Katastrofa ŭ paliklinikach. Hihanckija čerhi na čatyry-šeść hadzin, sotni ludziej u kalidorach
«Amikron» i ihnaravańnie masačnaha režymu dali vynik — u biełaruskich paliklinikach nievierahodnaja kolkaść ludziej ź simptomami kavidu namahajecca trapić da terapieŭtaŭ. Nahadajem, ŭčora aficyjnaja statystyka pakazała čarhovy rekord pa kolkaści zachvarełych za sutki — 2387.
Čytačy paviedamlajuć, što prablemy pačalisia jašče pierad vychadnymi.
«Na try kabiniety ŭ piatnicu było čałaviek 50-60 u čarzie. Siadziać adzin na adnym, — piša čytač «Našaj Nivy» ź Minska, jaki naviedvaŭ u piatnicu 26-uju palikliniku. — Ničoha ź minułaha hoda nie źmianiłasia. Ludziam prapanujuć čakać u aktavaj zale. Ale tudy isci nichto nie choča: usie siadziać pad dźviaryma i pilnujuć čarhu. Atmaśfiera niervovaja, bo čakać treba hadziny 2-3».
A voś takaja situacyja była ŭ sieradu ŭ 9-j paliklinicy Minska, adznačaje čytačka.
«Treba było dźvie z pałovaj hadziny čakać pryjoma z hatovym testam», — kaža žančyna.
Z paniadziełka vybuchnuła: amal paŭsiul dziasiatki čałaviek čakajuć pryjomu i testaŭ PŁR. Voś što pišuć našy čytačy.
«Vośmaja paliklinika Minska. Čas 7:40, — paviedamlaje naš čytač i dasyłaje fota elektronnaha tabło z čarhoj. — Užo na 9:34 u čarzie było kala 380 čałaviek. Pa maich padlikach, čas čakańnia — kala šaści hadzin pry takoj dynamicy».
«Paliklinika 27-ja horada Minska, — kaža jašče adzin čytač. —Čarha ludziej, u jakich tempieratura, u 9 ranicy ŭ infiekcyjny kabiniet — na ŭsie try pavierchi i na vulicy — na daŭžyniu budynka. Ludzi pieššu prychodziać vyklikać doktara na dom dla siabie i rodnych z vysokaj tempieraturaj, tamu što ŭ palikliniku datelefanavacca nielha».
«Urač prymała vielmi chutka, paru chvilin na čałavieka. Ale try hadziny ŭ čarzie ja prastajała», — adznačaje pacyjentka 16-j palikliniki Minska.
«A voś takaja čarha na PŁR-test u 5-j paliklinicy. Čas 10:30», — dasyłaje fota čytač.
«Mama staić u čarzie kala 6-j palikliniki ŭ Minsku. Ludzi stajać na vulicy, lekar pracuje z 9 ranicy, ciapier u čarzie 69 čałaviek», — pišuć čytačy. I praciahvajuć dasyłać fota i videa ŭ redakcyju.
Navat dziaržaŭnyja ŚMI pryznajuć prablemu.
«Siaredni čas čakańnia ŭ čarzie ŭ paliklinicy ŭžo pieravyšaje 1,5 hadziny. U 8-j haradskoj paliklinicy (Pieršamajski rajon) za hadzinu na adnym z učastkaŭ byli pryniatyja 24 čałavieki, ale čarha nie skaračajecca.
Simptamatyka ŭ bolšaści pacyjentaŭ padobnaja: vysokaja tempieratura, bol ŭ horle, myšačnaja słabaść. Simptomy padychodziać da novaha štama karanavirusa «amikron», — pišuć «Minsk-Naviny».
Prablema vialikich čerhaŭ zakranuła nie tolki Minsk. Anałahičnaja situacyja ŭ Breście, Homieli i inšych abłasnych haradach.
Prablema jość i ŭ nievialikich haradach. Voś što piša čytač sa Smalavičaŭ:
«1,5 hadziny ŭ čarzie na vulicy. I ŭžo hadzina ŭ čarzie ŭ pamiaškańni, — piša naš čytač. — Čarha ruchajecca vielmi marudna. Ludzi z tempieraturaj, kašlajuć. Kamuści, jak mnie, naprykład, patrebny dakumient ad doktara na PŁR, bo bieź jaho nielha pajści na pracu.
