Realizacyja prajektu internet‑partału «Tuzin Hitoŭ» i hramadzkaj kampanii «Budźma biełarusami» praciahvajecca.
Hurt «Sieriebrianaja svad́ba» vybrali ŭrešcie čas miž pastajannymi hastrolami i kancertami, kab zapisać svaju pieśniu «Novy most», jakuju pierakładali sumiesnymi vysiłkami vakalistka hurta Śvieta Bień i litaratar Siarhiej Bałachonaŭ. Śvieta charaktarazuje novuju versiju pieśni, jak «vielmi sympatyčnuju» i ŭpeŭnienaja, što jana palubicca prychilnikam hurta. «Hałoŭnaja ideja našaha tvoru ŭ pracesie pierakładu zastałasia toj samaj. My apiavajem ideju maksymalnaj sproščanaści», — intryhoŭna zajaŭlaje śpiavačka. Muzykanty hurta pa tradycyi zapisvajucca ŭ studyi svaim metadam — biez usialakich nakładańniaŭ i asobnaha zapisu kožnaha instrumentu. «My pišamsia ŭžyvuju, kab pieradać usiu ekspresiju i stvaryć dla słuchača efekt prysutnaści», — tłumačać muzykanty. Jany tolki što viarnulisia z turu pa Niamieččynie i Polščy, a paśla pracy nad «Novym mastom» adjaždžajuć z kancertami ŭ Niderlandy.
Amal skončanaja praca nad biełaruskaj versijaj pieśni «It's Not About Us» prajektu Atlantica, jakaja atrymała nazvu «Vybar nia ŭ nas». «Biełaruskaja mova kudy miahčejšaja za rasiejskuju i anhielskuju, — kaža Aleks Devid, jaki ŭpieršyniu zapiaje na rodnaj movie ŭ miežach svajho prajektu. — A heta značyć, što źmianiajecca tembroŭka, to bok hołas moj budzie hučać zusim inakš. Miarkuju, što słuchačy ździviacca dy zapytajucca: a dzie ž padziełasia zvykłaja Atlantica:)».
A voś Jury Dziemidovič z svaim «Čaroŭnym trusikam» staŭ samym sprytnym udzielnikam prajektu «Tuzin. Pierazahruzka». Pa‑pieršaje, jon chutčej za ŭsich spraviŭsia z pastaŭlenaj zadačaj. Biełaruski varyjant pieśni źjaviŭsia na nastupny dzień paśla ŭzhadnieńnia pierakładu. Ale maładomu vykanaŭcu i hetaha akazałasia zamała.
Naŭzdahon byŭ zrobleny jašče i dens‑varyjant biełaruskaha varyjantu pieśni. Tak što ciapier Jura razam z svaim kiraŭnikom Uładzimieram Hłušakovym dumajuć, jaki ž varyjant prezentavać u miežach prajektu. Nie vyklučana, što biełaruski «Trusik» prahučyć i na finale adboru na dziciačaje «Eŭrabačańnie», jaki projdzie ŭ vieraśni.
Internet‑prezentacyja prajektu «Tuzin. Pierazahruzka» adbudziecca ŭ novym muzyčnym sezonie na staronkach music.fromby.net i budzma.org.
Kamientary