21 maja 2020 hoda. Viktar i Eduard Babaryki iduć padavać dakumienty ŭ CVK. Ciapier były bankir u navapołackaj kałonii №1 — jon atrymaŭ 14 hod strohaha režymu. Eduard usio jašče čakaje suda ŭ SIZA.
31 maja 2020 hoda. Pikiet u padtrymku Śviatłany Cichanoŭskaj na Kamaroŭcy. Kab pakinuć podpis, ludzi čakali ŭ hihanckich čerhach.
18 červienia 2020 hoda. U hety dzień zatrymali Viktara Babaryku i jaho syna. Uviečary ludzi vystrojvajucca ŭ łancuhi salidarnaści na niekalki kiłamietraŭ i nie sychodziać, niahledziačy na zalevu.
19 červienia 2020 hoda. Apošni dzień pieradvybarčych pikietaŭ skončyŭsia zatrymańniami. Mužčynu źniali naŭprost z rovara, a karespandentku «Radyjo Svaboda» Alaksandru Dyńko paviali ŭ bus padčas žyvoha efiru.
22 lipienia 2020 hoda. Volha Sieviaryniec čakaje paśla sutak muža Paŭła pad Akreścina. Jaho tak i nie vypuściać: ni ŭ toj dzień, ni paźniej. U mai 2021 hoda Paŭłu prysudziać siem hadoŭ kałonii.
24 lipienia 2020 hoda. Trya Cichanoŭskaj, Kaleśnikavaj i Capkała pryjechała na sustreču ź Viciebskam. Abjadnany štab adpraviŭsia ŭ tur pa haradach. Navat u rajcentrach ich mitynhi źbirali tysiačy ludziej.
6 žniŭnia 2020 hoda. U Kijeŭskim skviery admianili zapłanavany mitynh troch štaboŭ i zamiest jaho arhanizavali dzień adčynienych dźviarej ustanoŭ adukacyi. Ale dydžei Kirył Hałanaŭ i Uład Sakałoŭski niečakana ŭklučyli pieśniu «Pieramien» Coja i padniali ruki ź biełymi branzaletami.
9 žniŭnia 2020 hoda. Śviatłanu Cichanoŭskuju atačyli žurnalisty la ŭčastka, dzie jana prahałasavała.
9 žniŭnia 2020 hoda. Uviečary paśla vybaraŭ ludzi sabralisia ŭ centry Minska. Aŭtazak na chutkaści ŭjechaŭ u natoŭp, pratestoŭcy pasprabavali jaho spynić. Adzin z mužčyn, jaki pavis na kabinie, sarvaŭsia i trapiŭ pad koły aŭtazaka, ale zastaŭsia žyvy.
10 žniŭnia 2020 hoda. Pratestoŭcaŭ razhaniajuć z dapamohaj śviatłošumavych hranat i humavych kulaŭ. Znachodzicca ŭ horadzie było niebiaśpiečna: amapaŭcy ŭryvalisia navat u kramy i zatrymlivali vypadkovych haradžan.
10 žniŭnia 2020 hoda. Ludzi pieryjadyčna razmaŭlajuć ź siłavikami, prosiać nie ŭžyvać siłu i być z narodam. U hetuju noč stała viadoma pra pieršuju achviaru — zastrelili Alaksandra Tarajkoŭskaha.
13 žniŭnia 2020 hoda. Dziaŭčaty ŭ biełym z kvietkami vyjšli na vulicy Minska, kab zaklikać ułady spynić hvałt. Pieršaja žanočaja akcyja prajšła napiaredadni na Kamaroŭcy.
13 žniŭnia 2020 hoda. Stychijnyja akcyi suprać hvałtu achapili Minsk. Ludzi ŭśmichajucca adno adnamu, mašyny sihnalać, i zdajecca, što čornyja dni adstupajuć.
13 žniŭnia 2020 hoda. Unačy z turmaŭ stali vypuskać zatrymanych na pratestach (za 9-12 žniŭnia było schoplena bolš za siem tysiač čałaviek). Pad Akreścina sabrałasia šmat svajakoŭ, jakija nie mahli znajści svaich blizkich, i vałancioraŭ, hatovych advieźci ludziej damoŭ. Vyzvalenyja płačuć, bo pieražyli strašnaje: ich trymali amal bieź ježy i vady, u pierapoŭnienych kamierach. Ź dziaŭčat ździekavalisia, mužčyn źbivali.
14 žniŭnia 2020 hoda. Dziaŭčaty abdymajuć razhublenaha vajskoŭca. Na niekalki dzion hvałt i zatrymańni spynilisia, ludzi patrabujuć dyjałohu z uładami.
15 žniŭnia 2020 hoda. Pachavańnie Alaksandra Tarajkoŭskaha. MUS zajaviła, što jon pamior, bo ŭ jaho ruce ŭzarvałasia samarobnaja vybuchovaja pryłada, ale videa, jakoje źjavicca paźniej, abvierhnie hetuju viersiju. U zaviadzieńni kryminalnaj spravy pa fakcie zabojstva budzie admoŭlena.