Niekatoryja ludzi praź niejki čas sychodziać, a potym znoŭ viartajucca, što stvaraje kanfliktnyja situacyi. Niekatoryja skardziacca na toje, što im, chvorym, treba stajać na vulicy na choładzie».
«Palikliniki zachłynajucca». Što kažuć na haračaj linii ministerstva achovy zdaroŭja?
Čytačka «Našaj Nivy» patelefanavała na haračuju liniju Ministerstva achovy zdaroŭja i spytała, jak patrapić na pryjom da ŭrača.
«Nie chapaje śpiecyjalistaŭ, šmat chto chvareje. Takaja situacyja ŭžo niekalki dzion u mnohich paliklinikach horada, — adkazali na haračaj linii Ministerstva achovy zdaroŭja. — U piatnicu išli zvanki ad ludziej, i siońnia taksama. My pieradajom skarhi, prośby ŭ administracyju palikliniki, kab jany pryniali miery. Mahu prapanavać vam patelefanavać u Kamitet achovy zdaroŭja. Jon kuryruje ŭsie palikliniki».
U Kamitecie achovy zdaroŭja Minharvykankama adznačyli, što daktary nie spraŭlajucca:
«Vam patrebnaja dapamoha ci balničny? Ci što? Palikliniki zachłynajucca. Nie paśpiavajuć absłuhoŭvać nasielnictva. Ja b hetyja pytańni vyrašała z zahadčycaj palikliniki, kali lepš padyści. Damovicca ź joj na peŭny čas. Ranicaj było šmat ludziej. A ciapier palikliniki telefanujuć i kažuć, što na vulicy nikoha niama. Ludzi ŭžo ŭ budynku. Budzie lepš za ŭsio, kali vy ŭsio ž damoviciesia z zahadčycaj ci ŭ rehistratury, na jaki čas vam možna pryjści».
Aficyjna. Čerhi ŭ Minsku rehulujuć u ručnym režymie
Kamitet pa achovie zdaroŭja Minharvykankama ŭ ručnym režymie rehuluje pryjom pacyjentaŭ pa kožnaj paliklinicy», — pišuć «Minsk-Naviny».
Situacyju z čerhami prakamientavała i staršynia Kamiteta pa achovie zdaroŭja Minharvykankama Alena Bohdan.
«Naturalna, heta źviazana z tym, što siońnia pieršy pracoŭny dzień paśla vychadnych, i na fonie rostu zachvorvalnaści na VRVZ i karanavirus štama «amikron», jaki taksama praciakaje ŭ bolšaści vypadkaŭ jak vostraja reśpiratornaja infiekcyja, da adkryćcia našych paliklinik u čyrvonyja zony źviarnułasia dosyć vialikaja kolkaść ludziej.
Zvarot pacyjentaŭ źviazany z najaŭnaściu skarhaŭ i žadańniem zdać PŁR-test. Vialikaja prośba, kali vy siońnia chočacie prosta zdać test, adkładzicie heta, kali łaska, na druhuju pałovu dnia ci na zaŭtra—paślazaŭtra».
«Amikron», novy štam karanavirusa, vyłučajecca siarod inšych vialikaj zaraznaściu — jon vielmi chutka raspaŭsiudžvajecca, adzin chvory moža zarazić da sotni.
Niadaŭna Łukašenka zajaviŭ, što druhi raz pierachvareŭ «karonaj», ciapier užo jakraz «amikronam». Jon vykazaŭsia, što padtrymlivaje niejkaha vučonaha, jaki prapanavaŭ, kab usie pierachvareli na «amikron», i heta «budzie jak vakcyna dla nas».
«Z majho punktu hledžańnia — idealnaja prapanova», — skazaŭ Łukašenka.
Pry hetym sam Łukašenka chvarobu pieranios na nahach, praciahvaŭ pravodzić sustrečy i mierapryjemstvy, ludzi na ich byli biez masak.
Kamientary