«Biełpošta» adsudziła ŭ «Narodnaj voli» bolš za 100 tysiač rubloŭ u jakaści kampiensacyi za niepradadzienyja nakłady, paviedamiŭ «Ježiednievnik».
Ekanamičny sud Minska prysudziŭ «Biełpošcie» apošniuju častku sumy ad kampiensacyi, jakuju dziaržaŭnaja arhanizacyja zapatrabavała pry kancy minułaha hoda z haziety «Narodnaja vola».
Usiaho pryvatnaje vydańnie, jakoje nie zdoleła nadrukavać haziety ŭ drukarniach Biełarusi i Rasii i, adpaviedna, dastavić nakłady na «Biełpoštu», abaviazana vypłacić zajaŭniku bolš jak 108 tysiač rubloŭ.
«Narodnuju volu» admovilisia ŭ žniŭni 2020 hoda drukavać spačatku ŭ Domie druku ŭ Minsku i biełaruskich drukarniach, a potym i ŭ drukarniach Rasii.
Pa słovach hałoŭnaha redaktara «Narodnaj voli» Iosifa Siaredziča, «Biełpošta «nie atrymała nakłady» nie tamu, što my admovilisia».
«My prapanavali im dastavić tyraž dla padpisčykaŭ i toje, što možna pradać u paštovych adździaleńniach. Našy haziety byli ŭ ekśpiedycyi niekalki dzion, ale «Biełpošta» dumała i admoviłasia na treci dzień. Takim čynam, my nie možam pahadzicca z pazovam suprać nas. Paralelna budziem pryciahvać da adkaznaści Vydaviectva «Biełaruski dom druku», — kazaŭ napiaredadni sudovaha supraćstajańnia Iosif Siaredzič.
Na praciahu hetaha hoda prajšli try sudovyja pasiedžańni pa pazovie «Biełpošty», u jakich byli zadavolenyja ŭsie jaje hrašovyja patrabavańni — u lutym, sakaviku i na minułym tydni. U lutym Ekanamičny sud Minska abaviazaŭ «Narodnuju volu» vypłacić zajaŭniku 9576 rubloŭ 98 kapiejek, u sakaviku — 84 665 rubloŭ 06 kapiejek, u kastryčniku — 14 189 rubloŭ 61 kapiejku, a taksama paniesienyja sudovyja vydatki na vypłatu dziaržaŭnaj pošliny ŭ pamiery 725 rubloŭ.
Nahadajem, što «Narodnaja vola» ŭvachodzić u pieralik niedziaržaŭnych drukavanych vydańniaŭ, jakija ź minułaha hoda nie ŭklučajucca «Biełpoštaj» u padpisny katałoh.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary