Pradstaŭnik Hiermanii: Situacyja ŭ Biełarusi horšaja, čym na Kubie i ŭ Iranie
«Režym zakryvaje apošnija mahčymaści dla samavyjaŭleńnia hramadzianskaj supolnaści, likviduje navat zusim niepalityčnyja arhanizacyi», — zajaviŭ na «Minskim forumie» Matyjas Lutenbierh, dyrektar Upraŭleńnia MZS FRH pa krainach Uschodniaj Jeŭropy, Kaŭkazie i Centralnaj Azii.
«Navat u Vieniesuele, na Kubie, u Iranie indeksy pavahi da pravoŭ čałavieka lepšyja, čym u siońniašniaj Biełarusi», — cytuje niamieckaha dypłamata «Niamieckaja chvala».
U padziejach na biełaruska-polskaj miažy, «cyničnaj instrumientalizacyi» mihrantaŭ Lutenbierh bačyć «dokaz biezahladnaści» ciapierašniaj ułady ŭ Biełarusi.
Dypłamat nahadaŭ pra toje, što ministry zamiežnych spraŭ krain Jeŭrasajuza damovilisia ab uviadzieńni piataha pakieta sankcyj suprać biełaruskich uładaŭ. Jon uklučaje i mahčymaść prymianieńnia sankcyj suprać trecich krain abo fihurantaŭ, naprykład, zamiežnych avijakampanij abo turfirm, jakija ŭdzielničajuć u pieravozcy mihrantaŭ da miežaŭ ES.
Što ž tyčycca zvankoŭ vykanaŭcy abaviazkaŭ kanclera Mierkiel Łukašenku, to, jak adznačyŭ Lutenbierh, heta zusim nie było śviedčańniem pryznańnia jaho lehitymnaści. Metaj telefonnaj razmovy było praduchilić dalejšuju hibiel ludziej la miažy i eskałacyju situacyi. Pry hetym jon nazvaŭ prapahandysckim fejkam paviedamleńni niekatorych biełaruskich ŚMI ab tym, što Mierkiel nibyta paabiacała Łukašenku pryniać da dźviuch tysiač mihrantaŭ ź Biełarusi. Naadvarot, Hiermanija kateharyčna ličyć, što Biełaruś pavinna viarnuć mihrantaŭ u krainy pachodžańnia.
Kuba — heta kamunistyčny tatalitarny režym, a Iran — šyickaja teakratyja. Biełaruś, adnak, u 2021 hodzie abahnała ich pa kolkaści palitźniavolenych.
«Minski forum», jaki z 1997 hoda štohod pravodziła ŭ Minsku Niamiecka-biełaruskaje tavarystva (DGB), u hety raz prachodziŭ u vyhnańni. Pieršaje pasiadžeńnie było ŭ Vilni, druhoje — u Varšavie, a treciaje — 19 listapada ŭ Bierlinie. Taki farmat foruma simvalična padkreślivaje adzinstva pazicyj Niamieččyny, Polščy i Bałtyi pa biełaruskim pytańni.
Vyhladaje, što sproba nacisnuć na jeŭrapiejcaŭ temaj mihrantaŭ nie tolki pravaliłasia, ale pahoršyła i biez taho sapsavanyja adnosiny Biełarusi z krainami Jeŭropy. Jana pryviała da stvareńnia Jeŭrasajuzam pravavoj asnovy dla ŭviadzieńnia novych sankcyj u adpłatu. Sami sankcyi pakul nie ŭviedzienyja, Biełaruś u apošnija dni adviała asnoŭnyja hrupy mihrantaŭ ad miažy.
Z kateharyčnymi zajavami adnosna Biełarusi vystupili taksama pradstaŭniki šerahu inšych jeŭrapiejskich krain i struktur Jeŭrasajuza.
Hałoŭny pres-sakratar Jeŭrakamisii Eryk Mamier (Eric Mamer) zajaviŭ u piatnicu, što pieramoŭ ź Minskam nie budzie, a «techničnyja razmovy», jakija byli anansavanyja ŭ sieradu, 17 listapada, buduć tyčycca vyklučna repatryjacyi mihrantaŭ, jakija apynulisia ŭ pastcy na miažy. Pryčym hetyja razmovy buduć adbyvacca miž Biełaruśsiu i Vysokim kamisaram AAN pa ŭciekačach i Mižnarodnaj arhanizacyjaj pa mihracyi, adznačaje vydańnie EuObserver. «Nie idzie havorki pra pieramovy z režymam Łukašenki»», — adznačyŭ Mamier.
Kamientary