U Darji nie było ni zatrymańniaŭ, ni štrafaŭ. Tamu vizit milicyi ŭ sakaviku staŭ dla jaje niečakanaściu.
«Da mianie dadomu pryjšli apieratyŭniki i sprabavali zabrać u adździeł, kab ja dała tłumačeńni, dzie ja znachodziłasia 8 sakavika 2021 hoda i ci nie viedaju ja niejkuju Kryścinu. Tady doma byŭ tata, skazaŭ, što ja nikudy nie pajdu, i vypravadziŭ ich. Ja jašče pakazała daviedku, što na kavid chvareju.
Na nastupny dzień mnie treba było ŭ palikliniku. Na vychadzie ź jaje da mianie padyšli try čałavieki biez formy, skazali, što ź milicyi (ja dvaich paznała — jany prychodzili da mianie dadomu). Advieźli ŭ aporny punkt. Zaviali ŭ kabiniet i tady tolki skazali, što jość pastanova prakurora na majo zatrymańnie.
U mianie prachodziŭ dopyt na praciahu piaci hadzin biez advakata. Mnie adkryta kazali: ad taho, nakolki łajalna projdzie dyjałoh, zaležyć, ci vyjdu ja adsiul siońnia albo praz paru hadoŭ. Uziali moj telefon, hladzieli telehram, lidski čat».
«Damovilisia, što ja jamu pad raśpisku kampiensuju 500 rubloŭ maralnaj škody i jon adzavie isk»
Pryčynaj zatrymańnia stali kamientary na adras lidskaha śledčaha, jakija dziaŭčyna pakinuła ŭ vieraśni minułaha hoda. U čacie tady pisali, što jon nibyta prymušaŭ ludziej padpisvać pratakoły i pahražaŭ pasadzić u «pravilnuju» kamieru. Darja ŭ kamientarach vykazała staŭleńnie da takich dziejańniaŭ.
«U kancy sa mnoj zapisali videa, nadyktavali tekst, jaki ja pavinna skazać. Dublaŭ 10 zdymali, pakul ich nie zadavoliła. I dali aficyjnaje papiaredžańnie — ja padpisała papieru, što praviedziena hutarka i što, kali jašče niedzie traplusia, budzie bolš surjoznaja adkaznaść. Mianie adpuścili, ale zabrali telefon na ekśpiertyzu».
Praz tydzień Darji paviedamili, što na jaje zaviali kryminalnuju spravu pa artykule 369 (Abraza pradstaŭnika ŭłady). Paśla dadaŭsia i artykuł 342 (Arhanizacyja dziejańniaŭ, jakija hruba parušajuć hramadski paradak) — za paviedamleńni ŭ haradskim čacie. Dziaŭčyna pisała, što nie treba davać ludziam biez apaznavalnych znakaŭ siabie źbivać, a kali pratestoŭcy bačać AMAP u formie, to lepš syści.
«Śledčy padaŭ na mianie isk na 2500 rubloŭ maralnaj škody. Ja za niekalki tydniaŭ da suda schadziła da jaho paprasić prabačeńnia, patłumačyć, čamu tak napisała. Jon mnie skazaŭ, što ŭsio cudoŭna razumieje, zła nie trymaje, prasiŭ zrazumieć jaho. Maŭlaŭ, da jaho pryjšli, pakazali kamientary i skazali pisać zajavu.
My damovilisia, što ja jamu pad raśpisku kampiensuju 500 rubloŭ maralnaj škody i jon adzavie isk. Na sudzie śledčy prasiŭ dla mianie miakkaha pakarańnia, nie źviazanaha z abmiežavańniem voli».
«Haračaja vada ŭklučajecca ranicaj na dźvie hadziny, udzień — na try i ŭviečary — na dźvie»
Darja vučyłasia na biudžecie na pieršym kursie BDU, na fakultecie hieahrafii i hieainfarmatyki. Viasnoj praz chvarobu lohkich jana sychodziła ŭ akademičny adpačynak. Źbirałasia pierapastupać na pieršy kurs, ale chimija źmianiła płany.
U papraŭčuju ŭstanovu Darja pajechała tydzień tamu.
Kamunałka za kamiendaturu letam składaje 10-15 rubloŭ, uzimku — 50-55.
«Haračaja vada ŭklučajecca ranicaj na dźvie hadziny, udzień — na try i ŭviečary — na dźvie. Bojler nahravaje vadu, i paśla kolki čałaviek paśpieła pad joj pamycca, stolki paśpieła. Plity taksama pracujuć pa hadzinach. Tam adrazu źbirajecca čarha — za tydzień ja jašče ni razu ničoha nie pryhatavała na plicie».
«Zarobki ŭ asnoŭnym 400-450 rubloŭ»
Darja pakul na karancinie. Kaža, žančyn tut adpraŭlajuć na ciažkuju fizičnuju pracu.
«Naprykład, na lesapiłku, u kałhas kapać, sadzić. Niekatoryja prybiralščycami pracujuć u łakamatyŭnym depo, myjuć vahony, kabiniety. Adna dziaŭčyna — prybiralščycaj u viciebskim SIZA. Pobač znachodzicca vytvorčaść nitak na stankach — tam taksama pracujuć.
Pracoŭnyja dni ŭ kaho pa 8 hadzin, u kaho pa 10, jość načnyja źmieny. Zarobki ŭ asnoŭnym 400-450 rubloŭ. Na lesapiłcy bolšyja, tam u asnoŭnym zaniatyja abaviazanyja asoby — u kaho ci alimienty, ci daŭhi».
Pa nazirańniach dziaŭčyny, da palityčnych na chimii asablivaha staŭleńnia niama. Aproč adnaho — adrazu staviać na ŭlik jak schilnych da ekstremizmu.
«Heta značyć, što ty śpiš tolki na vierchnim łožku, kožnuju hadzinu ŭ niepracoŭny čas prychodziš adznačacca.
U 19 hadoŭ heta nie toje miesca, kudy chaciełasia b patrapić», — uzdychaje dziaŭčyna.
***
Pisać Darji Čajko možna ŭ instahram @ineffable__limerence
