Bujny biznesmien Sinicki zapłaciŭ užo 10 miljonaŭ dalaraŭ, ale jaho nie vypuskajuć. Čamu? Tłumačać krynicy
Raniej my paviedamlali pra zatrymańnie bujnoha devełapiera Vitala Sinickaha — jon kiruje kampanijaj «Sihmapolus», jakoj naležać minskija biznes-centry «Tytan», «Civali», «Arłan», «Chvala» (jaje aranduje Wargaming), «Ankor», handlovy centr «Trum», prambaza na Hurskaha, učastak nasuprać Muzyčnaha teatra la płoščy Bahuševiča i hetak dalej.
Sinicki, nazirajučy za situacyjaj u pytańni hetak zvanaha «drableńnia biznesu» ( u pryvatnaści za kampanijaj «21vek»), vyrašyŭ padstrachavacca i napisaŭ na siabie zajavu ŭ padatkovuju z prośbaj pravieści pravierku jaho spravaŭ — i jaho samoha aryštavali.
Čytajcie taksama: Krynicy: zatrymany viadomy biznesmien, ułaśnik «Tytana», «Civali» i «Truma», jon sam napisaŭ na siabie zajavu
Jak ciapier nam viadoma z kułuaraŭ, biznes Sinickaha isnuje ŭ vyhladzie dziasiatkaŭ asobnych jurydyčnych asob, što biełaruskimi orhanami traktujecca jak «drableńnie» biznesu i sychod ad padatkaŭ. Sprava ŭ tym, što z rostam abarotaŭ rastuć padatki, kali ž razvodzić prybytki z roznych abjektaŭ na roznyja jurydyčnyja asoby, to možna zastavacca ŭ ramkach sproščanych sistem padatkaabkładańnia.
Paśle kiejsu «Biełciažmaša» heta ličycca złačynstvam.
Jak viadoma «Našaj Nivie», Sinicki ŭžo kampiensavaŭ jak minimum 10 miljonaŭ dalaraŭ «škody» ŭ spadziavańni na pazityŭnaje vyrašeńnie kryminalnaj spravy, ale heta pakul nie dało plonu.
Prablema ŭ tym, jak tłumačać abaznanyja, što Sinicki za čas svajoj dziejnaści nie zavioŭ patrebnych kantaktaŭ, u vyniku čaho za jaho niama kamu «schadzić i paprasić tam».
«Isnujučaja miechanika vychadu biznesmienaŭ sa śledčaha izalatara — heta kampiensavanaja «škoda». A taksama jašče niekatoryja adličeńni, naprykład, «na sport», i paručalnictva niekalkich čałaviek — čynoŭnikaŭ i biznesmienaŭ z dobraj reputacyjaj u razumieńni Łukašenki, — kažuć krynicy. — Tak, praź instytut hetaha svojeasablivaha paručalnictva ź SIZA vyjšaŭ Hienadź Kirejkaŭ (Green), adnym z paručencaŭ byŭ chakiejny trenier, nabližany da siamji, Dźmitryj Baskaŭ, i jašče dva biznesmieny.
Za Sinickaha jašče nichto nie prasiŭ, a heta aznačaje, što jaho prablema budzie doŭha iści da pieršaha stała — niama kamu pakłaści».
Ciapier Sinicki raspradaje svaju majomaść.
Kamientary