Šrajbman: Što ruchaje inicyjatarami zabastoŭki, ja nie viedaju. U takuju stupień adarvanaści ad damašniaha kantekstu ja nie vieru
Palityčny analityk Arciom Šrajbman u svaim telehram-kanale piša, što nie tak z zabastovačnaj inicyjatyvaj Dyleŭskaha i kampanii.
Inicyjatyva Biełaruskaha abjadnańnia rabočych i «Jeŭrapiejskaj Biełarusi» (aka «Chartyja' 97») ab praviadzieńni zabastoŭki z 1 listapada, jakuju padtrymali Valeryj Capkała i Dźmitryj Bałkuniec i padśviatlili «niekatoryja» kanały, pieršapačatkova zdavałasia miortvanarodžanaj.
Nie źjaviłasia dadatkovych pieradumoŭ dla zabastoŭki ŭ paraŭnańni z časam, kali jana nie ŭdałasia ŭ 2020 hodzie. Ekanomika jašče nie pačała padać, padstaŭ dla abureńnia rabočych čysta emacyjna 13-14 miesiacaŭ tamu było bolš, čym ciapier, aktyvistaŭ z zavodaŭ mietadyčna prybirali ŭvieś hety hod.
Čakana, apazicyjnyja štaby — Cichanoŭskaja, Łatuška i aktyvisty partyi Babaryki (jakija čamuści napisali i vydalili pra heta post) — dystancyjavalisia ad inicyjatyvy. Jany ŭśviedamlajuć, jakim imidžavym udaram byŭ by hety chałasty streł, kali b jany ŭsie ŭ heta ŭpisalisia.
Što ruchaje inicyjatarami zabastoŭki, ja nie viedaju. U takuju stupień adarvanaści ad damašniaha kantekstu ja nie vieru.
Pieršaja viersija — žadańnie abvastrać, kab ułada taksama adkazała eskałacyjaj i, adpaviedna, taksama padliła masła ŭ ahoń kryzisu. A dzie eskałacyja, tam i pamyłki. Dzie pamyłki, tam mahčymaści. Heta źlohku antyhumanna ŭ adnosinach da bajcoŭ na ziamli, ale niekatoryja ludzi dumajuć pa-vajennamu: kali patrebnyja achviary dla ahulnaj spravy — tak tamu i być.
Druhaja viersija — mienš vysakamoŭnaja, i jana źviazanaja z dedłajnami ad donaraŭ, jakim treba pakazać aktyŭnaść. Ja viedaju, što heta hučyć jak BT-šnaja prapahanda, ale časam 2+2 — čatyry, navat kali toje ž samaje vam kažuć i ludzi z hnutkim sumleńniem abo zusim bieź jaho.
Sam hety incydent stavić lidaraŭ, u pieršuju čarhu Cichanoŭskuju, u niazručnaje stanovišča. Jana ciapier, atrymlivajecca, mała taho, što pa fakcie zaklikaje rabočych nie słuchacca tych, chto zavie ich strajkavać, dyk jašče i jaje inicyjatary zabastoŭki ŭ vyniku abvinavaciać u pravale. Maŭlaŭ, kali b nas padtrymała lidar, usio było b inakš.
Pakul Cichanoŭskaja sprabuje prajści pamiž strumieńčykami, i ja ŭpeŭnieny, što taktykaj jaje ofisa 1-2 listapada budzie maŭčać i pastaracca jak maha chutčej zajhrać hetuju temu. Ale stvorany tryvožny dla ich precedent.
Raniej parasonavaj lehitymnaści abranaha lidara, pryznanaj navat kankurentami i skieptykami ŭnutry apazicyi, chapała, kab hasić lubyja sieparatnyja inicyjatyvy ŭ zarodku ci ŭklučyć ich u svoj paradak dnia. Nie afilavanyja ni z kim aktyvisty, błohiery i palityki, jakim nie padabałasia palityka ofisa Śviatłany, mahli krytykavać jaje daradcaŭ, ale nie stavili pad sumnieŭ jaje status i nie rabili ničoha surjoznaha papiarok palityki ofisa ŭ Vilni.
Ciapier ža adbyvajecca pieršy dosyć prykmietny aŭtanomny krok nasupierak pazicyi Cichanoŭskaj, dy i astatnich lidaraŭ u vyhnańni. Značyć, jaje ŭpłyŭ padaje, i dalej inšyja hrupy ŭnutry apazicyi mohuć dazvolić sabie takija ž demaršy.
Kali nie źjavicca niejkaj novaj abjadnaŭčaj paviestki abo dynamiki ŭnutry krainy, što zasłaniaje saboj usio i ŭsich, čahości, što nahadaje demakratyčnym siłam, u čym sens trymacca razam, centrabiežnaja tendencyja praciahniecca.
«Jana mocna vyrasła»: Alaksiej Vieniadziktaŭ pra intervju ź Cichanoŭskaj
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary