Biełaruski maršrut: jak mihranty ź Iraka traplajuć praź Minsk u ES
Šlach, pa jakim nielehałaŭ ź Iraka i Siryi dastaŭlajuć u Biełaruś, a zatym — u Polšču i Hiermaniju, poŭny ryzyk i niebiaśpiek. Rasśledavańnie ab sumnieŭnaj vydačy biełaruskich viz i arendzie samalotaŭ apublikavała vydańnie DW.
Pieradusim ličby: z pačatku kastryčnika polskija pamiežnyja słužby zafiksavali 11 300 sprob nielehalnaha ŭjezdu ŭ krainu ź Biełarusi. Usiaho ž u hetym hodzie zarehistravana kala 23 000 takich sprob. Apynuŭšysia ŭ Polščy, mnohija mihranty imknucca dabracca da miažy z Hiermanijaj. Pavodle źviestak niamieckaj palicyi, u kastryčniku praź Biełaruś i Polšču ŭ FRH nielehalna zajechali 4900 mihrantaŭ — udvaja bolš, čym u vieraśni.
U hetym hodzie niamieckaja palicyja zarehistravała 7300 niesankcyjanavanych sprob praniknieńnia na terytoryju krainy pa biełaruskim maršrucie, jaki ŭźnik paśla taho, jak viasnoj Alaksandr Łukašenka zajaviŭ, što bolš nie budzie spyniać nielehałaŭ, jakija nakiroŭvajucca ŭ ES. Jakimi sposabami mihranty dabirajucca da Minska i adkul jany?
Adkul jeduć mihranty
Bolšaść nielehalnych mihrantaŭ, jakija sprabujuć praź Biełaruś trapić u Jeŭrasajuz, — heta hramadzianie Iraka. Radziej siarod ich — žychary Siryi, Konha i Kamieruna. U stalicu Biełarusi jany prybyvajuć u asnoŭnym z troch haradoŭ na terytoryi irakskaha Kurdystana: Erbila, Šyładze i Sulejmanii — pad ciskam ES Irak sa žniŭnia admianiŭ pramyja rejsy ŭ Minsk z Bahdada.
Pavodle źviestak miascovych turystyčnych ahienctvaŭ, mihranty dabirajucca ŭ Biełaruś taksama praz Dubaj, Turcyju, Livan i Ukrainu. Prykmietna pavialičyłasia i kolkaść pramych rejsaŭ u Minsk ź Biejruta, Damaska i stalicy Iardanii Amana.
Kolki kaštuje dabracca da ES
Pa roznych acenkach, padarožža ź Irana ŭ ES abychodzicca ad 12 tys. da 15 tys. jeŭra — u hetuju sumu ŭvachodziać viza, pieralot u Minsk i hrošy pravadnikam-kantrabandystam za pierapraŭku naziemnym transpartam u Jeŭropu. Supracoŭnik adnaho z turbiuro ŭ Bahdadzie na ŭmovach ananimnaści raspavioŭ DW, što konsulstva Biełarusi ŭ horadzie Erbil «pieradało afarmleńnie viz šerahu turystyčnych ahienctvaŭ».
Jaho turystyčnaje ahienctva taksama da niadaŭniaha času zajmałasia afarmleńniem biełaruskich viz, ale bolš nie prymaje zajaŭ. «Ja nie chaču stavić pad pahrozu svoj biznes», — tłumačyć surazmoŭca DW. Pa jaho słovach, na toje, kab całkam aformić vizu, zvyčajna sychodzić ad piaci dzion da dvuch tydniaŭ.
Jak atrymać biełaruskuju vizu
Jašče niekalki krynic paćvierdzili DW, što ciapier zajavy na atrymańnie biełaruskich viz prymaje nie pasolstva Biełarusi ŭ Iraku, a biełaruskija dypłamatyčnyja pradstaŭnictvy ŭ inšych krainach. Na Youtube možna znajści videarolik rasijskaj kampanii «Zroblena ŭ Rasii 24», u jakim havorycca, što hramadzianie Siryi i Iraka bolš nie mohuć ujechać u Biełaruś u jakaści turystaŭ na zaprašeńnie, kali na im staić piačatka, pastaŭlenaja ŭ aeraporcie vyletu.
Kampanija, jakaja ŭ liku inšaha prapanuje pasłuhi pa atrymańni turystyčnych biełaruskich viz, tłumačyć, što ciapier dla hetaha nieabchodny tak zvany «vizavy stykier», atrymać jaki možna ŭ pasolstvach Biełarusi. Vizy hramadzianam Iraka vydaje biełaruskaje dypłamatyčnaje viedamstva ŭ Ankary.
«Skarystajciesia mahčymaściu»
U Stambule rekłamuje svaje pasłuhi pašpartna-vizavaja słužba VIP Grub: jana abiacaje dastavić svaich klijentaŭ u Jeŭropu «tradycyjnym sposabam», dadajučy, što «Jeŭropie patrebnyja zamiežnyja rabočyja». «Tolki jeŭrapiejskija avijalinii. Nieabchodnyja 1,2 miljona biežancaŭ. Skarystajciesia mahčymaściu. Zapłacicie nam pa prybyćci», — havorycca ŭ rekłamnym abjaŭleńni VIP Grub u Facebook.
Zarehistravanyja ŭ ES kampanii ŭ ciapierašni čas arandujuć samaloty biełaruskaj nacyjanalnaj avijakampanii «Biełavija». Ministry zamiežnych spraŭ krain ES chočuć spynić hetuju praktyku i razhladajuć mahčymaść uviadzieńnia štrafnych sankcyj.
«Avijakampanija «Biełavija» prapanuje pramyja rejsy ŭ Minsk sa Stambuła, Dubaja i inšych haradoŭ. Vam prosta treba tudy dabracca. Heta krychu daražej, ale ŭsio ž mahčyma», — kaža DW bahdadski turapieratar.
Arandavać samalot? Biez prablem
Centram pradastaŭleńnia ŭ arendu łajnieraŭ źjaŭlajecca Irłandyja — irłandskija kampanii kirujuć bolš čym pałovaj usich arandavanych samalotaŭ u śviecie. Niekatoryja firmy pa-raniejšamu zdajuć u arendu samaloty biełaruskamu avijapieravozčyku «Biełavija», jaki, u svaju čarhu, vykarystoŭvaje ich dla dastaŭki mihrantaŭ da miežaŭ ES.
Pradstaŭniki irłandskich kampanij zajaŭlajuć, što jany abaviazany pradastaŭlać samaloty ŭ arendu pavodle raniej zaklučanych pahadnieńniaŭ. Ministr zamiežnych spraŭ Irłandyi Sajman Kovieni zajaviŭ, što jaho kraina padtrymlivaje sankcyi suprać Biełarusi, adnak jany nie raspaŭsiudžvajucca na zaklučanyja raniej damovy ab arendzie.
U inšych avijakampanij, takich jak Qatar Airways i Turkish Airlines, značna bolš strohi paradak kantrolu pasažyraŭ. Ale, jak adznačaje bahdadskaje turystyčnaje ahienctva, niaredka byvaje ciažka vyznačyć praŭdzivy charaktar padarožža. «Štodnia ŭ Turcyju i Dubaj lotajuć sotni irakcaŭ. Vyznačyć, chto ź ich maje namier adpravicca ŭ Biełaruś, niemahčyma», — tłumačyć pradstaŭnik ahienctva.
Na fudkorcie HC «Halereja» pamior 35-hadovy hramadzianin Iraka
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary