Jak ciapier žyvie piensijanierka, pra «pałac» jakoj paśla pikieta Cichanoŭskaha ŭ 2020 hodzie havaryŭ Łukašenka
Hrodzienka Halina Filipaŭna Andrejčyk stała znakamitaj 29 maja 2020 hoda, kali na pikiecie pa zbory podpisaŭ za vyłučeńnie Śviatłany Cichanoŭskaj u kandydaty ŭ prezidenty ŭ centry Hrodna niečakana trapiła ŭ strym Siarhieja Cichanoŭskaha i vykazała ŭsio, što dumała pra situacyju ŭ krainie i dziejnuju ŭładu. Praź niekalki dzion piensijanierku ŭ svajoj pramovie zhadaŭ Łukašenka — maŭlaŭ, pažyłaja žančyna «kryčała i harłała», a jaje dom nazvaŭ «pałacam». Paśla hetaha na dziaržkanałach vychodzili siužety pra siamju Haliny Filipaŭny i jaje «katedž» — praŭda, z samoj hierainiaj siužetaŭ supracoŭniki nie razmaŭlali. Błoh «Otražienije» pahutaryŭ ź piensijanierkaj i daviedaŭsia, jak jana ciapier žyvie.
Halina Filipaŭna — kandydat ekanamičnych navuk. U svoj čas jana pracavała i ŭ Hrodzienskim dziaržuniviersitecie imia Janki Kupały, i ŭ miedycynskim univiersitecie, i ŭ inšych VNU Hrodzienščyny. Čytała lekcyi — spačatku pa palitekanomii, a potym pa ekanomicy. Na piensiju vyjšła tolki ŭ 2011 hodzie, kali mocna zachvareła. A da hetaha, akramia vykładańnia, zajmałasia navukaj.
U mai 2020 hoda jana raskazvała partału TUT.BY, što ŭžo na piensii stała asvojvać Internet. Naprykład, prahledzieła ŭsie roliki na YouTube-kanale Cichanoŭskaha, stała jaho prychilnicaj i addanaj «fanatkaj». A jašče dziakujučy videarolikam błohiera zmahła ŭbačyć, jak žyvuć ludzi ŭ vialikich haradach i maleńkich vioskach.
— Tam ža haleča, pahladzicie, jakaja, — kazała Halina Filipaŭna.
Sama jana na svajo finansavaje stanovišča nie skardziłasia: majučy 50-hadovy pracoŭny staž, atrymlivaje hodnuju piensiju. Ale žančyna pieražyvała za inšych piensijanieraŭ, razumiejučy, što vielmi mnohim žyć nialohka.
Uviečary 29 maja 2020 hoda jana pajechała na Savieckuju płošču ŭ Hrodnie, dzie prachodziŭ pikiet pa zbory podpisaŭ za vyłučeńnie Śviatłany Cichanoŭskaj u kandydaty ŭ prezidenty. U abłasny centr tady pryjechaŭ Siarhiej Cichanoŭski. Da svajho zatrymańnia jon mieŭ znosiny z hrodziencami i vioŭ strym.
U niejki momant Cichanoŭski padyšoŭ da Haliny Filipaŭny, i jana vykazała jamu ŭsio, što dumaje. Kazała «pra razvał krainy», rezka vykazałasia pra toje, što adbyvajecca, i pra dziejnuju ŭładu. Havaryła emacyjna i doŭha.
Impravizavanaje vystupleńnie babuli kranuła ludziej i na samoj płoščy, i ŭ Siecivie. A praź niekalki dzion paniesłasia: fatahrafiju doma, dzie žyvie Halina Filipaŭna, źniatuju dronam, tahačasny kiraŭnik KDB Valeryj Vakulčyk adnios Łukašenku. Toj nazvaŭ Halinu Filipaŭnu «biedałažkaj».
— «Łukašenka drenny», a sami žyvuć u pałacach. Niejkaja 80-hadovaja žančyna kryčała, harłała. Dasłali mnie fatahrafiju: asabniak syna i jaje asabniak na adnoj placoŭcy. Čaho tabie nie chapaje? — kazaŭ sam Łukašenka.