15 žniŭnia 2020 hoda. Ludzi sabralisia la BT i patrabujuć pakazać praŭdu. Na fota — taniec «Lebiadzinaje voziera». Ułahodžvać situacyju pryjechała Natalla Kačanava.
16 žniŭnia 2020 hoda. Pieršy niadzielny marš u Minsku, jaki sabraŭ kala 400 tysiač čałaviek pad bieł-čyrvona-biełymi ściahami.
16 žniŭnia 2020 hoda. Ludskoje mora la Steły, dzie jašče niadaŭna ŭzryvalisia hranaty. Paśla hetych kadraŭ biełarusami zachaplaŭsia ŭvieś śviet.
17 žniŭnia 2020 hoda. Padčas vystupu Alaksandra Łukašenki na MZKT rabočyja kryčać jamu «Sychodź». Ludzi, što sabralisia kala zavoda, pravodziać viertalot z Łukašenkam.
17 žniŭnia 2020 hoda. Rabočyja roznych zavodaŭ źbirajucca abvieścić zabastoŭku. Farmirujucca stačkamy.
17 žniŭnia 2020 hoda. Da miedykaŭ, jakija patrabavali akazać paciarpiełym naležnuju dapamohu, vyjšaŭ Uładzimir Karanik, ministr achovy zdaroŭja na toj momant. Z sustrečy jon źjazdžaŭ pad vokličy «Hańba!».
23 žniŭnia 2020 hoda. Druhi niadzielny marš sabraŭ na praśpiekcie pad 200 tysiač čałaviek.
23 žniŭnia 2020 hoda. Łukašenka prylacieŭ da Pałaca Niezaležnaści z aŭtamatam. Kali pratestoŭcy syšli, jon vyjšaŭ da amapaŭcaŭ. «Krasaŭcy!» — pachvaliŭ siłavikoŭ Łukašenka.
29 žniŭnia 2020 hoda. Subotni žanočy marš, jaki taksama stanie tradycyjnym. Žančyny vychodzili asobna, bo ich spačatku nie zatrymlivali.
30 žniŭnia 2020 hoda. Žančyna staić na kaleniach pierad siłavikami padčas niadzielnaha marša.
30 žniŭnia 2020 hoda. Ludzi lahli na ziamlu pierad ačapleńniem. Pratestoŭcy tak padkreślivali, što ich akcyi mirnyja.
30 žniŭnia 2020 hoda. Dźvie kałony pratestoŭcaŭ jadnajucca i praciahvajuć marš. Mnohija niasuć samarobnyja padarunki i iraničnyja płakaty ź vinšavańniami da dnia narodzinaŭ Łukašenki.
30 žniŭnia 2020 hoda. Dziaŭčaty całujucca na fonie ściany ź siłavikoŭ — jašče adno fota, jakoje ablacieła śviet.
1 vieraśnia 2020 hoda. Pieršaja studenckaja akcyja. U hety dzień moładź zładziła šeście pa horadzie. Paśla pačalisia siadziačyja pratesty ŭ chołach i na prystupkach univiersitetaŭ.
1 vieraśnia 2020 hoda. Adnym z punktaŭ viačernich zboraŭ była płošča Niezaležnaści. Žančyny zakryvali saboj mužčyn, kab tych nie zatrymali. Adnojčy, kali ludzi chavalisia ŭ Čyrvonym kaściole, ich zamknuli zvonku i vystavili ačapleńnie na prystupkach.
8 vieraśnia 2020 hoda. Žanočyja maršy pierastali być biaśpiečnymi. Dziaŭčat i kabiet prycisnuli da ściany i nie dazvalali syści.
9 vieraśnia 2020 hoda. Kancert Źmitra Vajciuškieviča na Płoščy pieramien. Dvarovyja sustrečy, na jakich zaprašali muzykaŭ, prachodzili pa ŭsim horadzie. Susiedzi znajomilisia, stvaralisia dvarovyja čaty, prydumlalisia ściahi rajonaŭ.
12 vieraśnia 2020 hoda. Žorstkija zatrymańni padčas subotniaha žanočaha marša. Dziaŭčat ciahali za vałasy, kidali ŭ aŭtazak. Na adnym z takich maršaŭ (19 vieraśnia) była zatrymana hramadzianka Šviejcaryi Natalla Chierše. Joj prysudzili 2,5 hoda kałonii za sarvanuju bałakłavu.
13 vieraśnia 2020 hoda. Niadzielny marš na Drazdy sabraŭ bolš za 100 tysiač čałaviek. Navat u elitnym pasiołku znajšlisia ludzi, jakija chavali pratestoŭcaŭ ad siłavikoŭ u svaich katedžach.
