Za viečar paśla tajnaj inaŭhuracyi Łukašenki chłopca asudzili dvojčy: hod tamu dali štraf, siońnia — 3 hady chimii

Sam chłopiec svaju nie pryznaŭ. Patłumačyŭ, što viedaŭ pra niesankcyjanavanyja mitynhi ź internetu, što ludzi byli niazhodnyja z ahučanymi ŭładami vynikami vybaraŭ i vychodzili na pratesty, u tym liku i 23 vieraśnia — u dzień inaŭhuracyi. Abvinavačany adznačyŭ, što ŭ toj dzień pierapisvaŭsia ź nieznajomym chłopcam u telehramie, vyrašyli sustrecca kala «Halerei» i parazmaŭlać nakont muzyki, taksama, mahčyma, syhrać. Kali pryjšli na miesca, było ŭžo šmat ludziej, jakija ruchalisia ŭ bok Steły. U niejki momant nieznajomy chłopiec vyjšaŭ na prajeznuju častku darohu z astatnimi ludźmi, tady Illa kryčaŭ jamu, kab jon syšoŭ adtul, ale chłopiec nie słuchaŭ, Kamkoŭ padbieh da jaho i pačaŭ vyciahvać z darohi, bo bajaŭsia za jaho biaśpieku. 

Paśla chłopcy pajšli ŭ bok Niamihi i dajšli da Burger King, dzie zamovili ježu, siadzieli na terasie. Abvinavačany bačyŭ, jak uzdoŭž praśpiekta Pieramožcaŭ chadzili ludzi ŭ ciomnaj vopratcy i bałakłavach, dakładna nie ŭśviedamlaŭ, što heta supracoŭniki milicyi. U niejki momant da adnaho čałavieka na terasie padyšli 3 ci 4 čałavieki ŭ bałakłavach, pačali chapać jaho za śpinu, a chłopiec sprabavaŭ vyzvalicca. Illa Kamkoŭ dumaŭ, što heta niejkija bandyty, i pačaŭ adciahvać ich ad chłopca, adnak paśla samoha abvinavačanaha schapili, skrucili ruki i paviali pa praśpiekcie, adviali ŭ budynak i skłali pratakoł. Tolki pry składańni pratakoła Illa zrazumieŭ, što byŭ zatrymany supracoŭnikami milicyi.

Taksama abvinavačany adznačyŭ, što z saboj nie mieŭ nijakaj pratesnaj atrybutyki, nie źbiraŭsia brać udzieł u mitynhu, bo baćki prasili jaho nie ŭdzielničać u pratestach.

Śviedkaj na sudzie vystupiŭ śpiecyjalist, jaki akazvaŭ Illi Kamkovu psichałahičnuju dapamohu: chłopiec byŭ špitalizavany ŭ RNPC psichičnaha zdaroŭja, prajšoŭ kurs lačeńnia. Charaktaryzuje abvinavačanaha jak sacyjalna biaśpiečnaha, nierašučaha, baicca supracoŭnikaŭ milicyi, kali ich bačyć — zdarajecca paničnaja ataka. Pa mierkavańni śviedki, Illa nie moh ździejśnić złačynstva, što stavicca jamu ŭ vinu.

Abarona nastojvała, što Illa nie pryznaŭ siabie vinavatym, znaŭ pra pratesty, ale nie cikaviŭsia imi i nie braŭ udziełu ŭ mitynhach, nie płanavaŭ parušać hramadski paradak. Kali pabačyŭ zatrymańnie chłopca, to ŭspryniaŭ heta jak hramadzianski kanflikt, sprabavaŭ jaho spynić, ale ŭ vyniku jaho zatrymali i pryciahnuli da administracyjnaj adkaznaści ŭ vyhladzie štrafu. Na dumku advakata, nie było dakazana, što Kamkoŭ błakavaŭ ruch, vykrykvaŭ łozunhi. Bolš za toje, nielha pryciahvać i da administracyjnaj, i da kryminalnaj adkaznaści za adno i toje ž dziejańnie. Abarona prasiła sud apraŭdać Illu za niedakazanaściu jaho viny.

Adnak sudździa Siarhiej Šaciła padtrymaŭ pazicyju dziaržabvinavačvańnia i pakaraŭ Illu Kamkova tryma hadami «chimii».

• 0
• 0
• 0
• 0
• 0
• 0
• 0
• 0