«Nichto nie viedaje, što budzie zaŭtra»: prezident Litvy zaklikaŭ źmianić mihracyjnuju palityku ES z-za patoku nielehałaŭ ź Biełarusi
Hitanas Naŭsieda zajaviŭ, što praviły ES u halinie mihracyi i pradastaŭleńnia prytułku nieabchodna źmianić. Pakolki supolnaść pavinna być hatovaja da mahčymaści jašče bolšaha napłyvu nielehalnych mihrantaŭ na źniešniaj miažy ź Biełaruśsiu, paviedamlaje BNS.
«My bačym praciah hibrydnaj ataki Biełarusi, jakaja stanovicca ŭsio bolš ahresiŭnaj, my bačym sproby palehčyć vydaču viz, my bačym sproby biełaruskaha režymu znajści novyja suviazi, novyja kirunki z krain Blizkaha Uschodu. Takim čynam, kolkaść mihrantaŭ, patencyjna jakija pierasiakajuć miažu ź ES, raście. Tamu ŭ hetych umovach nam nieabchodna źmianić zakanadaŭstva, Šenhienski kodeks, kab być hatovymi da hetych vyklikaŭ z boku biełaruskaha režymu», — zajaviŭ jon.
Pavodle jaho słoŭ, Litva imkniecca abnavić i pierahledzieć praviły mihracyi i pradastaŭleńnia prytułku, a taksama pryniać miery, jakija dazvolili b ES finansavać budaŭnictva fizičnaha barjera na miažy ź Biełaruśsiu.
«Heta nieabchodna ŭ jakaści karotkaterminovaj miery dla baraćby z kryzisam. Tamu što nichto nie viedaje, što adbudziecca zaŭtra: moža być, try, čatyry, piać tysiač mihrantaŭ źjaviacca na miažy adnačasova, abo jany buduć sprabavać pierasiekčy miažu ŭ roznych miescach, i my nie budziem hatovyja da hetaha vykliku. Tamu nam znoŭ treba być rašučymi», — skazaŭ litoŭski lidar.
Kamientary