Straty 126 miljonaŭ, u biznes-kołach kažuć pra mahčymy prodaž rasijskamu «Mahnitu». Što adbyvajecca ź Jeŭraoptam?
Jak stała viadoma «Našaj Nivie», apošnim časam u biznes-kołach abmiarkoŭvajecca tema pieramovaŭ ab prodažy biełaruskaj sietki «Jeŭraopt» bujnoj rasijskaj sietcy «Mahnit».
«Mahnit» u Rasii pa svaim masštabie vielmi padobny da «Jeŭraopta» ź jaho amal tysiačaj kramaŭ u Biełarusi.
Pres-sakratar «Jeŭraopta» Jahor Chrustaloŭ na adpaviedny zapyt «Našaj Nivy» adkazaŭ, što nijak nie budzie kamientavać hetaje pytańnie, u aficyjnym adkazie «Mahnita» nam paviedamili, što pieramovaŭ ab pakupcy jany nie viaduć, ale našy krynicy paviedamlajuć, što razmovy pra pieramovy ŭźnikli nie na pustym miescy.
Kali analizavać finansavyja pakazčyki «Jeŭratorha», jakomu i naležyć «Jeŭraopt», to jany vyhladajuć davoli biazradasna: spračazdačnaść kampanii za kryzisny 2020 hod nahadvaje spravazdačnaść dziaržaŭnaj kampanii — 161 miljon 875 tysiač rubloŭ čystych strat.
Straty pradpryjemstva hienierujucca ŭ pieršuju čarhu za košt finansavaj dziejnaści. U 2020 hodzie jany zarabili bolš, čym u 2019-m ad realizacyi pradukcyi. Ale admoŭnyja kursavyja roźnicy i płaciažy pa daŭhach pierakryli apieracyjny prybytak.
Imavierna, vialikaja rola ŭ hetym u vypłacie pa valutnych kredytach. Jeŭraopt raźmiaščaŭ bahata valutnych ablihacyj, ich treba spłačvać jašče doŭhija hody. Na heta źviartajuć uvahu niezaležnyja aŭdytary pa vynikach 2020 hoda.
Kolki moža kaštavać Jeŭraopt? Jak kažuć u biznes-kołach, ułaśniki zaŭsiody aceńvali kampaniju prykładna ŭ miljard dalaraŭ, ale kali ciapier ličyć pa formule «EBITDA (vyručka da padatkaŭ — kala 211 miljonaŭ dołaraŭ) pamnožanaja na šeść, minus 600 miljonaŭ doŭhu», to cana kampanii składzie 666 miljonaŭ dalaraŭ, i heta biez uliku dyskonta za znachodžańnie na vułkanie.
«Na čystyja straty «Jeŭraopta» hladzieć nie maje sensu, kali my razvažajem pra heta z pazicyi bienieficyjaraŭ. Pieradusim «Jeŭraopt» — heta kala manapolny kanał ruchu tavaraŭ u Biełarusi, hetyja ludzi prakručvać praź siabie amal 30% roźnicy krainy. Prosta ŭjavicie, na jaki pracent treba padniać ceny, kab pieraŭtvaryć straty ŭ prybytki, ale hałoŭny sens u tym, što hałoŭny prybytak naŭradci asiadaje ŭ «Jeŭratorhu».
Tut treba hladzieć na pakazčyki zamiežnych kampanij-pastaŭščykoŭ, afilavanych z «Jeŭraoptam». U mianie jość padazreńnie, što asnoŭny prybytak asiadaje tam, a pakazvać vialikija dasiahnieńni ŭ Biełarusi prosta nieracyjanalna — tak paviałosia. Kali ty zapłociš miljard padatkaŭ, to zaŭtra ŭ ciabie paprosiać rabić adličeńni va ŭsiemahčymyja fondy i budavać na sponsarskich pačatkach toje, što ty b nie chacieŭ, a toje i ŭvohule adbiaruć biznes. A kali ličby spravazdačnaści nulavyja ci kala nula, to nichto ŭ ciabie ničoha asabliva nie paprosić», — kaža naš surazmoŭca, biznes-analityk.
Prodaž kampanii ŭ Biełarusi — heta cudoŭny varyjant atrymać lehalnyja hrošy, i abo žyć na ich biaźbiedna za miažoj, abo zaniacca niejkim mienš pylnym biznesam.
«Siońnia mnohim našym kamiersantam mroicca taki siužet, biada što mała pakupnikoŭ. Kali kazać pra rytejł, to ŭ asnoŭnym heta rasijanie — im vielmi prosta budzie pieraklučyć isnyja kanały pastavak na svaje ŭłasnyja, užo napracavanyja. Razmovy pra «Mahnit» čuvać, sapraŭdy, dla «Mahnita» heta było b naturalna — pryraści jašče adnym, nie vielmi vialikim navat, ź ich hledzišča, kavałkam pobač z Rasijaj», — dadaje jon.
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»10
Kamientary