«Vyskačyŭ baćka, zrabiŭ try streły». Milicyjanier z rezanasnaha videa ŭ Čyrvonaj Słabadzie raskazaŭ «Našaj Nivie» svaju viersiju padziej
Siońnia źjaviłasia videa kanfliktu ŭ pasiołku Čyrvonaja Słabada, dzie syn Dzianis i baćka Uładzimir Jakubovičy sa zbrojaj u rukach adbivalisia ad milicyi. U vyniku kuli ni ŭ koha nie trapili, mužčyn zatrymali. Ale historyja ćmianaja, padrabiaznaściaŭ dahetul niama. Svajaki Jakubovičaŭ ničoha nie kamientujuć — ni maci, ni siastra. «Naša Niva» dazvaniłasia da supracoŭnika milicyi, jaki ŭdzielničaŭ u zatrymańni.
Apieratyŭnika zavuć Arciom Škoda. Jon pracuje ŭ adździele pa raskryćci kradziažoŭ kryminalnaj milicyi UUS Minabłvykankama.
— My pryjechali zatrymlivać čałavieka pa absalutna plovym artykule, — kaža Arciom Škoda. — Uvajšli ŭ dom, pradstavilisia supracoŭnikami milicyi. A tam dalej pačałosia….
Niepadparadkavańnie, supraciŭleńnie. U pracesie hetaha vyskačyŭ baćka, zrabiŭ try streły: adzin u pavietra, dva ŭ bok supracoŭnika, ale toj uchiliŭsia, tak vyjšła.
My sprabavali spravu davieści da kanca, ale ja atrymaŭ čatyry ŭdary pa hałavie. Dalej padziei praciakali nie vielmi dobra: nas pačali abvinavačvać, što my nie ŭ formie, patrabavać dakumienty aproč paśviedčańnia.
— U telehram-kanałach hulaje viersija, što vy pryjechali ŭ hetuju siamju, bo Dzianis Jakubovič napisaŭ skarhu na niepravamiernyja dziejańni śledčaha.
— Ja nie čytaju telehram-kanałaŭ. Ale razvažać, što śledčaha pakryŭdzili — i milicyja kinułasia abaraniać honar i hodnaść paruhanaha śledčaha… Nu heta ž tryźnieńnie. U mianie jość pastanova na zatrymańnie, bo čałaviek chavajecca ad śledstva — heta nahoda.
— A što jamu inkryminujecca?
— Nie budu na hetaje pytańnie adkazvać, chaj hetuju infarmacyju vam dajuć śledčyja orhany, kali paličać nieabchodnym.
— Strašna vam było ŭ toj momant?
— Usie psichična zdarovyja ludzi — kaniečnie było [strašna].
— Pa videa nie vidać, što vam strašna. Idziacie na zbroju.
— U mianie staić zadača zatrymać čałavieka, jak ja jaje vykanaju — maje prablemy.
— Ale kali b vas zastrelili, vy b nie vykanali.
— Nu, vykanali b užo inšyja supracoŭniki.
— Jašče pytańnie. Na videa čuvać słovy, što voś tut «dvoje», i jašče adzin «tam staić».
— Treci supracoŭnik byŭ adpraŭleny pa mašynu.
— A jak vy zabrali zbroju va Uładzimira Jakuboviča?
— Ja hety momant užo nie bačyŭ, nie mahu skazać.
Arciom Škoda kaža, što ničoha nie kazaŭ pra stralaninu svajakam, kab ich nie tryvožyć, «ale ŭsie i tak viedajuć».
Darečy, Arciom Škoda — syn viadomaha ŭ milicejskich kołach Siarhieja Škody, jaki byŭ namieśnikam kiraŭnika ŭpraŭleńnia ŭłasnaj biaśpieki MUS pa Minskaj vobłaści, a potym uznačalvaŭ upraŭleńnie biaśpieki ŭ Dziaržaŭnym mytnym kamitecie.
Kamientary