Jon nie zadavoliŭ skarhi stvaralnikaŭ partyi i pryznaŭ rašeńnie Ministerstva justycyi zakonnym.
Viarchoŭny sud Biełarusi nie zadavoliŭ skarhu arhkamiteta pa stvareńni partyi «Biełaruskaja chryścijanskaja demakratyja» (BCHD) u suviazi ź nierehistracyjaj partyi Ministerstvam justycyi.
Takoje rašeńnie pryniaŭ 22 lipienia sudździa Viarchoŭnaha suda Valeryj Samaluk. Sud paličyŭ, što paradak stvareńnia partyi byŭ parušany.
U pryvatnaści, jaje zasnavalnikami dapuščany parušeńni pry praviadzieńni źjezda 28 lutaha. Sud pahadziŭsia ź infarmacyjaj Miniusta ab tym, što faktyčnaja kolkaść delehataŭ źjezda nie adpaviadała kolkaści, ukazanaj ŭ padadzienych u Miniust śpisach.
Akramia taho, sud pryniaŭ da ŭvahi toje, što ŭ śpisach zasnavalnikaŭ partyi fihuravaŭ hramadzianin Rasii, što zabaroniena biełaruskim zakanadaŭstvam. Sud taksama ŭličyŭ, što srodki, pieraličanyja arhanizatarami BCHD u jakaści dziaržaŭnaj pošliny, pastupili nie na toj rachunak, na jaki mielisia być pieraličanymi. Pry hetym sud nie pryniaŭ da ŭvahi pakazańni śviedak z boku arhkamiteta BCHD i paličyŭ, što «jany nie adnosiacca da spravy».
Kamientujučy BiełaPAN rašeńnie Viarchoŭnaha suda, sustaršynia arhkamiteta Alaksiej Šein nazvaŭ jaho palityčnym i zajaviŭ, što aktyvisty BCHD pradoŭžać dziejnaść niezaležna ad sudovaha vierdykt.
Adkazny sakratar arhkamiteta Dzianis Sadoŭski paviedamiŭ, što zasnavalniki arhanizacyi nie majuć namieru admaŭlacca ad sprobaŭ zarehistravać jaje, i najbližejšym časam projdzie novy ŭstanoŭčy źjezd.
Kamientary