Fota: depositphotos.com
U aŭtorak rublovy indeks Maśbiržy da zakryćcia asnoŭnych tarhoŭ upaŭ na 6,5% da adznaki 3328,94 punkta, dalaravy indeks RTS — na 7,29%, da 1367,45 punkta. Heta maksimalnaje padzieńnie z 12 sakavika 2020 hoda, to-bok z pačatku pandemii karanavirusa, jakaja paciahnuła abvał suśvietnych rynkaŭ. Tady indeks Maśbiržy ŭpaŭ na 8,28%. Ciapier indeks straciŭ uvieś rost z pačatku 2021 hoda — bolš za 15%.
Akcyi «Hazprama» ŭ aŭtorak upali na 7,3%, Aščadbanka — na 10,3%, «Rasnafty» — na 9,8%.
U sieradu rasijski rynak akcyj na ranišniaj handlovaj siesii praciahnuŭ padzieńnie.
Ekśpierty sychodziacca ŭ mierkavańni, što asnoŭnaj pryčynaj padzieńnia rynkaŭ stała hieapalityka, a mienavita aściarohi nakont mahčymaha rasijskaha ŭvarvańnia va Ukrainu.
«Rasijski rynak praciahvaje źnižeńnie na fonie eskałacyi i hieapalityčnych ryzyk vakoł pieramovaŭ Rasija — ZŠA i Rasija — NATA, a taksama Ukrainy, — vynikaje z kamientaryja inviestycyjnaj kampanii «Aton». — Adsutnaść prahresu ŭ pieramovach i ŭsio bolš vajaŭničaja rytoryka z abodvuch bakoŭ admoŭna adbivajucca na apietycie da ryzyki ŭ dačynieńni da rasijskich aktyvaŭ, u pryvatnaści — akcyj».
Pry hetym na rynku enierhanośbitaŭ situacyja praciahvaje zastavacca stabilnaj, a najbližejšy fjučars na naftu marki Brent utrymlivaje pazicyi vyšej za 87 dołaraŭ za barel. Adnak navat heta nie ratuje situacyju.
«Pakul nie bačna faktaraŭ, jakija byli b zdolnyja palepšyć situacyju. U bližejšy čas na rynak moža praciahnuć cisnuć hieapalityčny faktar i paharšeńnie nastrojaŭ na suśvietnych fondavych placoŭkach. Pry hetym vysokija ceny na naftu na biahučy momant ihnarujucca fundatarami»,
— raspavioŭ hałoŭny analityk finansavaha supiermarkieta «Banki.ru» Bahdan Zvaryč.
Hieapalityka stała hałoŭnaj pryčynaj paničnych nastrojaŭ i na finansavym rynku Ukrainy.
Za dva tydni z pačatku hoda hryŭna patańnieła da dalara na 1,14 adzinki. Kurs pierasiahnuŭ psichałahičnuju adznaku ŭ 28 hrn za dołar i nabližajecca da 28,5 hrn. Nacbank sprabuje padtrymlivać kurs hryŭny z dapamohaj dołaravych interviencyj, paviedamlaje ŭkrainskaja słužba BBC.
U Nacbanku asnoŭnaj pryčynaj padzieńnia kursu hryŭni nazyvajuć reakcyju ŭdzielnikaŭ rynku na hieapalityčnyja padziei vakoł Ukrainy, to-bok na pahrozu rasijskaha ŭvarvańnia.
Siońniašnija nastroi inviestaraŭ ekśpierty nazyvajuć panikaj.
«My bačym vialikuju zakłapočanaść, pierš za ŭsio, z boku zamiežnych inviestaraŭ, situacyjaj kala ŭkrainskaj miažy, my bačym vialiki adtok kapitału ź mižnarodnych ablihacyj Ukrainy. Na praciahu apošnich dvuch tydniaŭ zamiežniki aktyŭna pradajuć unutranyja dziaržablihacyi, jakija handlujucca ŭ hryŭnach. Jany mianiajuć hryŭny na dalary i stvarajuć dadatkovy cisk na kurs», — tłumačyć kiraŭnik analityčnaha adździeła inviestycyjnaj kampanii Concorde Capital Alaksandr Paraščyj.
«Jość prosty adkaz. I jasna adno. Pucin»,
— prakamientavaŭ stanovišča na ŭkrainskim finansavym rynku inviestycyjny bankir Siarhiej Fursa.