Dla žychara Navapołacka, jaki raskidaŭ «vožykaŭ» na darozie, prakuror patrabuje 11 hadoŭ kałonii
U sudzie Połackaha rajona praciahvajecca razhlad kryminalnaj spravy navapołackaha ramieśnika Rusłana Słuckaha. Jaho vinavacć u zamachu na pryviadzieńnie ŭ nieprydatnaść čyhunačnych šlachoŭ znosin (č. 1 art. 14, č. 1 art. 309 KK), a taksama akcie teraryzmu (č. 1 art. 289 KK), paviedamlaje mediazona.by.
Razhlad spravy pačaŭsia 13 śniežnia. Pavodle abvinavačvańnia, 14 listapada 2020 hoda jon na 122-123 kiłamietry darohi R-20 «raskidaŭ na pałasie ruchu nie mienš za 12 samarobnych «vožykaŭ» i mietaličnych šypoŭ, dakładna viedajučy pra hrupu aŭtamabilaŭ, jakija ruchajucca pa nazvanaj darozie, što ŭdzielničali ŭ patryjatyčnym aŭtaprabiehu «Za adzinuju Biełaruś».
U vyniku takich dziejańniaŭ čatyry aŭtamabili, jakija ŭdzielničali ŭ prabiehu, prakałoli šyny.
Pa viersii abvinavačvańnia, ahulny pamier naniesienaj škody skłaŭ 63 rubli i 51 kapiejku. Adnak paciarpiełymi pa spravie pryznanyja bolš za 70 udzielnikaŭ aŭtaprabiehu, u tym liku čałaviek z proźviščam Azaronak.
Taksama, pa viersii śledstva, u noč na 28 kastryčnika 2020 hoda Słucki z dapamohaj drotu pasprabavaŭ paškodzić sistemu sihnalizacyi na 647 kiłamietry treciaha čyhunačnaha puci ŭ Połackim rajonie, adnak nie zmoh davieści pačataje da kanca, bo jamu nie chapiła zakładnych vintoŭ i samoha drotu.
Pa pradjaŭlenych abvinavačvańniach Słucki pryznaŭ vinu častkova. U pieršy dzień razboru ŭ sudzie apytali 12 paciarpiełych, ź jakich ni adzin nie zapatrabavaŭ kampiensacyi maralnaj škody.
U sudzie paciarpiełyja raspaviali, što dva aŭtamabili, jakija najechali na «vožyki», naležali miascovym rehijanalnym ŚMI, a jašče adzin — adnamu z kiraŭnikoŭ hramadskaj arhanizacyi «Patryjoty Biełarusi».
Słuckaha zatrymali 20 studzienia 2021 hoda, a 23 studzienia ramieśnika zaklučyli pad vartu.
Da paviedamleńnia milicyi było dałučanaje videa, u jakim zatrymany raspaviadaŭ pra toje, jak ździejśniŭ złačynstva.
«Padrychtavaŭ mietaličnyja šypy, «vožyki» u prosty lud, z metaj, jak by naškodzić. Nu, kali hetyja aŭtaprabiehi prachodziać. Nu, daviedaŭsia, [što] u nas u Navapołacku budzie prachodzić. Usie ŭziaŭ z saboj ich, zahadzia narychtavanyja. Kali kałona kranułasia ŭžo, napierad źjechaŭ, tam nie pamiataju ŭžo, nakolki. Usio, vykinuŭ ich, atrymlivajecca, z mašyny, i pajechaŭ dadomu», — kazaŭ jon na kamieru.
Kamientary