«Hruzim bałony kruhłasutačna». Chto ciapier pastaŭlaje kisłarod u balnicy
Pakul u krainie prybirajuć apošnija zhadki pra masačny režym, usio bolš pradpryjemstvaŭ pieraklučajecca na vypusk kisłarodu dla balnic. «Naša Niva» daviedałasia, što tam adbyvajecca.
«Vyrablajem vyklučna miedycynski kisłarod, vytvorčaść techničnaha spynili»
«ŚvietłahorskChimvałakno» vozić kisłarod u Śvietłahorskuju i Rečyckuju balnicy.
«Ciapier my vyrablajem vyklučna miedycynski kisłarod, vytvorčaść techničnaha pakul spynili, — paviedamili «Našaj Nivie» ŭ adździele prodažaŭ pradpryjemstva. — Pierastroicca było nieskładana: niekalki hadoŭ tamu my ŭžo vypuskali miedycynski kisłarod, zabiaśpiečvali našu balnicu».
U Śvietłahorskuju CRB pastaŭlajuć da 190 bałonaŭ u sutki, u Rečyckuju (jana bolšaja) — da 290.
«Hruzim kruhłasutačna. Śpiecyjalist pa realizacyi na telefonie z samaha ranku i na vychodnyja zvanki prymaje. Viaducca pieramovy i ź inšymi miedycynskimi ŭstanovami», — kažuć na pradpryjemstvie.
«Adhruzili bolš za 450 bałonaŭ»
Z suboty miedycynski kisłarod pačali pastaŭlać «Naftan» i «Palimir».
«Dahetul my rabili tolki techničny kisłarod dla mantažnikaŭ, budaŭnikoŭ. Zabiaśpiečvali im siabie i arhanizacyi-padradčykaŭ. Dla vytvorčaści miedycynskaha kisłarodu novych śpiecyjalistaŭ nie najmali. Asnoŭnyja ŭstanoŭki zastalisia tyja ž, tut bolš arhanizacyjnyja mierapryjemstvy spatrebilisia. Da miedycynskaha kisłarodu patrabavańni jakaści bolš žorstkija: stupień čyścini, dadatkovyja inšyja pakazčyki», — raskazaŭ namieśnik hienieralnaha dyrektara «Naftana» Siarhiej Jaŭtušyk.
Pavietra biarecca za 2,5 kiłamietra ad zavoda — na bierazie voziera Luchava i ŭ sasnovym bary. Pa pavietrazabory jano pastupaje na stancyju, tam achałodžvajecca da -180 hradusaŭ, stanovicca vadkim i raździalajecca na frakcyi. Ad zaboru da atrymańnia kisłarodu prachodzić kala 10 hadzin. U adnym bałonie — 8 kh (ci 6 mietraŭ kubičnych) hazu. Na kantrol kožnaja partyja vozicca na «Kryjon».
Pradpryjemstvy pastaŭlajuć kisłarod u Navapołackuju haradskuju balnicu. Jak pisała BiełTA, užo adhruzili bolš za 450 bałonaŭ. Štodzionna płanujecca napaŭniać bolš za 250 bałonaŭ (ciapier pastaŭlajecca pa 150 bałonaŭ).
«Hrodna Azot» kupili novuju ŭstanoŭku i najmajuć technołaha
Nikoli raniej nie vyrablaŭ miedycynski kisłarod i «Hrodna Azot». Ciapier jany vypuskajuć jaho ŭ vadkim i hazapadobnym vyhladzie, pastavili dla hetaha novuju ŭstanoŭku Linde. Pieršuju partyju ŭ balnicy adpravili 15 kastryčnika.
Na pradpryjemstvie adkryta vakansija inžyniera-technołaha (na vytvorčaść vadkaha miedycynskaha kisłarodu). Z patrabavańniaŭ da śpiecyjalista — vyšejšaja farmaceŭtyčnaja adukacyja i staž pracy nie mienšy za try hady ŭ arhanizacyjach, jakija vypuskajuć leki ci kantralujuć ich jakaść.
Pa słovach namieśnika hienieralnaha dyrektara pa kamiercyjnych pytańniach Paŭła Balabina, «Hrodna Azot» hatovy całkam zakryć patreby abłasnych balnic u hazapadobnym kisłarodzie.
Jakaja patreba ŭ kisłarodzie pa krainie?
Niadaŭna Alaksandr Łukašenka zajaviŭ, što ŭ krainie zadziejničana pałova kisłarodnych kropak.
«U nas tolki 52% zaniata, jak tak nie chapaje kropak dla kisłarodu?» — skazaŭ jon padčas vizitu ŭ Lidskuju rajonnuju balnicu.
Ale pa inšych aficyjnych paviedamleńniach, patreba ŭ kisłarodzie bolš vysokaja. U Viciebskaj vobłaści paviedamlali, što zadziejničana 84% kisłarodnych kropak. U mnohich balnicach u čaćviortuju chvalu ŭvodzili dadatkovyja kropki.
Asnoŭny vytvorca miedycynskaha kisłarodu «Kryjon» ciapier pracuje na maksimum i vypuskaje pa 200 ton kisłarodu ŭ sutki.
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja13
Kamientary