućciami, čakać nie vypadaje. 

«U kałonijach ŭstalavany ŭnutrany rasparadak, jakim kirujucca ŭsie asudžanyja: padjom, zapraŭka łožkaŭ, śniadanak i hetak dalej. Kali ŭ inšych papraŭčych kałonijach dapuščalna biez reakcyi z boku administracyi adchilicca ad rasparadku i, naprykład, nie pajści na śniadanak, ci addać svoj inšamu čałavieku, ci prysieści na spalnaje miesca ciaham dnia i hetak dalej, to ŭ PK №1 heta vyklučana.

Pieršy raz — vymova, druhi raz — pamiaškańnie kamiernaha typu, potym štrafny izalatar. Škadavańnia nie byvaje, usio stroha pa zakonie, mnohija praz heta prachodziać», — kažuć tyja, chto prajšoŭ kałoniju.

PKT aznačaje «pamiaškańnie kamiernaha typu», na turemnym słenhu «BUR» — «barak uzmocnienaha režymu». Fizična heta jak asobnaja kamiera, ale z šeraham abmiežavańniaŭ: banderol raz na paŭhady, prahułka tryccać chvilin, mahčymaść zakupicca tolki na adnu bazavuju raz na miesiac i hetak dalej. PKT dajecca adrazu na vialiki termin, na miesiacy. 

ŠIZA — heta štrafny izalatar unutry samoj kałonii. Tam zabaroniena ŭžo ŭsio: spatkańni, trata hrošaj, pasyłki, listy i hetak dalej. 

Traplańnie źniavolenaha ŭ PKT ci ŠIZA ŭ teoryi moža paciahnuć prymianieńnie 411 artykuła Kryminalnaha kodeksa: «Złosnaje niepadparadkavańnie patrabavańniam administracyi papraŭčaj ustanovy», pa pieršaj častcy jakoha źniavolenamu možna «dakinuć» jašče da hoda pazbaŭleńnia voli.

«Uzmocnieny» režym, da jakoha prysudzili Viktara Babaryku, na praktycy budzie aznačać dla jaho ŭ tym liku źmienšanuju kolkaść spatkańniaŭ i pieradač.

Aproč Babaryki, zhodna z sajtam «Viasny», u kałonii №1 ciapier adbyvajuć pakarańnie 23 palitviaźni, siarod jakich były vajenny Dzianis Urad i błohier Alaksandr Kabanaŭ. 

• 0
• 0
• 0
• 0
• 0
• 0
• 0
• 0