Takajeŭ nazvaŭ praliki Nazarbajeva urokam budučym prezidentam Kazachstana
Pieršy prezident Kazachstana Nursułtan Nazarbajeŭ, jak i inšyja suśvietnyja lidary, rabiŭ praliki, zajaviŭ siońniašni kiraŭnik dziaržavy Kasym-Žamart Takajeŭ. Adnak niedachopy jość va ŭsich lidaraŭ, tamu ačarniać svajo minułaje nie varta.
Mahčymyja praliki Nursułtana Nazarbajeva treba razhladać jak uroki dla budučych kiraŭnikoŭ krainy, zajaviŭ prezident Kazachstana Kasym-Žamart Takajeŭ, piša RBK. U toj ža čas, pavodle jaho słoŭ, nielha zabyvać i ab «histaryčnych zasłuhach» pieršaha prezidenta krainy.
«Davajcie i my addamo naležnaje histaryčnym zasłuham pieršaha prezidenta [Kazachstana Nursułtana Nazarbajeva], vyłučym na pieršy płan jaho niesumnieŭnyja pośpiechi, a mahčymyja praliki pakiniem u nastaŭleńnie budučym kiraŭnikam našaj krainy», — skazaŭ Takajeŭ.
Pa jaho słovach, niedachopy ŭłaścivyja kiraŭnikam lubych krain. «Niedachopy byli ŭłaścivyja i amierykanskim prezidentam, i kitajskim kiraŭnikam. I navat sinhapurskamu lidaru Li Kuan Ju, pra jakoha ciapier usio tak dobra adhukajucca», — adznačyŭ Takajeŭ, patłumačyŭšy, što nie pamylajecca tolki toj, chto nie pracuje.
U toj ža čas, pa jaho słovach, narod, jaki ačarniaje svajo minułaje, nie maje budučyni.
Na pačatku studzienia ŭ Kazachstanie pačalisia pratesty, źviazanyja z rezkim rostam cenaŭ na aŭtamabilny haz, jakija chutka pieraraśli ŭ vuličnyja biesparadki i pahromy. Epicentram vuličnych biesparadkaŭ stała byłaja stalica Kazachstana, horada Ałmaty. Siarod łozunhaŭ pratestoŭcaŭ byŭ «Nazarbajeŭ, sychodź». Nazarbajeŭ pakinuŭ pasadu prezidenta ŭ sakaviku 2019 hoda, ale zachavaŭ upłyŭ u krainie i klučavyja pasady.
Da 5 studzienia situacyja vyjšła z pad-kantrolu miascovych siłavych struktur, udzielniki biesparadkaŭ razhramili budynak haradskoj administracyi i rezidencyju prezidenta ŭ hetym horadzie, udzielničali ŭ pierastrełkach z palicyjaj i vajskoŭcami. Takajeŭ źviarnuŭsia pa dapamohu da ADKB, Nazarbajeŭ źjaviŭsia pierad videakamierami tolki 18 studzienia, zajaviŭšy, što Takajeŭ kantraluje ŭładu ŭ krainie, a sam jon daŭno na piensii. Taksama byli pazbaŭlenyja pasadaŭ niekalki svajakoŭ Nazarbajeva.
Kamientary