«Apazicyjny kandydat Batu znachodzicca ŭ «abiaźziańniku». U Navasibirsku pratesnym kandydatam staŭ aranhutan. Jamu nie dali pieramahčy
U rasijskim Novasibirsku pavinny byli prajści sumlennyja i svabodnyja vybary navahodniaha talismana horada. Ale, zdavałasia b, bolš žartoŭnaja kampanija chutka pieratvaryłasia ŭ palityčny tryler. Miascovyja žychary padtrymali pratesnaha kandydata — aranhutana Batu — i abvinavacili ŭłady horada va ŭkidach i padtasoŭkach. Historyja skončyłasia nibyta parazaj hramadstva, ale jana padstava dla dastatkova surjoznych vysnoŭ i abahulnieńniaŭ.
Hałasavańnie prachodziła na sajcie meryi Novasibirska z 13 studzienia pa 7 lutaha. Miascovyja niezaležnyja kandydaty i błohiery zaklikali praz svaje kanały padtrymać aranhutana Batu, i jon upeŭniena pieramahaŭ.
Zdavałasia b, ništo nie praročyła nijakich palityčnych skandałaŭ. Adnak u noč z 3 na 4 lutaha ŭdzielniki hałasavańnia zaŭvažyli, što ni z pola ni ź lesu raptam pačała imkliva nabirać hałasy i dahaniać aranhutana miadźviedzicha Šyłka. I ŭ hetym pabačyli ruku Maskvy.
Pa źviestkach miascovaha partała tayga.info, losam navasibirskaha talismana surjozna zacikavilisia až u pucinskaj administracyi.
«U meryju Novasibirska z aparata paŭnamocnaha pradstaŭnika prezidenta Rasii ŭ Sibiry pastupiła nastojlivaja prośba nie dapuścić, kab aranhutan staŭ simvałam navahodniaj stalicy. Paśla hetaha Šyłka vyrvałasia napierad», — pisała vydańnie.
Na niejki čas miadźviedzicha stała lidaram hałasavańnia, ale prychilniki Batu zdoleli mabilizavacca — Šyłka zastałasia zzadu. Ale napierad pačaŭ vyryvacca inšy «praŭładny kandydat» — bars Sajan. Za 4 hadziny śniežny bars atrymaŭ 25 tys. hałasoŭ, choć na sajcie meryi za hety čas pabyvaŭ usiaho 1 851 unikalny naviedvalnik.
Udzieł u hetaj žartoŭnaj kampanii natchniŭ praciŭnikaŭ ułady, pa jaje matyvach uźnikła šmat žartaŭ i miemaŭ.
«Apazicyjny kandydat Batu na dadzieny momant znachodzicca ŭ «abiaźziańniku», — žartavali ŭ Tvitary.
«Takija nachabnyja ŭkidy čakana pryviali da ŭzmacnieńnia pratesnaha hałasavańnia! Batu znoŭ pačaŭ pieramahać, ale meryja śpiešna zharnuła vybary talismana. Apytańnie, jakoje pavinna było skončycca 7 lutaha ŭ 23.55, było daterminova zavieršana ŭ niadzielu ŭviečary», — pisaŭ viadomy błohier Illa Varłamaŭ.
Na momant zakančeńnia hałasavańnia z vynikam 39,39% pieramahaŭ Batu, druhoje miesca zajmaŭ Sajan (37,19%), treciaj stała Šyłka (11,94%). Zdavałasia b, pratest pieramoh, ale miascovyja ŭłady jak apošni arhumient uklučyli opcyju «časam nie da zakonaŭ». Paśla padviadzieńnia vynikaŭ Novasibirski zaapark vystupiŭ «suprać farsu ŭ narodnym hałasavańni».
«Novasibirski zaapark nie zacikaŭleny ŭ takoj uvazie da našych hadavancaŭ. Nam nie pa dušy stvareńnie abraźlivych miemaŭ, tamu my prosim spynić apytańnie i nie ŭličvać jaho vyniki», — paviedamlajecca ŭ aficyjnaj zajavie ŭstanovy.
Takim čynam, žadańnie miascovych žycharoŭ svabodna vybirać choć kaho, choć navat navahodni talisman, sutyknułasia ŭ Navasibirsku z administracyjnym resursam, hramadstva zastałosia nibyta la raźbitaha karyta.
Ale heta na pieršy pohlad kurjoznaja historyja — padstava i dla bolš šyrokich abahulnieńniaŭ. Adno ź ich robić papularny rasijski błohier Dźmitryj Kolezieŭ u svaim telehram-kanale:
«Vydatnaja atrymałasia historyja nie tolki pra Novasibirsk i nie tolki pra zaapark. Jana pra toje, jak ludziam patrebnyja vybary i naohuł lubyja formy kalektyŭnaha ŭdziełu hramadzian u žyćci hramadstva. Pra toje, jak pratesnyja nastroi mohuć prymać samyja mudrahielistyja formy. Pra toje, jak ułada baicca navat takoha kamičnaha pratestu. Narešcie, pra toje, što arhanizatary vybaraŭ, kali za imi niama hramadskaha kantrolu, nie prymajuć vynik, ź jakim nie zhodnyja.
Luboje kalektyŭnaje dziejańnie hramadzian niasie palityčnaje adcieńnie.
Kali publičnaja kankurentnaja palityka ŭ krainie faktyčna adsutničaje, navat vybary talismana horada, ad jakoha nie zaležyć uvohule ničoha, pieratvarajucca ŭ važnuju palityčnuju źjavu.
Vybary sami pa sabie kansalidujuć ludziej, mabilizujuć ich, farmujuć hrupy, vyjaŭlajuć lidaraŭ. Praces hety składany i, kali nie zahnać jaho ŭ žorstkija ramki, drenna pradkazalny.
Navat žorstkaje filtravańnie kandydataŭ nie vyrašaje prablemy pratesnaha hałasavańnia. Kali ludzi stamilisia ad dziejnaj ułady, jany hatovyja hałasavać choć za aranhutana. Naturalna, što ŭłada vybaraŭ pabojvajecca — u čym my mieli zadavalnieńnie pierakanacca — ale jaje tryvoha tolki padahraje pratest.
Dumaju, historyja aranhutana Batu abaviazkova pavinna trapić u padručniki pa najnoŭšaj palityčnaj historyi Rasiei, kali takija kali-niebudź buduć napisanyja».
Pasoł Sidarenka pakončyŭ z saboj, nie vytrymaŭ dopytaŭ KDB14
Kamientary