«Ciapier u kavidnych bryhadach jeździć adzin doktar ad adździaleńnia»
Učastkovaja terapieŭtka adnoj ź minskich paliklinik raskazvaje, što za minuły miesiac jana atrymała dapłatu ŭ 220 rubloŭ za piać kavidnych dzion.
«Pa starych praviłach ja b atrymała stolki ž, bo heta mienš za tracinu pracoŭnaha času (45 hadzin sa 169) i apłačvałasia pahadzinna», — tłumačyć jana.
Poŭnaja kavidnaja nadbaŭka dla terapieŭta ŭ paliklinicy — 1000 rubloŭ. Pa słovach śpiecyjalista, dla mnohich niemahčyma budzie jaje atrymać u takim pamiery, bo źmianilisia nie tolki praviły naličeńnia dapłaty, ale i padychody da arhanizacyi pracy.
«Raniej daktary ŭ kavidnych bryhadach čarhavalisia. Ciapier bryhady ŭrezali, na takija vykliki jeździć adzin doktar ad adździaleńnia. Naprykład, miesiac usie kavidnyja vykliki biare jon, paśla miesiac inšy čałaviek. Tamu ŭ astatnich budzie mienš kavidnych hadzin.
Pry tym što situacyja z karanavirusam nie palapšajecca. Niadaŭna vydadzieny zahad ab vydzialeńni dadatkovych łožkaŭ dla takich pacyjentaŭ. Płanavuju špitalizacyju, naprykład, spyniaje Špital vieteranaŭ VAV, niekatoryja adździaleńni 4-j balnicy», — dzielicca surazmoŭca.
«Raniej, kab atrymać nadbaŭku całkam, treba było mieć kantakt z chvorymi padčas vaśmi źmien»
Situacyju ŭ balnicach apisvaje viciebski chirurh:
«Kali raniej, kab atrymać nadbaŭku całkam (1500 rubloŭ da vyliku padatkaŭ), treba było mieć kantakt ź infiekcyjnymi chvorymi padčas vaśmi pracoŭnych źmien, to ciapier za heta maješ 500 rubloŭ».
Treba ŭličyć, što mnohija daktary pracujuć bolš čym na staŭku, a tamu i razryŭ u sumach bolšy. Za paŭtary staŭki dapłata za tracinu kavidnych źmien budzie nie 2000 rubloŭ, a 660.
Abstanoŭka z epidemijaj u horadzie napružanaja.
«Chvorych vielmi šmat, znoŭ adkryvajuć dadatkovyja kavidnyja łožki», — zaŭvažaje doktar.
«Kali adździaleńnie całkam kavidnaje, to ničoha nie źmianiłasia»
Aniestezijołah minskaj balnicy raskazvaje, što novyja praviły adbilisia nie na ŭsich.
«Kali adździaleńnie całkam kavidnaje, to ničoha nie źmianiłasia, miedyki stolki ž, kolki i raniej atrymlivajuć. A kali, jak u nas — i «čystyja», i «brudnyja» łožki, — to atrymajem dapłatu tolki za čas, jaki byŭ u kavidzie, astatniaje apłaciać jak zvyčajna».
Nadbaŭka dla daktaroŭ u reanimacyjach na staŭku (170 hadzin) — 3000 rubloŭ.
«Ja tolki niadaŭna vyjšła z adpačynku, tamu pakul nie maju raźlikoŭnika. U lipieni da novych pravił u mianie było 300 pracoŭnych hadzin, ź ich u kavidzie ja praviała 148, atrymała dapłatu bolš za 5000 rubloŭ».
Ciapier za stolki ž hadzin, praviedzienych z pacyjentami z karanavirusam, doktarka atrymała b u dva razy mienš.
Miedsiastra inšaj minskaj balnicy pracuje jakraz u «čyrvonaj» zonie. Usie źmieny ŭ jaje kavidnyja. Tamu dapłata zastałasia, jak i ŭ papiarednim miesiacy — 2000 rubloŭ.
«Paviercie, biez nadbavak nichto b nie pracavaŭ», — kaža jana.
***
Zhodna z bankam vakansij, u krainie na siońnia nie chapaje amal 4,4 tysiačy daktaroŭ i 2,8 tysiač miedsiaścior.