23 vieraśnia 2020 hoda. Dzień tajemnaj inaŭhuracyi. Tajemnaj jana była navat dla asobnych haściej: śpiavački siostry Hruździevy dumali, što ich zaprasili na kulturnaje mierapryjemstva ŭ muziej VAV. Uviečary ludzi vyjšli vykazać pratest — ich žorstka razahnali. Žančynie na fota raźbili hałavu.
4 kastryčnika 2020 hoda. Na maršy złamaŭsia vadamiot. Niekalki pratestoŭcaŭ razabrali jaho na chadu, paśla čaho strumień z vadoj staŭ bić uvierch.
18 kastryčnika 2020 hoda. Marš na Partyzanskim praśpiekcie. U niejki momant kałona pratestoŭcaŭ raźviarnułasia i pajšła na busy z amapaŭcami, prymusiŭšy ich uciakać.
19 kastryčnika 2020 hoda. Marš piensijanieraŭ. Pažyłyja stavili sabie telehram i vajbier, kab być u kursie akcyj. Da kałony dałučalisia navat 80-hadovyja kabiety. U supraćvahu im łukašenkaŭcy sahnali kałonu adstaŭnikoŭ ź siłavych orhanaŭ.
19 kastryčnika 2020 hoda. Niazłomnaja Nina Bahinskaja. U jaje bieźlič razoŭ adbirali ściah, ale jana kožny raz ułasnaruč šyła novy i vychodziła ŭ horad.
22 kastryčnika 2020 hoda. Marš ludziej ź invalidnaściu. Adzin z udzielnikaŭ u invalidnym vazku — Hieorhij Sajkoŭski, jakomu ŭ časie razhonu pratestoŭcaŭ na Puškinskaj hranataj adarvała stupniu.
26 kastryčnika 2020 hoda. Dzień, kali była abvieščanaja nacyjanalnaja zabastoŭka, da jakoj dałučylisia i studenty. Mnohija biznesy, jakija ŭ hety dzień nie pracavali, paśla byli vymušanyja zakrycca pad ciskam biaskoncych pravierak.
1 listapada 2020 hoda. Niadzielny marš na Kurapaty, da miemaryjała achviaram stalinskich represij. Siłaviki šmat razoŭ pierakryvali demanstrantam darohu, da finalnaj kropki dajšli niekalki tysiač čałaviek. U toj dzień byli zatrymanyja bolš za 300 čałaviek.
12 listapada 2020 hoda. Stychijny narodny miemaryjał Ramanu Bandarenku na Płoščy pieramien. Napiaredadni ludzi ŭ štackim źbili maładoha čałavieka ŭ hetym dvary za toje, što jon pasprabavaŭ pieraškodzić zrazańniu bieła-čyrvonych stužak. Raman pamior na nastupny dzień. Jamu byŭ 31 hod.
20 listapada 2020 hoda. Pachavańnie Ramana Bandarenki. Za jaho śmierć dahetul nichto nie pakarany.
22 listapada 2020 hoda. Kali ŭ centry stalicy źbiracca stała niemahčyma, ludzi pačali ładzić rajonnyja maršy. Hrupa pratestoŭcaŭ pad hrukat barabanaŭ zaniała kurhan u mikrarajonie Paŭdniovy Zachad.
9 lutaha 2021 hoda. Sud nad žurnalistkami «Biełsata» Kaciarynaj Andrejevaj i Darjaj Čulcovaj. Za strym z akcyi pamiaci z Ramanam Bandarenkam na Płoščy pieramien dziaŭčatam dali pa dva hady kałonii. Ich vyciahnuli z kvatery, dzie jany viali tranślacyju.
25 sakavika 2021 hoda. Dzień voli minčuki adznačyli salutami ŭ roznych rajonach. Ich zapuskali ŭ 23.34 — artykuł pad hetym numaram staŭ narodnym: za ŭdzieł u niesankcyjanavanych akcyjach tysiačy ludziej atrymali štrafy i sutki.
19 maja 2021 hoda. Kaciaryna Barysievič abdymaje dačku. Paŭhoda žurnalistka praviała za kratami — za artykuł na Tut.by, dzie napisała, što ŭ kryvi zahinułaha Ramana Bandarenki nie było ałkaholu. Kaciarynu źvinavacili ŭ razhałošvańni miedycynskaj tajamnicy, jakoje paciahnuła ciažkija nastupstvy. Doktar Arciom Sarokin, jaki paćvierdziŭ infarmacyju dla žurnalistki, atrymaŭ dva hady kałonii z adterminoŭkaj na hod.
26 maja 2021 hoda. Raźvitańnie ź Vitoldam Ašurkam. Jon byŭ asudžany da piaci hadoŭ pazbaŭleńnia voli i pamior u škłoŭskaj kałonii pry niavyśvietlenych abstavinach. Pavodle aficyjnaj viersii, u palitviaźnia spyniłasia serca. Viadoma, što apošnija dni jaho trymali ŭ ŠIZA. Vitolda pachavali ŭ rodnaj Biarozaŭcy pad bieł-čyrvona-biełym ściaham.
Kamientary