Potym siužet pra piensijanierku pakazali na dziaržkanałach. Halina Filipaŭna paśla ŭsich hetych padziej vielmi źniervavałasia, raschvalavałasia. Pakazvała svaje «pałacy» — niedabudavanyja maleńki domik i vialiki dom, dzie jana žyvie razam ź siamjoj i jaki budavali ŭsie razam šmat hadoŭ. Dziviłasia, što supracoŭniki dziaržSMI ź joj tak i nie pahavaryli.
Zrešty, z taho momantu jaje nie turbavali. Dronaŭ jana, va ŭsiakim razie, nad domam bolš nie bačyła.
Ciapier, raskazvaje Halina Filipaŭna, pra jaje nichto nie ŭspaminaje i da jaje dadomu bolš nichto nie prychodziŭ.
— Spačatku było strašna. A ciapier — nie. Kali ŭ ich buduć [pytańni] da mianie ci zachočuć mianie zabrać, to ja ŭjaŭlaju, jak jany mianie, amal nie chadziačuju, paciahnuć kudyści. Voś ja pahladžu na heta,
— kaža Halina Filipaŭna i, znoŭ krychu pamaŭčaŭšy, praciahvaje.
— Viedajecie, mnie 83-ci hod idzie. I ja ŭsio jašče spadziajusia, što dažyvu … dažyvu da dobrych časoŭ, da inšaj ułady. Potym dumaju: «Dobra, ja pažyła ŭžo, chaj choć maładyja dačakajucca».
Moładź škada, jakoj pryjšłosia źjechać, jakaja ŭsio jedzie i jedzie. Pracy niama dla maładych, svabody niama. Maładym davodzicca voś tak žyć i pieražyvać usio toje, što adbyvajecca ciapier: turmy, sudy, adjezdy. Ludzi ž ničoha [drennaha] nie zrabili.
Halina Filipaŭna havoryć pavolna, robiačy vialikija paŭzy pamiž frazami. Pryznajecca: apošnim časam stała składana havaryć, havorka zapavoliłasia, słovy zabyvajucca. Dy i z nahami abvastrylisia staryja prablemy: chadzić stała vielmi ciažka.
— Pierasoŭvajusia vielmi drenna. I z pałačkaj drenna atrymlivajecca, i z mylicaj, — uzdychaje jana.
Ale, niahledziačy na składanaści sa zdaroŭjem, starajecca čytać apošnija naviny. Zastavacca ŭ kursie apošnich padziej taksama nialohka: balać vočy, pahoršyŭsia zrok. Dy i pieražyvaje mocna. U 2020 hodzie, pryznajecca Halina Filipaŭna, jana ŭsio ž była bolš aktyŭnaja: i navin bolš čytała, i navat na pieršy ahitacyjny pikiet za Śviatłanu Cichanoŭskuju trapiła.
— Ale ŭsio roŭna hladžu ŭ Internecie. Pieražyvaju za ŭsich. Časam mnie nie padabajucca dziejańni Śviatłany Cichanoŭskaj i kamandy, ale potym dumaju: što ž jana moža zrabić? Užo dobra, što niešta robić, jana dumaje pra Biełaruś,
— kaža surazmoŭca.
Jak i raniej, piensijanierka padtrymlivaje suviaź ź Siarhiejem Cichanoŭskim — piša jamu listy. Ale, mabyć, častku ź ich jon usio ž nie atrymlivaje. Jak i Halina Filipaŭna.
— Jon užo, napeŭna, i nie dumaje, što ja žyvaja, tamu što ŭ apošnim liście napisaŭ: «Vinšuju siamju Andrejčyk z Novym hodam i Kaladami». Źbirajusia jamu adpisać u adkaz. Ale ŭvieś čas dumaju, jak napisać tak, kab jamu nie naškodzić. Pakul nie prydumała,
— pryznajecca žančyna.
Za sudom nad Siarhiejem Halina Filipaŭna ŭvažliva sačyła. Pryznajecca, prysud jaje źniervavaŭ i ašałamiŭ:
— Heta, viadoma, dzika. Rozumam nie zrazumieć, kab 18 hadoŭ dali čałavieku, jaki ničoha nie skazaŭ na [Łukašenku], nijakich zaklikaŭ nie rabiŭ, — kaža Halina Filipaŭna i doŭha maŭčyć.
Cicha ŭzdychaje.
Kamientary