— Užo niekatory čas ja znachodžusia za miažoj. Byŭ vymušany pakinuć miežy krainy, jak i mnohija inšyja biełarusy z aktyŭnaj hramadzianskaj pazicyjaj.
Zrešty, ad hetaha maje płany nie źmianilisia, jany zastalisia takimi ž, jak i raniej. Ja pracuju pa niekalkich nakirunkach. Asnoŭny — praca nad prajektam novaj Kanstytucyi. Mnie padajecca, što ŭ nas atrymaŭsia vielmi jakasny dakumient dla novaj Biełarusi. Siońniašni režym nie budzie viečna isnavać, tamu treba być hatovymi da novych časoŭ i vyklikaŭ.
Akramia hetaha, zaraz ja sprabuju pracavać z parłamienckaj supolnaściu i ažyćciaŭlaju peŭnyja nakirunki dziejnaści «Jeŭrapiejskaha dyjałohu», chacia centr u Biełarusi zakryvajuć.
— Kali nie sakret, u jakoj krainie vy znachodziciesia?
— Ščyra kažučy, ja ŭ vandroŭcy pa roznych krainach. Niama ŭ mianie pastajannaha miesca žycharstva.
— Što prymusiła vas źjechać?
— Pakinuć Biełaruś daviałosia pa prośbie siamji, bo jany ŭžo psichałahična stamilisia ad tryvožnaha čakańnia, što mianie mohuć kinuć za kraty. I siamja paprasiła, kab ja svaju spravu peŭny čas rabiŭ za miežami Biełarusi.
Siońnia pryznaju: kali b zastaŭsia ŭ krainie, to efiektyŭnaść majoj pracy była b mienšaj u razy.
Darečy, siamja zastałasia ŭ Minsku. Dy i ŭ mianie, ščyra kažučy, niama płanaŭ pakidać Biełaruś nazaŭždy. Budziem ličyć, što zaraz ja znachodžusia ŭ rabočaj kamandziroŭcy.
— Siońnia mnohija viadomyja ludzi zaklikajuć ułady da pierahavoraŭ z demakratyčnaj apazicyjaj, śćviardžajučy, što heta adziny šlach da zhody ŭ hramadstvie i da spynieńnia represij. Ci mahčyma heta ŭ bližejšaj pierśpiektyvie?
— Pa-pieršaje, mnie padajecca, što zaraz uładam nie vielmi patrebny pierahavory. Heta nikoli nie było ich mocnym bokam, a zaraz stała jašče bolš prablematyčnym. Tamu tut pierśpiektyvy naohuł nievyraznyja.
Chiba što mohuć źjavicca niejkija faktary, jakija paspryjajuć tamu, što pačnucca pieramovy. Ekanomika moža skazać svajo mocnaje słova, albo źniešnija ihraki pasadziejničajuć.
— Stała viadoma, što refierendum pa pryniaćci abnoŭlenaj Kanstytucyi płanujecca pravieści ŭ lutym 2022 hoda. Jakija ŭ vas čakańni?
— Miarkuju, refierendum ničoha nie vyrašyć, bo dla taho, kab mierapryjemstva było lehitymnym, jaho treba pravodzić pa zrazumiełych usim hramadzianam Biełarusi praviłach. U vybarčych kamisijach pavinny prysutničać nie skroź praŭładnyja asoby, a i pradstaŭniki hramadstva, jakija zdolny ŭličvać sapraŭdnaje volevyjaŭleńnie ludziej.
A ŭ nas vybary — vyklučna instrumient stvareńnia ŭražańnia, što ŭłada maje lehitymnaść. Asabista ŭ mianie niama nijakich aptymistyčnych čakańniaŭ z nahody taho, jakim čynam budzie praviedzieny hety refierendum.
— Nie pieršy miesiac praciahvajecca i mihracyjny kryzis. Na vaš pohlad, ci vyrašycca ŭ bližejšy čas heta prablema?
— My bačym, što, z adnaho boku, ułady vyciskajuć z krainy najbolš aktyŭnych ludziej, prafiesijanałaŭ svajoj spravy, i heta mocna bje pa ekanomicy.
Ź inšaha — vykarystoŭvajuć mihrantaŭ jak elemient cisku na susiedziaŭ. Ale heta i prablema dla samoj krainy, bo mnohija mihranty, jakija nie traplajuć za miažu, błukajuć zatym pa Biełarusi.
— Abjadnanaja hramadzianskaja partyja, jakoj vy kiravali šmat hadoŭ, siońnia siabie nijakim čynam nie prajaŭlaje, jak, darečy, i inšyja apazicyjnyja struktury. Pajšli ŭ padpolle?
— Dumaju, usie čakajuć. Apošnija lehalnyja vyspy, jakija zastalisia, — niezaležnyja prafsajuzy i palityčnyja partyi. I jany ŭ čakańni: zastanucca ci buduć likvidavany?
Ale ja viedaju, što šerah palityčnych arhanizacyj zachavali svaju infrastrukturu, svaich ludziej u rehijonach, jakija nieadnojčy traplali pad represii. I peŭnaja aktyŭnaść jość, chacia ludzi nie imknucca vykazvacca pra heta publična.
Skažam tak: siońnia partyi chutčej žyvyja, čym miortvyja.
