Naša niva: Ci čakaŭ zatrymańnia?
Eduard Palčys: Užo ŭ lipieni ja razumieŭ, što kali pa mianie pryjduć — pajedu pa surjoznaj spravie, bo mieŭ užo administracyjku.
NN: Ci čakaŭ takoj žorstkaści ad biełaruskaj sistemy?
EP: Hetaja sistema — naščadak SSSR. Tamu ničoha novaha ŭ hetym niama. Ale, u pryncypie, padśviadoma chaciełasia vieryć, što čałaviečnaha ŭ joj bolš, čym biesčałaviečnaha.
NN: Čamu nie źjechaŭ raniej?
EP: Nakont adjezdu — hłabalna nie było ŭ płanach na 2020 źbiehčy kudy-niebudź. Ja ŭvohule płanavaŭ pravieści hety hod spakojna.
NN: Što było samym ciažkim za hety hod pad vartaj?
EP: Navat praz televizar razumieju, što TikTok zachoplivaje śviet.
NN: Ci źmianilisia niejkija pohlady za hety čas?
EP: Kardynalnych pieramien niama.
NN: Što dapamahaje trymacca?
EP: U mianie vydatnaja žonka, siamja, siabry. Ź imi trymacca možna choć 10 hadoŭ.
NN: Jak nie zvarjacieć za kratami?
EP: Kali ŭsprymać kamieru jak manastyrskuju kiellu i bolš čytać, to mazhi zaŭsiody buduć u paradku.
NN: Čaho nie chapaje?
EP: U pieršuju čarhu — infarmacyi. Infarmacyjnaja błakada. Taksama nie chapaje stasunkaŭ z žonkaj i dačkoj.
NN: Ci schudnieŭ ty za hety čas?
EP: Trošački. Ale advakat kaža, što vielmi dobra schudnieŭ.
NN: Ci nie płanuješ pisać niešta? Moža być, knihu?
EP: Dumki pra knihu byli. Ale kali vybiraješ pamiž napisańniem knihi i ŭkrainskim kamiedyjnym tok-šou, to ja vybiraju tok-šou.
NN: Jak dachodziać listy?
EP: Da krasavika 2021-ha z poštaj usio było bolš-mienš narmalna. Dachodzili listy ad čužych ludziej, adpraŭlaŭ svaje taksama narmalna. Z krasavika listy amal nie prychodziać. Chiba tolki ad svajakoŭ, i toje nie ŭsie. Kali ja nie adkazaŭ na vaš list — značyć, jon da mianie nie dajšoŭ.
NN: Ci byli prapanovy ab pakajalnym intervju ci napisać prašeńnie ab pamiłavańni?
EP: Intervju nie prapanoŭvali. Ale pryjšli dva listy ad Vaskrasienskaha. Ale ja niešta pakul nie zrazumieŭ, chto heta i čamu jon mnie piša.
NN: Jak ty siabie ŭsprymaješ: achviaraj ci hierojem?
EP: Uličvajučy, što ja ŭ krainie, dzie ŭsich sadžajuć, to ŭsprymaju siabie zvyčajnym hramadzianinam.
NN: Ci nie rasčaravany, što źmieny ŭ krainie nie nastupili tak chutka, jak čakałasia?
EP: Ja navat radujusia, što ŭsio zaciahnułasia. Bo da 2020-ha ŭ biełarusaŭ u palityčnym sensie było šmat naiŭnaha i dziciačaha. Kali b usio było chutka i prosta, to nacyja b nie zrabiła važnych vysnoŭ, jakija, ja spadziajusia, jana zrabiła ciapier. Usio sapraŭdnaje i vartaje dajecca praz vyprabavańni. Tamu my i pieražyvajem unikalny čas, chaj i ciažki. Heta treba vykarystoŭvać dla ŭśviedamleńnia sapraŭdnaha i dobraha, budučaha i minułaha.
NN: Čaho ty čakaješ?
EP: Ja čakaju, što budzie zakryty sud i realny termin. Navat začakaŭsia — kali ž užo kałonija?
NN: Ci škaduješ pra što-niebudź?
EP: Škaduju, što na Vaładarcy niama hłazuravanych syrkoŭ na atavarcy. Usio budzie dobra! A samyja smačnyja — biarozaŭskija syrki.